Алматыдағы Саяхаттағы бір жарым миллиардтық супероялдамалар мердігер мерзімді кешіктіргені үшін айыппұл төлейді

Алматыдағы "Саяхат" автовокзалы маңындағы көлік-аялдама кешендерінің (КАК) құрылысы кезекті ұзаққа созылған жобаға айналып барады. 2025 жылы аяқталады деп жоспарланған жоба тағы да кешіктірілді. Tengrinews.kz тілшісі аялдамалардың қазіргі жай-күйін біліп қайтты.

Алматыдағы "Саяхат" автовокзалы маңындағы көлік-аялдама кешендерінің (КАК) құрылысы кезекті ұзаққа созылған жобаға айналып барады. 2025 жылы аяқталады деп жоспарланған жоба тағы да кешіктірілді. Tengrinews.kz тілшісі аялдамалардың қазіргі жай-күйін біліп қайтты.

Тапсыру мерзімі бірнеше рет ауысты

"Саяхаттағы" "супераялдамалар" құрылысы жүріп жатқанына бір жылдан асты. Жұмыс 2025 жылы басталған болатын. Ол кезде билік жобаны 2025 жылдың үшінші тоқсанына дейін (қыркүйекке дейін) аяқтауға уәде берген еді, бірақ мерзім кейінге шегерілді.

2025 жылғы қараша / Фото: Tengrinews.kz / Болат Айтмолда

Кейінірек соңғы мерзім 2025 жылдың 31 желтоқсанына ауыстырылды, одан кейін – 2026 жылғы ақпанның аяғына дейін ұзартылды.

Наурыздың аяғында біз барған кезде жұмыс әлі бітпеген еді. Нысан паспортындағы тапсыру күні өшірілген, ал әкімдік жаңа мерзім ретінде сәуірді атады.

2026 жылғы наурыз / Фото: Tengrinews.kz / Болат Айтмолда

Қазір мамырдың аяғы болса да, Алматыны қала маңындағы елді мекендермен байланыстыратын торап әлі аяқталмаған күйде қалып отыр.

Жаңа мерзім қашан?

Алматы қалалық жол инфрақұрылымын дамыту басқармасы редакцияның сауалына нысанның 90 пайызға дайын екенін хабарлады. Жаңа мерзім – 2026 жылдың маусымы.

Бұдан бөлек, кестеден кешіккені үшін мердігерге әрбір өткізіп алған күн үшін өсімпұл есептеліп жатыр.

"Бас мердігер бекітілген құрылыс-монтаждау жұмыстарының кестесінен қалып қойды, соған байланысты шарт талаптарына сәйкес мерзімін өткізіп алған әр күн үшін айыппұл санкциялары (өсімпұл) есептеледі. Мердігерге жұмыс қарқынын жеделдету қажет екені ескертілді. Нысанды толық аяқтау биыл маусымға жоспарланған", – деп хабарлады басқарма.

Айта кететін жайт, бұған дейін жоспарланған "супераялдамалардың" бірі жобадан мүлдем алып тасталған.

Бастапқыда жоба төрт нысанды қамтыған болатын: "Қонаев", "Мерей" СОО, "Пушкин" және "Саяхат" автовокзалы. Алайда қазір сауда орталығы жанындағы павильон "жобаны оңтайландыру мақсатында және қазіргі көлік схемасына сәйкес" алып тасталған.

"Супераялдамалар" бюджетке қаншаға түсті?

Бұған дейін "Саяхаттағы" үш павильонның жалпы құны бюджетке 1 миллиард 658 миллион теңгеге түскенін анықтаған едік, бұл бір "супераялдама" үшін 550 миллион теңгеден аса сомаға шығады.

Бұл жол нысаны қаладағы ұқсас нысандардан әлдеқайда қымбат болып шықты.

Мәселен, "Сәлем" көлік-аялдама кешендері (екі жағынан) бюджетке 607 миллион теңгеге түскен; Қалқамандағы № 7 қалалық аурухана жанындағы екі аялдама – 916 миллион теңгеге. Аялдамалардың қазіргі көрінісі: фоторепортаж

22 мамырда Tengrinews.kz тілшісі "супераялдамалар" құрылысының қай кезеңде екенін көру үшін Райымбек даңғылына барды.

"Пушкин" аялдамасы

"Пушкин" аялдамасында жұмыс өте қарқынды жүріп жатыр. 50 метрлік қалқа астында экскаватор тұр, жанында жүк көлігі бар. Аумақ уақытша қоршаумен және белгі таспасымен қоршалған.

2026 жылғы мамыр / Фото: Tengrinews.kz / Ақбота Сіләм

Нысанда асфальт төсеу жұмыстары аяқталған, бірақ қалқа астына тас төсеу жұмыстары әлі жалғасып жатыр. Құрылыс алаңында қосалқы жұмыстар жүріп жатыр: инженерлік коммуникациялар тартылып, бетон сақиналар орнатылған, тақташалар мен жиектастар дайындап қойылған.

2026 жылғы мамыр / Фото: Tengrinews.kz / Ақбота Сіләм 2026 жылғы мамыр / Фото: Tengrinews.kz / Ақбота Сіләм

Бұл торап қала мен қала маңындағы елді мекендер арасындағы, оның ішінде Талғар бағытындағы негізгі ауысып міну бекеттерінің бірі болып қала береді.

2026 жылғы мамыр / Фото: Tengrinews.kz / Ақбота Сіләм

Сонымен қатар Пушкин және Есенов көшелерінің арасындағы учаскеде көлік құралдары мен жаяу жүргіншілердің қозғалысы әлі де айтарлықтай шектелген.

