“Алтын адам“, жақсы адамдар және шүмектен ағатын дәмді су. Есік қаласының тыныс тіршілігі

Біз Қазақстандағы мегаполистер туралы - ондағы құрылыс, өзгерістер, жаңа нысандар мен абаттандыру жайлы жиі жазамыз. Ал шағын қалалар жаңалықтар таспасына сирек шығады, шыға қалса, көбіне жайсыз оқиғаларға байланысты болып жатады. Tengrinews.kz-тегі "Қазақстанның шағын қалалары" атты жаңа материалдар топтамасы осы олқылықтың орнын толтыруды көздейді.

Tengri AI ұсынған жаңалықтың қысқаша мазмұны Бұл ЖИ жазған мәтін

Tengrinews.kz «Қазақстанның кіші қалалары» топтамасын бастады; алғашқы репортаж — Есік (Иссык) қаласынан, Алматыдан ~50 км жерде, халық саны ≈40 мың. Негізгі нысандар: «Есік» қорық-музейі («Алтын адам» киімінің көшірмесі, түпнұсқа сүйек қалдықтары; 1970 жылғы қазба жұмыстары), Есік көліне жақындық; қорғандар. Қалалық орта: бірыңғай дизайн-кодсыз аралас құрылыс; жаңа аймақтар — жағалау, воркаут алаңдары, скверлер мен ескерткіштер (ҰОС, Ауғанстан, Керей мен Жәнібек), Әділжан ата мешіті. Әлеуметтік инфрақұрылым: колледждер (медициналық, гуманитарлық-экономикалық), мектептер (соның ішінде «Алтын Адам»); кинотеатр жоқ; Жамбыл Жабаев атындағы қалалық саябақ бос көрінеді және жаңартуды қажет етеді. Тұрғындардың пікірі: артықшылықтары — тау ауасы, шүмектен ағатын дәмді су, сыпайы адамдар, Алматыға дейінгі көлік қатынасы; кемшіліктері — дизайн-кодтың жоқтығы, балалар ойын-сауық орындарының/саябақтың/бассейннің тапшылығы, Алматыға қатынап жұмыс істеу кезіндегі (бір жаққа 2–3 сағат жол) жергілікті жалақының төмендігі. Бағалар: фотомәзірлер мен баға белгілері келтірілген (бургерлер, тәттілер, сиыр еті ~3800 теңгеден бастап, көкөністер/жемістер), картоптың шыққан жеріне байланысты айырмашылықтар белгіленген (Шымкент/Павлодар). Егжей-тегжейлер: қылқан жапырақты екпелер, 2024 жылы Валентина Сабенина қалпына келтірген бойжеткеннің кеңестік мүсіні; ТЖМ 30 жылдығына арналған инсталляция (өрт сөндіру аялдамасы, фонтан-брандспойт), муралдар (Жамбыл, «заң мен тәртіп»), көпқабатты үйлердегі көптеген спутниктік тарелкалар, жақсы кофеханалар мен сервис.

Бәрі қарапайым: тілшіміз кәдімгі жұмыс күні бейтаныс қалаға барып, көшелерін аралайды. Мұнда өмір сүру қаншалықты қолайлы екенін, қайда баруға болатынын, серуендеу мен демалыс орындарын, жол, көлік және қалалық инфрақұрылымның жай-күйін бақылайды. Сондай-ақ жергілікті тұрғындармен сөйлесіп, олардың өз қаласын не үшін жақсы көретінін және нені өзгерткісі келетінін біледі.

Бағытымыздың алғашқы нүктесі - Алматыдан небәрі бірнеше ондаған шақырым жерде, Іле Алатауы етегінде орналасқан шағын қала Есік болды. Оның кәдімгі жұмыс күніндегі тыныс-тіршілігін және алматылықтардың көбі әйгілі көлге барар жолда өтіп кететін қаланың тұрғыны болу қандай екенін көрейік.

Есікте "Алтын адам" табылған 

Алдымен тарихи анықтамаға тоқталайық.

Анықтама: Есік - Іле Алатауы етегінде, Алматыдан шамамен 50 шақырым жерде орналасқан шағын қала, Еңбекшіқазақ ауданының әкімшілік орталығы. Қазіргі қаланың тарихы XIX ғасырдың ортасынан басталады: 1853 жылы мұнда қоныс пайда болып, кейін ол Надеждинская станицасына айналған. Кеңес дәуірінде қала Иссык деп аталса, бүгінде қазақша Есік атауын иеленген. Қазір мұнда 40 мыңға жуық адам тұрады.

