АҚШ пен Аустралия аса маңызды пайдалы қазбалар туралы келісімге қол қойды

АҚШ президенті Дональд Трамп Аустралия премьер-министрі Энтони Альбанезені Ақ үйде қабылдады. Тараптар аса маңызды минералдар мен сирек жер элементтері туралы мәселені талқылап, 4-5 айға созылған келіссөзден кейін келісімге келді.

Ақ үй басшысы Аустралиямен басқа да көптеген мәселе бойынша тығыз жұмыс істеп жатқанын атап өтті. 

– Шамамен бір жылдан кейін бізде аса маңызды минералдар мен сирек жер элементтері көп болатыны сонша, олармен не істеу керектігін білмейсіз, - деді ол. 

Аустралия премьер-министрі Альбанезе өз кезегінде олар екі ел арасындағы жақсы қарым-қатынастарды нығайту үшін барлық мүмкіндікті пайдалана беретінін атап өтті. Сондай-ақ аса маңызды пайдалы қазбалар мен сирек жер элементтері туралы бүгінгі келісімнің қарым-қатынасты жаңа деңгейге көтеретінін жеткізді. Ол сонымен қатар келісімнің 8,5 млрд долларды құрайтын іске асыруға дайын бағдарлама екенін тілге тиек етті. 

Келіссөз қорытындысы бойынша екі ел басшылары аса маңызды пайдалы қазбалар мен сирек жер элементтері туралы келісімге қол қойды.

Алдағы жарты жылда екі ел аса маңызды минералдар өндіру жобаларына 3 млрд доллардан астам инвестиция салуды жоспарлап отыр. Бұл жобаларда қалпына келтірілетін ресурстар құны 53 млрд долларға бағаланады.

АҚШ Қорғаныс министрлігі Батыс Аустралиядағы қуаттылығы жылына 100 метрикалық тоннаны құрайтын заманауи галлий өңдеу зауытына инвестиция салады. Ол елдің аса маңызды минералды өңдеуде өзін-өзі қамтамасыз ету мүмкіндігін одан ары арттырып отыр. 

Бұған дейін Қытай сирек жер элементтері технологияларына экспорттық бақылауды күшейтетінін хабарлаған болатынбыз.