Ақмола облысында өндірісте жарақат алған жұмысшыға 3 млн теңге өтемақы өндірілді

Мемлекет басшысы Қасым-Жомарт Тоқаев құқық бұзушылықтың алдын алу, азаматтардың еңбек ету барысында қауіпсіздігін қамтамасыз ету және жұмыс берушілердің жауапкершілігін күшейту мәселелеріне ерекше назар аударып келеді. Осы бағыттағы тапсырмалардың нақты көрінісі сот тәжірибесінде де айқын байқалып жатыр, деп хабарлайды Egemen.kz. 

Ақмола облыстық сотында өндірістік жарақат алған жұмысшының пайдасына моральдық зиянды өндіру туралы азаматтық іс қаралды. Іс материалдарына сәйкес, слесарь-жөндеуші А. еңбек міндеттерін орындау кезінде өндірістік жарақат алған. Медициналық қорытындыға сай, оған бас және мойын тұсындағы сүйектердің сынуы диагнозы қойылып, үшінші топтағы мүгедектік белгіленген. Сонымен қатар, кәсіби еңбекке қабілеттілігін жоғалту деңгейі 55 пайыз деп танылған.

Жазатайым оқиға туралы актімен жұмыс берушінің кінәсі 100 пайыз екені анықталған. Бұл еңбек қауіпсіздігі талаптарының өрескел бұзылғанын көрсетеді. Жәбірленуші сотқа жүгініп, жұмыс берушіден төленбеген жалақы сомасын және моральдық зиянды өндіруді талап еткен. Бірінші сатыдағы сот талапты ішінара қанағаттандырып, жәбірленушінің пайдасына 3 миллион теңге көлемінде моральдық зиян өтемақысын өндіріп берді. Ал, жоғалтқан жалақы сомасын өндіру аннуитеттік сақтандыру шартына сәйкес жәбірленушіге 1 миллион теңге төленгеніне байланысты қанағаттандырылған жоқ.

Сонымен қатар, сот еңбек заңнамасының жұмыс беруші тарапынан бұзылғанын назарға алып, Мемлекеттік еңбек инспекциясы комитеті департаментінің атына жеке ұйғарым шығарды. Бұл шешім Мемлекет басшысы жүктеген алдын алу қағидатына сай, заң бұзушылықтарға жол берген субъектілердің жауапкершілігін арттыруға бағытталған.
Облыстық сот алқасының қаулысымен бірінші сатыдағы соттың шешімі өзгеріссіз қалдырылып, сот актісі заңды күшіне енді.

Айта кетейік, 2026 жылғы 6 қаңтарда Қостанай облысындағы шахтада жарылыс болып, жұмысшы жарақат алған еді.