Ақтауда жазғы кептелістердің негізгі себебі табылды

Жаз мезгілінде Ақтауда көлік жүктемесі айтарлықтай артты. Әсіресе бұл курорттық аймақ бағытындағы жолдарға қатысты, деп хабарлайды Tengri Auto Sergek ITS деректеріне сілтеме жасап.

Жүйе мәліметінше, қыста курорттық аймаққа орта есеппен тәулігіне 1,2 мыңға жуық автомобиль кіреді. Жазда бұл көрсеткіш 6,3 мыңға дейін өседі. Демалыс күндері сапарлар саны тәулігіне 12,2 мыңға жетеді, бұл жұмыс күндерімен салыстырғанда екі есеге жуық көп.

Жолдардағы көлік саны

Мамандар 2025 жылдың тамызынан 2026 жылдың шілдесіне дейінгі Ақтаудағы көлік жағдайына талдау жасады: көлік ағынын, қозғалыс жылдамдығын, көліктердің қайдан келетінін және ең танымал бағыттарды зерттеді.

Нәтижесінде мынадай қорытынды жасалды: жазғы уақытта Ақтау жолдарында кептеліс көбейеді. Күн сайын қалада 84 мыңға жуық бірегей автомобиль тіркеледі.

Салыстырмалы түрде алсақ, қыста олардың саны шамамен 79 мың болса, қаңтарда 77 мыңға дейін түседі.

Жазда орташа сапар саны тәулігіне 231 мыңға жетеді. Бұл қысқы көрсеткіштен 14 пайызға артық. Автомобильдердің тәуліктік жүрісі шамамен 2,55 миллион шақырым болады, бұл қысқы көрсеткіштен 500 мың шақырымға көп.

Қарбалас уақыт

Кешкі қарбалас уақыт та өзгерді. Жазда ең үлкен жүктеме сағат 19:00-ден 21:00-ге дейінгі кезеңге сай келеді. Sergek Group мұны жағалауға бағытталған сапарлар санының артуымен байланыстырады.

Көліктер қайдан келеді?

Жазда Ақтауда өзге өңірлерден келетін көліктер де көбейеді. Sergek ITS мәліметінше, әрбір оныншы автомобиль дерлік басқа қаладан келген көлік саналады.

Атырау облысынан келетін көліктер саны шамамен 70 пайызға, Ақтөбе облысынан - 44 пайызға, Батыс Қазақстан облысынан - 30 пайызға артады. Сондай-ақ ресейлік нөмірлі көліктер 21 пайызға көбейеді.

Бұл ретте жүктеме өсімі қала бойынша біркелкі емес. Ең айтарлықтай өзгерістер курорттық аймаққа баратын жолдарда байқалады. Қалалық магистральдардың көбінде қозғалыс қарқындылығының маусымдық өзгерісі шамамен 10 пайыз.

Қазақстандағы ең көп жүктеме түсетін тасжолдар

Бұған дейін қазақстандық жүргізушілер арасындағы ең танымал бағыттардың бірі Алматы - Қонаев тасжолы болып қала беретінін жазған болатынбыз. Жыл басынан бері бұл учаскеде 4,3 миллионнан аса көлік жүрісі тіркелген.

Ең көп жүктеме түсетін жолдар қатарына мыналар да енді:

Шымкент - Өзбекстан шекарасы - 3,7 миллион рет өту; Шымкент - Тараз - 2,5 миллион; Тараз - Қайнар - 2,1 миллион; Шымкент - Қызылорда - 1,8 миллион; Қонаев - Талдықорған - 1,4 миллион; Астана - Теміртау - 1,4 миллион; Астана - Щучинск - 1,3 миллионнан астам; Таразды айналып өту жолы - 1,03 миллион; Алматы - Қорғас - 1,005 миллион.

Көлік ағынының өсуі демалыс кезеңіне де сәйкес келеді. Көлік министрлігі бұған дейін жүргізушілерге жылдамдық режимін сақтауды, абайлап басып озуды және шаршаған күйде рөлге отырмауды ескерткен болатын.

2026 жылдың бірінші жартыжылдығындағы мәліметтерге сәйкес, республикалық тасжолдардағы ЖКО саны 9 пайызға - - 1 507-ден 1 371 жағдайға дейін азайған. Осы кезеңде тасжолдармен барлығы 22,3 миллион автокөлік жүріп өткен, бұл бір жыл бұрынғы көрсеткіштен 37 пайызға көп.

Google News арқылы жаңалықтарымызды қадағалаңыз

Жазылу