Алматыда Open Almaty арқылы өтініш қабылдауға арналған бірыңғай 109 нөмірі іске қосылды

Жаңа формат өтініштерді тәулік бойы, демалыс және мереке күндері де қабылдауға мүмкіндік береді, – деп хабарлайды Aikyn.kz.

Бірыңғай нөмірге көшу өтініштерді қабылдау жеделдігін арттыруға, жауап күту уақытын қысқартуға және қалалық сервистерге қолжетімділікті арттыруға бағытталған.

109 байланыс орталығы қалалық инфрақұрылым, көріктендіру, тұрғын үй-коммуналдық шаруашылық және басқа да бағыттар бойынша өтініш қабылдайтын негізгі байланыс арнасына айналды.

Сонымен қатар тұрғындар үшін қосымша байланыс тәсілдері сақталған:
— Open Almaty әлеуметтік желілері (Instagram, Facebook, Telegram);
— өтініш беріп, оның орындалуын бақылауға болатын Open Almaty порталы;
— өтінім жолдап, мәртебесін қадағалауға мүмкіндік беретін мобильді қосымша;
— Абай даңғылы, 90 мекенжайындағы жобалық кеңсе.

Осылайша, әр тұрғын өзіне ыңғайлы тәсілді таңдап, өтінішті онлайн немесе келіп жолдай алады.

Бірыңғай 109 нөмірінің енгізілуі — қала тұрғындарымен өзара байланысты күшейту және сервистер сапасын арттыруға бағытталған маңызды қадам.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.