"Саяхат" автовокзалы аялдамасы

Біраз әрірек, Райымбек және Сүйінбай даңғылдарының қиылысында "Саяхат" автовокзалы аялдамасы орналасқан. Мұнда да жұмысшылар 50 метрлік қалқаны құрастырып, перронға плитка төсеген.

2026 жылғы мамыр / Фото: Tengrinews.kz / Ақбота Сіләм

Дегенмен құрылыс әлі де жалғасып жатыр. Тротуар жиегінде жұмысшылар әлі төселуі тиіс сары бедер плиткаларды дайындап қойыпты.

2026 жылғы мамыр / Фото: Tengrinews.kz / Ақбота Сіләм

Аялдама кешенінің маңында үлкен топырақ үйінділері пайда болған. Олардың көршілес тұрғын үй кешенінің құрылысына ма, әлде басқа жұмыстарға қатысы бар ма, әзірге белгісіз.

2026 жылғы мамыр / Фото: Tengrinews.kz / Ақбота Сіләм "Қонаев" аялдамасы

"Қонаев" кешені барынша абаттандырылған әрі толық қуатында жұмыс істеп тұрған нысанға ұқсайды. Мұнда күн сайын өз рейстерін күткен жүздеген жолаушы жиналады.

Мамыр 2026 / Фото: Tengrinews.kz / Ақбота Сіләм

Мұнда жолаушылар аптап ыстықтан немесе жаңбырдан қорғана алады.

Мамыр 2026 / Фото: Tengrinews.kz / Ақбота Сіләм

Сонымен қатар Tengrinews.kz тілшісі аялдамалардың ешбірінен әкімдік уәде еткендей "келетін бағыттар туралы ақпарат беретін интерактивті таблоларды" байқамады.

Ерекше аялдамалар

Еске сала кетейік, былтыр Алматы тұрғындары Райымбек даңғылының бойынан ауқымды металл конструкцияларын байқаған болатын. Сол кезде қалалықтар қарбалас учаскеде нақты не салынып жатқанын ұзақ уақыт болжай алмады. Кейін бұның қала іші және қала маңындағы автобустардың қозғалысын ретке келтіруге арналған ірі павильондар — көлік-аялдама кешендері (КАК) екені белгілі болды.

Ақпан 2025 жыл / Фото ©️ Tengrinews.kz / Әлихан Сариев

Сол кезде әкімдік бұл нысандардың болашақ BRT инфрақұрылымының бір бөлігі болатынын түсіндірген.

"Қонаев", "Мерей" СОО, "Пушкин" және "Саяхат" автовокзалы" аялдамалары 63-ке дейінгі бағытқа қызмет көрсетіп, агломерациядан келетін негізгі жолаушылар ағынын қабылдауы тиіс болатын.

Эскиздерді Алматы әкімдігі 2025 жылғы ақпанда ұсынған

Әр аялдамада бір мезгілде алты автобусқа дейін адам отырғызу мен түсіруге есептелген 50 метрлік бастырмалар орнату жоспарланған еді. Сондай-ақ мыналар көзделді:

келетін бағыттар туралы ақпараты бар интерактивті таблолар орнату; іргелес аумақты абаттандыру; мүмкіндігі шектеулі азаматтар мен арбалы ата-аналар үшін пандустар салу.

Кейінірек осындай "супераялдамалар" Қалқаманда және Солтүстік айналма жолында, "Сәлем" базарының жанында пайда болды. Егер ол жердегі нысандар пайдалануға берілген болса, "Саяхат" автовокзалының жанындағы кешен әлі күнге дейін аяқталмаған күйде қалып отыр.

"Тәжірибелі" мердігер

"Саяхат" автовокзалы" көлік-ауысып міну торабының құрылысына "Golden City DS" ЖШС жауапты екенін айта кеткен жөн.

Қала тұрғындарының бұл компанияға қояр сұрақтары аз емес: дәл осы мердігер Әл-Фараби даңғылындағы Есентай өзені арқылы өтетін велосипед-жаяу жүргіншілер көпірлерін үшінші жыл қатарынан аяқтауды жоспарлап келеді.

Анықтама: Әл-Фараби даңғылындағы көлік көпірін реконструкциялау және екі велосипед-жаяу жүргіншілер көпірінің құрылысы 2023 жылы 2 миллиард теңгеден аса сомаға басталған. Егер негізгі көпір 2023 жылдың қыркүйегінде пайдалануға берілсе, онда велосипед-жаяу жүргіншілер көпірлерінің құрылысы арада жылдар өтсе де әлі аяқталмаған.

Алматы әкімдігі баспасөз қызметінің эскизі

Қарашаның аяғында Алматы мәслихатының кезектен тыс сессиясында депутат Салтанат Серікова пайдалануға беру мерзімдерінің бірнеше рет ауыстырылғанын: — 2023 жылдың аяғынан 2024 жылдың желтоқсанына, содан кейін 2025 жылдың мамыр және маусым айларына шегерілгенін атап өтті.

2025 жылғы 18 желтоқсанда редакцияның сауалына берген жауабында басқарма оңтүстік жаяу жүргіншілер көпірінің құрылысы аяқталғанын, аумақты абаттандыру жұмыстары жүріп жатқанын хабарлады. Солтүстік көпірді 2026 жылдың маусымына қарай аяқтау жоспарланып отыр.

"Саяхат" автовокзалы ауданындағы көлік-аялдама кешендерінің (КАК) құрылысы тағы да созылып кетті. 2025 жылы аяқталуы тиіс болған жоба әлі күнге дейін бітпеген. Редакция оқиғалардың дамуын әрі қарай бақылайды.