AMANAT : Атырауда TURGYNDAR AMANATY жобасы аясында тұрғын үй коммуналдық шаруашылық саласын жаңғыртуға бағытталған нақты шаралар талқыланды

Атырау қаласындағы Салтанат сарайында «AMANAT» партиясының «TURGYNDAR AMANATY» жобасы аясында өңірлік форум-семинар өтті, – деп хабарлайды Aikyn.kz сайты.

Іс-шара тұрғын үй саласындағы өзекті мәселелерді жүйелі түрде талқылап, тұрғындардың тұрмысын жақсартуға бағытталған нақты шешімдер мен тетіктерді айқындауға арналды.

Форум жұмысына «AMANAT» партиясының Хатшысы Ержан Жылқыбаев, Атырау облысының әкімі Серік Шәпкенов, ҚР Парламенті Мәжілісінің депутаты, «AMANAT» партиясы фракциясының мүшесі Дүйсенбай Тұрғанов, облыс әкімінің орынбасары Қайрат Нұртаев, Атырау қаласының әкімі Шәкір Кейкін, сондай-ақ салалық сарапшылар және МИБ пен ПИК өкілдері қатысты.

Басқосудың негізгі мазмұнын айқындаған «AMANAT» партиясының Хатшысы Ержан Жылқыбаев бұл жобаның жай ғана кезекті бастама емес, көппәтерлі тұрғын үйлердегі басқару жүйесін жетілдіруге және қалалық ортаның қауіпсіз әрі жайлы болуын қамтамасыз етуге бағытталған нақты тетік екенін жеткізді. Оның айтуынша, бүгінгі міндет – мәселелерді тізбектеу емес, оларды шешудің нақты әрі жүйелі тәсілін қалыптастыру. Осы тұрғыда «TURGYNDAR AMANATY» жобасы азаматтардың өз үйін басқару ісіне белсенді қатысуына мүмкіндік беретін тиімді құралға айналуға тиіс.

«Жыл басынан бері осындай форум-семинарлар еліміздің 8 өңірінде – Қарағанды, Ақмола, Павлодар, Түркістан, Абай, Шығыс Қазақстан, Маңғыстау, Алматы облыстарында өтіп, өз тиімділігін көрсетті. Осы тәжірибені ескере отырып, бұл жұмысты Атырау облысында жалғастырып отырмыз. Себебі, МИБ пен ПИК төрағалары тұрғындардың нақты сұранысын біледі және олармен күн сайын өзара байланыс орнатады. Осы тұрғыда өңірдегі қысқа және ұзақ мерзімді мәселелерді жүйелі шешу үшін тұрғын үй басқарушыларының ұсыныстарын ескеру аса маңызды», – деді ол.

Партия Хатшысы жоба аясында нақты жүзеге асырылатын шараларды таныстырды. Атап айтқанда, МИБ пен ПИК төрағаларына арналған семинар ұйымдастыру, депутаттардың кері байланысын күшейту, сондай-ақ абаттандыру және жөндеу жұмыстарын әкімдікпен бірлесіп жоспарлау тетігін іске қосу көзделіп отыр. Бұдан бөлек «Халық қатысатын бюджет» бағдарламасы енгізіліп, «үздік аула» мен «Үздік МИБ, ПИК төрағасын» анықтайтын байқаулар өткізу және белсенді азаматтар арасынан кадрлық резерв қалыптастыру бағытында нақты жұмыстар жүргізілмек.

Өңір басшысы Серік Шәпкенов облыста көппәтерлі тұрғын үйлерді басқарудың тиімді моделін қалыптастыру, МИБ пен ПИК жұмысын жетілдіру және тұрғындармен кері байланысты күшейту – негізгі басымдықтардың бірі екенін атап өтті.

«Форум алаңы осы саладағы өзекті мәселені ашық талқылап, нақты шешім қабылдауға мүмкіндік береді. Бұл – Президент тапсырмаларын іске асыру жолындағы маңызды қадам. Алдағы уақытта инфрақұрылымды жаңғырту, аулаларды абаттандыру және тұрғындардың белсенділігін арттыру бағытындағы жұмыстар жалғасын табады», – деді Серік Шәпкенов.

