АҚШ та екі қазақстандыққа ірі алаяқтық бабы бойынша айып тағылды

АҚШ-та Қазақстанның екі азаматына қатысты ірі көлемдегі алаяқтық ісі бойынша ресми айып тағылды, – деп хабарлайды Aikyn.kz сайты. 

Чикаго қаласының федералды прокурорлары Әнуар Абдрахманов пен Таир Смағұлды Medicare мемлекеттік бағдарламасы мен АҚШ-тың жеке сақтандыру компанияларын алдады деп айыптап отыр.

Тергеу деректеріне сәйкес, айыпталушылар бақылауындағы компаниялар арқылы пациенттерге шын мәнінде жеткізілмеген медициналық жабдықтар үшін сақтандыру ұйымдарына жалған шоттар ұсынылған. Осылайша, олардың әрекетінің нәтижесінде келтірілген шығын көлемі 1 миллиард АҚШ долларынан асып кеткен.

Айыптау нұсқасында Әнуар Абдрахманов Кентукки штатында тіркелген компанияны басқарғаны және осы компания атынан шамамен 666 миллион доллар көлемінде өтінім бергені көрсетілген. Ал Таир Смағұл Коннектикут штатындағы компания арқылы 953 миллион долларға жуық сақтандыру талаптарын жолдаған.

АҚШ заңнамасына сәйкес, аталған қылмыстар дәлелденген жағдайда айыпталушыларды 20 жылдан 30 жылға дейін бас бостандығынан айыру жазасы күтуі мүмкін. Сонымен қатар олардың активі тәркіленіп, мемлекетке және жәбірленуші тараптарға келтірілген залалды өтеу міндеттелуі ықтимал.

Қазіргі таңда іс сотқа дайындық сатысында, тергеу амалдары жалғасып жатыр. Айыпталушылардың кінәсі сот үкімі шыққанға дейін дәлелденбеген болып есептеледі.