Алматылықтардың киімінде қара дақ пайда болды мамандар себебін айтты

АЛМАТЫ, 9 желтоқсан – Sputnik. Алматыда күйе жаңбыр жауып, тұрғындарды әбігерге салды, деп хабарлайды Sputnik Қазақстан тілшісі.

Алматылықтар киімдерінде жаңбырдан соң қара дақтар пайда болғанын айтып жатыр. Қалалық экология департаменті бұл көптен бері жаңбырдың болмауынан дейді.

"Соңғы апталарда Алматы қаласында жауын-шашынның болмауы салдарынан атмосферада ластаушы заттар: шаң-тозаң, күйе бөлшектері, автомобиль және өндірістік шығарындылар әдеттегіден көп жиналып қалған. Желсіз әрі инверсиялы ауа райы бұл бөлшектердің төменгі қабатта тұнып қалуына әсер етті", - дейді ведомство.

Департаменттің мәліметінше кеше жауған жаңбыр алғашқы "тазарту жаңбыры" ретінде атмосферадағы осы жинақталған бөлшектерді жерге шайып түсірген.

"Мұндай кезде жаңбыр тамшылары ауадағы күйе мен шаң бөлшектерін өзіне жабыстырып, жерге түсіреді. Салдарынан ашық түсті киімдерде, терезелерде немесе көліктердің үстінде қара түсті дақтардың қалуы – қалыпты физикалық құбылыс", - дейді департамент.

Бұл құбылысты "лас жаңбыр" немесе "күйе араласқан жаңбыр" деп атауға болады.

"Ол жаңбырдың химиялық уыттылығын білдірмейді, бірақ ауада зиянды бөлшектердің, әсіресе PM2.5/PM10 күйе бөлшектері көп болғанын көрсетеді. Жаңбыр ауадағы ластағыш бөлшектерді төменге түсіреді – бұл ғылыми тұрғыда дәлелденген "дымқыл тұну" процесі", - дейді Алматы қаласы бойынша экология департаменті.

Дақтардың пайда болуы көбіне шаң-тозаңның, күйе бөлшектерінің және автокөлік эмиссиясының жаңбырмен шайылып түсуінен болады. Егер жаңбыр химиялық қауіпті немесе қышқыл сипатта болған жағдайда ерекше иіс, металдың коррозиясы, өсімдіктердің күйюі сияқты белгілер байқалар еді. Қазіргі жағдай оған жатпайды.

Киімде көрінген қара дақтар – ұзақ уақыт бойы жиналған атмосфералық күйе мен шаңның алғашқы жаңбырмен бірге жерге түсуінен болған табиғи құбылыс. Бұл Алматы ауасындағы ластаушы заттардың деңгейінің жоғары екенін көрсететін индикатор, дейді мамандар