Пленарлық отырыс барысында өңірдің даму қарқынына да ерекше назар аударылды. Кейінгі жылдары Атырау облысында әлеуметтік және инфрақұрылымдық бағытта ауқымды жұмыс атқарылған. Партияның сайлауалды бағдарламасы аясында 100-ден астам жаңа нысан іске қосылып, жүздеген отбасы жаңа баспанаға қол жеткізген. Сонымен қатар тұрғын үй қорын жаңғырту бағдарламасы аясында 70-тен астам көпқабатты үй күрделі жөндеуден өткен.

Дегенмен форум тек жетістіктерді тізбектеумен шектелген жоқ. Оның барысында саладағы қордаланған жүйелік мәселелер ашық айтылды. Халық қалаулысы Дүйсенбай Тұрғанов тұрғын үй-коммуналдық шаруашылық жүйесінде әлі де болса ашықтықтың жеткіліксіздігі, жауапкершіліктің нақты бөлінбеуі және тұрғындар мен басқарушы ұйымдар арасындағы түсініспеушілік сынды түйіткілдер бар екенін атап өтті. Оның сөзінше, қолға алынып жатқан заңнамалық өзгерістер осы олқылықтарды жоюға және ең бастысы шешім қабылдау процесінде меншік иелерінің рөлін күшейтуге бағытталған.

«Бұл реформадағы негізгі жаңашылдық – шешім қабылдау құқығын тұрғындардың өзіне беру. Яғни, енді әр үйдің тұрғындары басқару тәсілін өздері таңдап, тарифтерді бекітіп, қаржының қалай жұмсалып жатқанына бақылау орната алады. Қажет болған жағдайда басқарушы ұйымды ауыстыру мүмкіндігі де қарастырылған. Сонымен қатар қаржылық ашықтық қамтамасыз етіліп, барлық ақпарат тұрғындар үшін қолжетімді болады. Басқару жүйесіндегі кәсіби талаптар күшейтіліп, қаражатты мақсатсыз пайдалану мәселесі де реттеледі, ал тиімді жұмыс жүргізе білген ұйымдар мемлекеттік жаңғырту бағдарламаларына қатысу мүмкіндігін кеңейте түседі. Аталған шаралар тұрғын үй саласында тәртіп орнатып, әділ әрі ашық жүйе қалыптастыруға бағытталған», – деді ол.

Ол сондай-ақ ел бойынша коммуналдық инфрақұрылымды жаңғыртуға 1,7 трлн теңгеден астам қаражыландыру көлемі қарастырылғанын жеткізді. Дегенмен, жобаларды іске асыру қарқынының төмендігі, желілердің тозуы және деректердің нақтылығы секілді мәселелер әлі де өзекті екенін атап өтті.

Форум қорытындысы бойынша тұрғын үй-коммуналдық шаруашылық саласын дамыту, басқару тиімділігін арттыру және тұрғындармен байланысты күшейту бағытында нақты ұсыныстар мен бастамалар қалыптастырылды. Сонымен қатар «AMANAT» партиясының өңірлік филиалына МИБ пен ПИК төрағаларымен тиімді жұмыс жүргізу үшін «TURǴYNDAR AMANATY» жобасының фронт-офисін ашу тапсырылды.

Жиын соңында бірқатар белсенді азамат алғыс хаттармен марапатталып, партия қатарына салтанатты қабылдау рәсімі өтті.

Жалпы Атырауда өткен бұл форум маңызды бір үрдісті көрсетті: тұрғын үй-коммуналдық саласындағы өзгерістер енді тек жоғарыдан қабылданатын шешімдермен шектелмейді. Тұрғындардың өзі белсенді қатысатын, ашық әрі тиімді басқару жүйесін қалыптастыру – күн тәртібіндегі басты міндетке айналып отыр.