Дегенмен кішкентай Есіктің маңында маңызы аудан деңгейінен әлдеқайда жоғары көрікті жерлер көп. Жақын маңда 1963 жылғы жойқын сел болған әйгілі Есік көлі орналасқан, осы жерлерден археологтар Қазақстанның басты символдарының бірі - "Алтын адамды" тапқан болатын.

Біз Алматыдан таңертең, сағат 10-нан кейін шықтық. Есікке барар жолда кептеліс жоқ деуге болады. Есесіне қарама-қарсы бағытта үлкен кептеліс қалыптасқан. Оңтүстік астанада жұмыс істейтін қала тұрғындарының көбі әр таңын осы кептелісте өткізетінін білдік. 

Фото © Tengrinews.kz / Юлия Колмогорова

Нұсқағыштан өттік:

Фото © Tengrinews.kz / Юлия Колмогорова

Кіре берісте-ақ тарихпен бетпе-бет келдік: қазба жұмыстарының ізі қалған қорғанды көрдік.

Фото © Tengrinews.kz / Юлия Колмогорова

Кадрды жақындатсақ, тілім мен ішіндегі техникалық құрылғылар көрінеді. Бұл Алтын адам табылған әйгілі қорған емес. Ол сәл ары қалаға қарай орналасқан және оның орнына автобаза салынған. Бірақ гидтің айтуынша, Есік маңындағы әрбір қорғанды қазу жұмыстары археологтарды құнды олжалармен қуантып отырған.

Фото © Tengrinews.kz / Юлия Колмогорова

Аркадан өтеміз:

Фото © Tengrinews.kz / Юлия Колмогорова

Кіре берісте бірден әйгілі Алтын адам мұражайын - "Есік" мемлекеттік тарихи-мәдени музей-қорығын көрдік. Алтын адам табылған қалаға келіп тұрып, бұл жерге соқпай кету мүмкін емес.

Фото © Tengrinews.kz / Юлия Колмогорова

Кіре берісте тас мүсіндер қарсы алды:

Фото © Tengrinews.kz / Юлия Колмогорова

Музейге кірдік:

Фото © Tengrinews.kz / Юлия Колмогорова

Алтын адам залына тап болдық. Есік музейіндегі - "реконструкция" көшірмесі. Алтын адам киімінің 1970 жылы табылған түпнұсқа бөлшектері Астанадағы Ұлттық музейде сақтаулы.

Фото © Tengrinews.kz / Юлия Колмогорова

Дегенмен Есік музейінде оның шынайы сүйек қалдықтары сақталған. Қазба жұмыстары кезінде құлаған бөренелерден зақымдалған бас сүйегінен басқасының бәрі осында. Осы және сақ дәуіріне қатысты көптеген қызықты тарихи дерек пен қазба жұмыстарының егжей-тегжейлі тарихын бізге музей гиді айтып берді.

Анықтама: "Есік" мемлекеттік тарихи-мәдени қорық-музейіндегі экскурсия құны 1 500 теңге тұрады. Осы қалаға жолыңыз түссе, бұл ақшаны аямай, міндетті түрде кіруге кеңес береміз. Әңгіме өте қызықты болды.

Фото © Tengrinews.kz / Юлия Колмогорова

Мұнда көне жәдігерлерге қол тигізуге болатын стенд бар. Қазба кезінде табылған мына қыш ыдыстардың сынықтарын ұстап көруге, қолға алуға болады. Бұл мұражайлардағы "Қолмен ұстауға болмайды" деген қатаң ескертулерден шаршайтын кинестетиктер үшін өте құнды.

Фото © Tengrinews.kz / Юлия Колмогорова

Есік музейіндегі кәдімгі терезе де экспозицияның толыққанды бөлігі іспетті. Гидтің айтуынша, терезеден мұражай жәдігерлерінің бір бөлігі табылған қорған көрініп тұр.

Фото © Tengrinews.kz / Юлия Колмогорова

Қаланың басты көрікті жерін тамашалап болған соң, әрі қарай жол тарттық.

Көшелер мен ескерткіштер

Тасжол бойында және қаланың ішінде жол жиегінде қалың өскен қарағай мен басқа да қылқан жапырақты ағаштар бірден көзге түседі, олардың түріне қарап, бұл жерге жақсы бейімделгенін байқауға болады.

