Алматыда жол талғамайтын көлік мопед жүргізушісін қағып кетті

Фото: istockphoto.com

Жол-көлік оқиғасы 16 шілдеде Медеу ауданында болған.

Полиция мәліметінше, Toyota Land Cruiser жүргізушісі жолақ ауыстыру кезінде өзімен бір бағытта келе жатқан Piaggio Vespa мопедімен соқтығысқан.

Жол апатынан кейін зардап шегуші әлеуметтік желіде видео жариялап, жүргізушінің әрекетіне наразылық білдірді. Ол бейнежазбасында оқиға кезінде кінәлінің күліп тұрғанын атап өтіп, оның туыстары құқық қорғау органдарында жұмыс істейді деген болжам айтқан. Жәбірленуші полицияны сол себепті әрекетсіздік танытты деп айыптаған.

Электр мопедтері мен самокаттарға қатысты жаңа шектеулер енгізіледі

Алайда Алматы қаласының полиция департаменті бұл ақпаратты жоққа шығарды.

«Хабарлама түскен бойда оқиға полиция қызметкерлерімен тіркеліп, қолданыстағы заңнама талаптарына сәйкес рәсімделді. Жол апаты салдарынан мопед жүргізушісі мен жолаушысы медициналық көмекке жүгінді. Қазіргі уақытта Медеу аудандық полиция басқармасының әкімшілік практика бөлімі оқиғаның барлық мән-жайын жан-жақты әрі объективті анықтау мақсатында әкімшілік іс жүргізіп жатыр», делінген хабарламада.

Құқық қорғау органдары азаматтарды тек ресми ақпаратқа сүйенуге және расталмаған мәліметтерді таратпауға шақырды.

Түркістан облысында болған жол апатынан 7 адам қаза тапты

Еске сала кетейік, бұған дейін Алматы қаласындағы Райымбек даңғылында жедел жәрдем көлігі мен мопед соқтығысып, бір адам көз жұмған еді.