Алматыда Тау бөктеріндегі аудандарда бақылау күшейтілді

Алматы әкімі Дархан Сатыбалды сел және көшкін қаупі кезеңіндегі қауіпсіздік мәселесі бойынша кеңес өткізді. Жиын барысында қала қызметтерінің дайындығына және тау бөктеріндегі аудандарда құрылыс нормаларының сақталуына ерекше назар аударылды, деп хабарлайды Arasha.kz.

Өткен жылдың қорытындысы бойынша беткейлерді заңсыз кесу және жер бедерін өзгерту фактілері анықталды. 30 жер аумағының меншік иесі жауапқа тартылып, айыппұл салынып, заңбұзушылықтарды жою туралы нұсқама берілді.

Таулы аумақтар мен өзен арналары бойындағы 9 аумақта трос-торлы жүйелер мен анкерлік бекітпелер қолдану арқылы беткейлерді нығайту жұмыстары аяқталды. Сонымен қатар, көшкін қаупі бар аймақтарда орналасқан 13 жер аумағы сатып алынып, оларды көркейту және көгалдандыру жұмыстары жоспарланған.

Төтенше жағдайлар департаментіне өзен арналарына, мұздақ көлдерге және селден қорғайтын бөгеттерінің жай-күйін бақылауды күшейту тапсырылды.