Іле Алатауының бөктері үшін бұл аса үйреншікті ағаш емес. Желідегі мәліметтерге сәйкес, оны орман шаруашылығының қызметкерлері осыдан жарты ғасырдан астам уақыт бұрын "балқарағай, еуропа шыршасы және сібір майқарағайымен қатар" отырғызған екен.

Фото © Tengrinews.kz / Юлия Колмогорова

Қаладағы Алтын адам - жергілікті бірегейліктің бір бөлігі. Есіктің орталық көшелерінің біріне Алтын адам есімі берілген. Қалаға кіреберісте, мұражай маңында орналасқан заманауи инновациялық мектеп те осы атаумен аталады.

Фото © Tengrinews.kz / Юлия Колмогорова

Алтын Адам көшесіне шыққанда, мұнда жастардың көп екенін байқадық.

Фото © Tengrinews.kz / Юлия Колмогорова

Есік тұрғындарына жоғары білім алу үшін әзірге Алматыға немесе басқа қалаларға баруға тура келеді, бірақ кейбір мамандықтарды үйден ұзамай-ақ меңгеруге болады: мұнда медициналық және гуманитарлық-экономикалық колледждер бар.

Фото © Tengrinews.kz / Юлия Колмогорова

Есіктің қалалық келбеті әртүрлі. Бір көшеде қарапайым сауда дүңгіршектері мен өндірістік аймақты еске түсіретін автобөлшектер дүкені қатар тұруы мүмкін.

Фото © Tengrinews.kz / Юлия Колмогорова

Сонымен қатар ұқыпты абаттандырылған жайлы орындар да бар. Кейде мұндай қарама-қайшылықтар бір-бірінен небәрі бірнеше қадам жерде орналасқан.

Алтын Адам көшесінде біз себет ұстаған қыздың ерекше алтын түсті мүсінін жолықтырдық. Бұл Есіктің ауыл шаруашылығы саласындағы өткеніне арналған, кеңес дәуірінен қалған жергілікті көрікті жер екені белгілі болды. Мүсіннің бүгінгі күтіміне қала тұрғындарының бірі көп үлес қосқан: 2024 жылы зейнеткер Валентина Сабенина тозығы жеткен ескерткіштің жаңартылуына мұрындық болған.

Фото © Tengrinews.kz / Юлия Колмогорова

Есіктегі мына "Биг-Бенге" қараңызшы. Оның жанында воркаут аймағы, орындықтар мен ұқыпты егілген шыршалар бар.

Фото © Tengrinews.kz / Юлия Колмогорова

Есік - шағын қала. Сондықтан мұндағы танымал шағын демалыс орындары қалаға ерекше көрік береді. Мынау Қазақ хандығының негізін қалаушылар - Керей мен Жәнібекке арналған ескерткіш маңындағы аймақ.

Фото © Tengrinews.kz / Юлия Колмогорова

Ал бұл - әртүрлі тарихи кезең жауынгерлеріне арналған екі монумент орналасқан шағын сквер.

Фото © Tengrinews.kz / Юлия Колмогорова

Ұлы Отан соғысына қатысушыларға арналған ескерткіш:

Фото © Tengrinews.kz / Юлия Колмогорова

Ауғанстандағы соғыс қимылдарына қатысушыларға арналған мемориалдық ескерткіш.

Фото © Tengrinews.kz / Юлия Колмогорова

Жергілікті тұрғындардың кеңесімен жақында абаттандырылған жағалауға бет алдық.

Фото © Tengrinews.kz / Юлия Колмогорова

Фото © Tengrinews.kz / Юлия Колмогорова

Мұнда тау бөктеріндегі демалыс орнының сәнін келтіріп тұрған балалар алаңын көрдік. Фото © Tengrinews.kz / Юлия Колмогорова

Есік тұрғындары қала мен өздері туралы

Қала - бұл тек көшелер мен абаттандыру ғана емес, ең алдымен адамдар. Серуендеу кезінде біз, әрине, қала тұрғындарымен тілдеспей кете алмадық. Олармен танысып, Есіктегі тыныс-тіршілік, қалада не ұнайтыны және нені өзгерткісі келетіндері туралы сұрастырдық.

"Әскери саябақта" серуендеп жүрген Иринаны отбасымен жолықтырдық:

Фото © Tengrinews.kz / Юлия Колмогорова

Ирина осы жерде туып-өскенін айтты. Біраз уақыт Алматыда тұрған, бірақ кейін баланың жағдайына байланысты күйеуімен бірге қайта көшіп келуді жөн көрген:

- Мұнда ауа өте таза, балалар үшін пайдалы, денсаулыққа жақсы әсер етеді, - дейді ол.

