Әміре сахнаға шығады

Астана қаласы әкімдігінің Музыкалық жас көрермен театры 2025 жылдың 2 желтоқсанында Қ.Жүнісовтің «Әміре» музыкалық драмасының премьерасын ұсынады. Айтулы қойылым қазақтың біртуар әншісі Әміре Қашаубаевтың Париждегі дүниежүзілік «ЭКСПО» көрмесінде өнер көрсеткеніне 100 жыл толуына арналған, деп жазады Egemen.kz.

Әміре Қашаубаевтың шығармашылығы тек халық әншісі ретіндегі жетістіктерімен ғана емес, сонымен бірге қазақ кәсіби театрын дамытудағы рөлімен де маңызды. Драмаға біртуар әншінің өмір жолы, сахналық биографиясы мен музыкалық мұрасы арқау болған.

Музыкалық драма жанры арқылы сахнада ұлы тұлғаның өмірі мен шығармашылығы, ұлттық мәдениетіміздің асыл мұрасы көрерменге жаңа қырынан таныстырылады. Қоюшы-режиссер, Қазақстанның еңбек сіңірген қайраткері Асхат Маемировтың суреткерлік сараптауында сахна төріне шығатын қойылым – қазақ театрының жаңа тынысын сездіретін көркемдік тәжірибе десек, артық айтқандығымыз емес.

Спектакль тарихи шындық пен көркем ойды үйлестіреді. 1925 жылғы Париж көрмесінде ән шырқаған қазақтың алғашқы кәсіби әншісінің жетістігі сахна арқылы көрсетіледі. Бұл жерде өмір мен өнер, адамдық қасиет пен зұлмат заман арасындағы қақтығыстар драматургиялық тілмен терең бейнеленген. Әр сахналық көрініс көрерменді тек эмоциялық тәжірибеге жетелеп қана қоймай, ұлттық мәдениет пен тарихқа терең бойлауға шақырады.

Әміре Қашаубаев қазақ дәстүрлі ән өнерінде ұлы орындаушы ретінде есте қалды. Оның орындаушылық шеберлігі мен даусының терең мәні – халық әндерінің философиясын, ұлттық мінез-құлық пен рухани құндылықты жеткізудің бірегей құралы. Музыкалық драма жанры бұл мұраны сахнада жаңа бояумен көрсетіп, көрерменге естен кетпес әсер сыйлайды деп күтілуде.

Қойылымның көркемдік құрамы да назар аударуға тұрарлық. Оразалы Игілік Әміре бейнесінде терең психологизм мен эмоциялық шынайылықты жеткізеді. Костюм суретшісі Айдана Еңгебай мен жарық суретшісі Ермек Мұхтарұлының жұмысы сахналық атмосфераны толықтыра отырып, көркемдік әсерді күшейтеді. Дыбыс режиссері Мерген Ажбаевтың қолдауымен музыкалық көріністер тыңдаушыға шынайы әсер қалдырады.

Айтулы премьера – қазақ сахна өнерінде ұлы тұлғаның өмірі мен өнерін жаңаша ашып көрсетуге бағытталған маңызды мәдени оқиға. «Әміре» қойылымы көрерменді тек өнер әлеміне баурап қана қоймай, ұлттық мәдениетіміздің байлығын сезінуге, өткен мен бүгінді байланыстыруға мүмкіндік береді. Көрермен сахна тілі арқылы ұлы әншінің рухани мұрасын, сахнадағы шеберлігі мен ұлттық өнердің құндылығын терең түсінеді.