Алматының цифрлық егізі қашан жасалатыны белгілі болды

Қалалық цифрландыру басқарма басшысының орынбасары Мейрам Дүйсековтің айтуынша, бұл бастамалар коммуналдық инфрақұрылымды басқарудың тиімділігін арттырып, ресурстың жоғалуын азайтып, апаттық жағдайларда жедел әрекет етуге жағдай жасайды. Ал бұл деректер мегаполистің цифрлық егізіне енгізіліп, бір орталыққа біріктіріледі. Қазір жобаның серіктесі ретінде Шэньчжэнь қаласындағы жетекші компания — SUTPC таңдалған. Бастама қазақстандық «Qala AI» компаниясымен бірлесіп, гранттық қаржыландыру негізінде жүзеге аспақ.

— «Жас Қанат» шағын ауданы — пилоттық кезеңде цифрлық көшірмесі жасалатын аумақ ретінде белгіленді. 2026 жылғы қаңтардан 2027 жылғы наурызға дейін мұнда инженерлік желілерді түгендеу мен толық цифрландыру жоспарланған. Жүйені толық интеграциялау мен енгізу жағы келер жылға межеленіп отыр, — деді ол.

Мейрам Дүйсеков қалалық ортаны бақылаудың инновациялық әдістері де енгізіле бастағанын атап өтті. Алматыда алғаш рет жер бауырлап ұшатын ұшқышсыз ұшу аппараттарын пайдалану бойынша пилоттық жоба іске қосылып жатыр. Жобаны Shenzhen Smart City Group пен «Қазақтелеком» АҚ-мен бірлесіп жүзеге асырады.

Алмалы ауданында — Назарбаев, Абай, Розыбакиев пен Райымбек көшесінің аралығында көше жарығы мен тазалық сапасын бақылауға арналған сынақ аймағы құрылды.

Сонымен қатар Бөкейханов пен Рысқұлов көшесінің аумағында, сондай-ақ Алатау ауданындағы «Өжет» шағын ауданында экологиялық бақылауға арналған сынақ аймақтары ұйымдастырылды.

Еске салайық, бұған дейін Алматының цифрлық егізі жобасын Қытай агенттігі қаржыландыруы мүмкін екенін жазғанбыз.

Алматы қаласының цифрлық егізін құру бастамасы алғаш рет 2022 жылы айтылды.