Сондай-ақ оларға Есіктің табиғаты өте ұнайтынын: тау жақын, ауасы таза екенін айтты. Ал құбырдан ағатын кәдімгі судың дәмі өте керемет, сондықтан бөтелкедегі суды сатып алудың қажеті жоқ.

Отбасының жалғыз мәселесі бар: күйеуі Алматыда жұмыс істейді. Жолға өте көп уақыт кетеді, орта есеппен үш сағат. Ирина қазір декреттік демалыста, сондықтан бұл мәселе әзірге оған әсер ете қоймаған.

"Қалаға не жетіспейді" деген сұрағымызға Ирина бірыңғай қалалық дизайн-код қажет екенін айтты.

- Қаламыз өте әдемі, жап-жасыл әрі таза, пейзаждары Швейцарияға ұқсайды. Бірақ құрылыстар мүлдем бақыланбайды. Дизайн жағынан әлі де 90-шы жылдарды еске түсіреді, - дейді кейіпкеріміз.

- Тікелей Есік көліне баратын аспалы жолы бар тамаша тау шаңғысы трассаларын жасауға болар еді, - деп толықтырды ол.

Ал қалалық инфрақұрылымға келсек, Ирина балалардың ойын-сауық орындары, балалар орталықтары мен бассейн жетіспейтінін атап өтті.

Есік және дизайн-код

Иринаның сөзінен кейін біз қала құрылысына тағы бір мәрте мұқият көз салдық. Расында, мұнда әзірге бірыңғай дизайн-код туралы айту қиын. Әртүрлі түсті әрі сан алуан өлшемдегі маңдайшалар, ала-құла қасбеттер, жапсарлас құрылыстар мен сауда павильондары - әркім өз кеңістігін өз білгенінше безендірген.

Дегенмен, жүз рет естігенше, бір рет көрген артық:

Есік көшелері. Фото © Tengrinews.kz / Юлия Колмогорова

Кейбір жерлер 2000-жылдарды, кей жерлер 90-жылдарды еске түсіреді.

Фото © Tengrinews.kz / Юлия Колмогорова

Бірақ өте сәтті сәулеттік шешімдер де жоқ емес. Таулар мен бұлттар аясындағы Әділжан ата мешітіне қараңызшы - бұл жай фотокадр емес, нағыз көркем сурет сияқты.

Фото © Tengrinews.kz / Юлия Колмогорова

Қаланың келесі тұрғындарымен кофеханада таныстық.

Бариста Бота (оң жақта) көмекшісімен бірге. Фото © Tengrinews.kz / Юлия Колмогорова

20 жастағы бариста Бота (суретте оң жақта) Есікте туған. Оған мұндағы таза ауа мен "балдай дәмді су" ұнайды. Сондай-ақ Есік көлін ерекше жақсы көреді.

- Бұл жердің адамдары да керемет, - деп қосты қыз. 

Қалаға не жетіспейді деген сұраққа Бота жақсы қалалық саябақ пен кинотеатр қажет деп жауап берді. Есікте бірде-бір кинотеатр жоқ.

Сонымен қатар ол қаладағы көлік жаман емес екенін, жұмысқа әрдайым еш қиындықсыз жетуге болатынын айтты:

- Бізде көбі Алматыда жұмыс істейді және оқиды, сондықтан көлік қатынасы жақсы, қалыпты жүреді, - дейді ол.

Оның есімін айтуды ұмытып кеткен көмекшісі мектеп бітіргелі жатыр. Қызға Есіктегі таулар мен "шынайы, қонақжай адамдар" ұнайды екен. Дегенмен, ол мектептен кейін Алматыға оқуға түсіп, сонда тұруды жоспарлап отыр, өйткені "онда мүмкіндіктер көбірек".

Жағалауға бара жатқан жолда Иринаны жолықтырдық.

Ирина, Есіктің байырғы тұрғыны. Фото © Tengrinews.kz / Юлия Колмогорова

Ирина Есікте туып-өскенін айтты. Ал жұмысы Алматыдағы Көк базарда екен. Бұл оңай емес. Оның айтуынша, жол бір бағытқа екі сағаттан астам уақытты алады.

Мұндай қиындықтарға қарамастан неге туған қаласында жұмысқа орналаспайтынын сұрағанымызда, Ирина Есікте жалақы әлдеқайда аз екенін айтты. Есесіне, баға  төменірек. Сондықтан Алматыда жұмыс істеп, ақшаны осында жұмсаған тиімдірек.

