Анаға құрмет музейіне 100 жасаған мақташының жәдігерлері табысталды

Еңбек ардагері кезінде Қазақстан Жоғары Кеңесінің екі мәрте депутаты болған. 100 жасқа толуына 40 күн қалғанда өмірден озған.

— Анамыз 1924 жылы 8 наурызда өмірге келген. Ол былтыр 100 жасына 40 күн қалғанда өмірден озды. Анамның көйлегі, тігін машинасы, келі-келсабы сияқты ескінің көзі болған заттарын, 1958 жылдан бері анам туралы материал жариялаған газет-журнал қиындыларын, «Тыл ардагері» медалін «Анаға құрмет» музейіне тапсырдық, — деді Анна Құдиярова.

Фото: А. Құдиярованың жеке мұрағатынан

Айтуынша, Сәрсенкүл әже соғыс жылдары Ташкенттегі оқ шығаратын әскери зауытта жұмыс істеген.

— Ол бұл жұмысын «майданға қосқан үлесім» деп айтатын. Анам өжет, пысық қыз болған екен. Құдияр атам анамның пысықтығына қызығып, нағашы әжеме құда түсіп, анам Сәрсенкүл мен әкем Мергенбай сол кездің салтымен нан үзіп, отбасы құрыпты, — дейді Анна Құдиярова.

Фото: А. Құдиярованың жеке мұрағатынан

Сәрсенкүл Рыспекқызы 1958 жылы «Мақта өсірудің озаты» атанып, Алматы мен Мәскеуде өткен республикалық және бүкілодақтық озат мақташылар съезіне қатысқан. Сол шарада түскен суреті, оған сыйлаған тігін машинасы мен теледидар да «Анаға құрмет» музейіне табысталыпты.

Фото: А. Құдиярованың жеке мұрағатынан

Анна Құдиярова анасы осы ғасырда өмір кешсе, іскер ханымдардың қатарында жүретін еді деген ой айтып қалды.

— Қазіргі тілмен айтқанда, анам бизнеске бейім адам. Ол бай-ауқатты адамның қызы болған. Бала кезден молшылықта өскен. Бірақ Кеңес Одағы кезінде молшылықта өмір сүруге болмайтын. Тәуелсіздік алған жылдары ол қауын-қарбыз өсіріп, Ресейге сататын. Анам туралы естелік көп. Ол еңбекқорлықтың, қайсарлықтың символы. Өз заманында ерінбей еңбек етіп, ұрпағына үлгі бола білген тұлға, — деді Анна Құдиярова.

Фото: А. Құдиярованың жеке мұрағатынан

Айта кету керек «Анаға тағзым» музейінде 500-ге жуық құнды жәдігер сақтаулы тұр.

Бұған дейін елордадағы Ұлттық музей жанынан Реставрация орталығы құрылатынын жазған едік.