Ақселеу турнирі мәресіне жетті

Л.Н.Гумилев атындағы Еуразия ұлттық университеті жанындағы Журналистика және әлеуметтік ғылымдар жоғары мектебінің ұйытқы болуымен жыл сайын ұйымдастырылатын бұл жарысты журналистер қауымы сағына күтеді. Бәйгенің өтетіні туралы хабар тарасымен дүбірге құлақ түрген жүйріктей өздерін жаратып, қаламын бір сәтке кийге айырбастап, доданың басталар сәтін тағатсыздана күтеді.

Бильярд турнирінің ашылу салтанатында Ақселеу Сейдімбектің үзеңгілес достары сөз алды. Қазақ руханиятының ақсақалы Қойшығара Салғара Ақселеудің тағылымды ғұмыры туралы мағыналы естеліктер айтса, классик жазушы Төлен Әбдік Ақселеудің қазақтың әдебиеті мен ғылымы, мәдениеті мен журналистикасының рухын тіктеуге бар ғұмырын бағыштағанын сөз етті. Сондай-ақ ұйымдастырушылар жарыс басында биыл алпыс жастың асқарына шыққан қаламгер, «Egemen Qazaqstan» газетінің бас редакторы Ғабит Мүсіреп пен белгілі фотограф Шүкір Шахайға шапан жауып, құрмет көрсетті. Тастаяқшылар сайысының бас төрешісі, әйгілі спорт журналисі Несіп Жүнісбай осымен он бесінші рет өткізіліп жатқан турнирдің тұрақты демеушісі Ақселеу ағамыздың інісі Асылхан Сейдімбекке алғыс айтып, ардақты тұлғаның атын ұрпақ жадында қалдыру мақсатында алдағы уақытта арнайы қор құрып, тұлғаның еңбектерін насихаттауға барша қаламгер атсалысуы керектігін тілге тиек етті. 

Жан алып, жан беріскен сайыста Қайрат Сақ – «Ең тәжірибелі ойыншы», Қайрат Мұсақұлов – «Ең мәдениетті ойыншы», Қойшыбай Есентаев – «Ең мәрт ойыншы», Айтмұхамбет Есдәулет – «Ешкімнің көңілін жықпаған ойыншы», Кенже Жұмағұлов – «Ең мерген ойыншы», Шархан Қазығұл – «Ең көңілді ойыншы», Еркін Қыдыр – «Ең ақылды ойыншы», Әлімжан Сабыржанұлы – «Ең сабырлы ойыншы»  атанып, арнайы жүлделермен марапатталды.

Турнир қорытындысында бірінші орынды «Айқын-Литер» ЖШС директоры, ақын Талғат Ешенұлы иеленді. Ал екінші орын «Қазақстан» ұлттық арнасының режиссері Асылхан Манаповқа бұйырса, үшінші орынды «Хабар» арнасының қызметкері Айдос Сиқымбаев қанжығасына байлады.