Есіктің қыз-келіншектері бізбен ықыласпен әңгімелесті. Ал ерлер қауымы онша ашыла қоймады. Сауда үйлерінің маңынан клиент шақырып тұрған таксистерді көрдік. Бірақ олар сөйлесуден бас тартты:

- Тек нақты іс бойынша сөйлесу керек, жайдан-жай бос сөйлей алмаймын, - деп қысқа қайырды бір ер адам.

Қалалық саябаққа көз жүгіртейік

Біз тілдескен тұрғындардың көбі жаңартуды қажет ететін қалалық саябақты тілге тиек етті. Солай қарай бет бұрдық. Бізді осындай әдемі кіреберіс қарсы алды:

Есіктегі саябақтың кіреберісі. Фото © Tengrinews.kz / Юлия Колмогорова

Кіреберістегі тақтайшада саябақ Жамбыл Жабаев есімімен аталатыны және сағат 7:00-ден 23:00-ге дейін жұмыс істейтіні жазылған.

Есік саябағының кіреберісіндегі тақтайша. Фото © Tengrinews.kz / Юлия Колмогорова

Кіре берісте ақынның ескерткішін көреміз:

Жамбыл Жабаевтың ескерткіші. Фото © Tengrinews.kz / Юлия Колмогорова

Айта кетерлігі, Есіктің қалалық саябағынан жағымсыз ештеңе көрмедік. Онда тек тыныштық пен қараусыз қалғандай сезім болды. 

Жұмыс істемей тұрған бессейн (мүмкін жазғы маусымның аяқталуына байланысты болар) және жабық тұрған жұмбақ "Караоке" күркесі:

Фото © Tengrinews.kz / Юлия Колмогорова

Бос жолдар мен жабық павильондар:

Фото © Tengrinews.kz / Юлия Колмогорова

Фото © Tengrinews.kz / Юлия Колмогорова

Ешкім балмұздақ сатып жатқан жоқ, мангал да жағылмаған:

Фото © Tengrinews.kz / Юлия Колмогорова

Саябақтың орталық шағын алаңындағы сахнада да ешкім өнер көрсетіп жатқан жоқ:

Фото © Tengrinews.kz / Юлия Колмогорова

Тек кішкентай пойыз бос тұрмады: ол бар күшімен түрлі-түсті шамдарын жағып, жұртты көңіл көтеруге шақырды. Бірақ ешкім келмеді:

Фото © Tengrinews.kz / Юлия Колмогорова

Бәлкім, Есік тұрғындары көп жұмыс істейтіндіктен, кешкісін саябаққа баруға шамасы жетпейтін шығар немесе бұл жерді расында жаңарту керек. 

Есіктегі баға 

Иринамен сөйлескен соң, біз жергілікті сауда орындарын аралап көруді ұйғардық. Есікте көбінесе осындай аралас сауда үйлері кездеседі. Онда бәрі бір жерде сатылады: азық-түлік те, киім-кешек те, дайын тағамдар да бар.

Фото © Tengrinews.kz / Юлия Колмогорова

Біз баға көрсеткіштерін суретке түсіріп алдық, оқырмандар Есіктегі баға мен өз қалаларындағы бағаны салыстырып көрсін. Суретке назар аударыңыз.

Бургерлерден бастайық: 

Фото © Tengrinews.kz / Юлия Колмогорова

Тәттілер:

Фото © Tengrinews.kz / Юлия Колмогорова

Ет - сиыр еті (3800 теңгеден де кездесті):

Фото © Tengrinews.kz / Юлия Колмогорова

Шымкенттің картобы неге екені белгісіз, Павлодардікінен әлдеқайда қымбат болып шықты. Бәлкім, жас картоп шығар.

Фото © Tengrinews.kz / Юлия Колмогорова

Сондай-ақ жеміс-жидекке қойылған мынадай өзіндік стилі бар баға көрсеткіштерін байқадық:

Фото © Tengrinews.kz / Юлия Колмогорова

Қаладағы қызықтар 

Соңында Есікті аралау барысында көзге түскен тағы бірнеше қызықты жайттарды жинақтадық. Олардың бәрі бірдей әсем абаттандыру туралы түсінікке сай келе бермейді, бірақ әрқайсысының өз ерекшелігі бар - қаланың қайталанбас бейнесі осындай ұсақ-түйектен құралады.

Сонымен, Есікте бізді кілеммен қапталған қоршаулар таңғалдырды.

Фото © Tengrinews.kz / Юлия Колмогорова

Қоғамдық көлік аялдамасына айналдырылған өрт сөндіру машинасының бөлшектері.

Фото © Tengrinews.kz / Юлия Колмогорова

Сәл ары барғанда, бұл Қазақстан ТЖМ-нің 30 жылдығына арналған тұтас инсталляция екенін түсіндік. Аялдамадан бөлек, мұнда өрт сөндіру шлангісі түріндегі субұрқақ пен ведомство логотипі бар алтыбұрышты аркалармен безендірілген мынадай жол бар:

ТЖМ жолы мен субұрқағы. Фото © Tengrinews.kz / Юлия Колмогорова

Көпқабатты үйлер мен муралдар

Айта кету керек, Есіктің негізгі бөлігін "жеке сектор" - бір қабатты жеке үйлер алып жатыр. Бірақ көпқабатты үйлер де кездеседі.

Бұл ауданға кіргенде бізді ең алдымен таңғалдырғаны: спутник табақшалардың көптігі. Мына бес қабатты үй ғарышпен байланыс орнатқандай әсер береді:

Фото © Tengrinews.kz / Юлия Колмогорова

Бәлкім, мұнда ғарыш әскерлері штабының қандай да бір филиалы орналасқан шығар:

Фото © Tengrinews.kz / Юлия Колмогорова

Айналада бірде-бір жанның болмауы жұмбақ әсерді күшейте түсті. Тек мынадай әдемі де ашық түсті муралда домбыра ұстаған Жамбыл Жабаев бейнеленген: 

Фото © Tengrinews.kz / Юлия Колмогорова

Ал үйді айналып өткенде екінші жағы әлдеқайда жайлы әрі адамдар тұратынын аңғартады, аулалары да күтілген:

Фото © Tengrinews.kz / Юлия Колмогорова

Тағы бір ауданда, қалалық саябаққа жақын жерде, заң мен тәртіп туралы муралды кездестірдік:

Фото © Tengrinews.kz / Юлия Колмогорова

Кофеханалар

Біз екі кофеханада болдық, екеуінде де дәмді кофе (Алматыдан кем емес), тамаша қызмет көрсету деңгейі мен жайлы атмосфераны байқадық. 

Солардың бірінде кофе стақанына мынадай сүйкімді мүсіншелер жабыстырып береді:

Фото © Tengrinews.kz / Юлия Колмогорова

Жалпы, Есік кофеханаларындағы қызметкерлер өте биязы әрі ілтипатты. 

Расында, біз осы сапарда кезіктірген қала тұрғындарының барлығы дерлік өте сыпайы және өмірге оң көзқараспен қарайтын жандар болып шықты.

Осымен бір күндік репортажымызды аяқтаймыз.

Кейбіреулер "ал Есік көлі мен қаланың танымал өндіріс орындары ше?" деуі мүмкін. Біріншіден, көл қала емес, және көптеген қазақстандық қалаға аялдамастан, тек жанынан өтіп бара жатып-ақ ол жерде болған. Ал өндіріс орындарына келетін болсақ - бұл жарнамалық материалға жатады, ал біздің мақаланың форматы басқа.

Әлбетте, біздің материал Есік қаласы бойынша толыққанды жолнұсқаушы болуға үміткер емес, алдымызға ондай мақсат та қойған жоқпыз. Бұл - шағын қалада өткен бір күн, мұнда дайын маршрутсыз, жай серуендеп, объективке іліккен жайттарға үңілу және жергілікті тұрғындармен тілдесу үшін барған тілшінің сырттай көзқарасы. Бұл жолы біз Есікті осындай кейіпте көрдік.

Егер Tengrinews.kz тілшісі сіздің де шағын қалаңызға барып, оны бүкіл Қазақстанға көрсеткенін қаласаңыз, бұл туралы пікір қалдыруды ұмытпаңыз.

Тағы оқыңыз: Астана маңындағы 20 жыл бұрын ештеңе болмаған ауыл: қазір тұрғындар қалай өмір сүріп жатыр?

Мұз дәуірінен аман қалған киелі ағаштар. Қазақстанның бірегей жеріне барып қайттық

Авторы: Юлия Колмогорова

Дайындаған: Айнұр Қапышова

Бізді Google-дың негізгі дереккөздер тізіміне қосыңыз

Қосу