Ақтөбе Лаэти ашық аспан астындағы музейге айналады: 600 млн теңгеден астам қаржы бөлінді

Атырау облысында ежелгі Ақтөбе-Лаэти қалашығын ашық аспан астындағы музейге айналдыру жобасын жүзеге асыратын мердігер компания анықталды. Археологиялық ескерткіш Теңдік (қазіргі Томарлы) ауылы маңында, Жұлдыз-3 ықшамауданының жанында орналасқан.

Жоба аясында әкімшілік ғимарат, ангар, садақ ату алаңы салынып, аумақ абаттандырылып, көгалдандырылады. 

Сонымен қатар, кең көлемді ғылыми-зерттеу жұмыстары жүргізіледі. Тоғыз ай бойы мамандар көне қалашықты жүйелі түрде зерттеп, қалпына келтіріп, тарихи құндылығын сақтап, келушілерге қолжетімді етуді мақсат етеді.

29 қазанда Атырау облысы мәдениет және тілдерді дамыту басқармасының басшысы Әбіл Жоламановтың жетекшілігімен «Жалынды құрылыс» ЖШС-мен келісімшарт жасалды. Компанияның директоры — Ғалымжан Халел. Келісімшарттың жалпы құны (ҚҚС-сыз) 606 миллион 320 мың теңге. Ал жобаның бастапқы жоспарланған сомасы — 618 миллион 694 мың теңге болған.

Қаржыландыру жергілікті бюджет есебінен, «Тарихи-мәдени мұраны сақтау және оған қолжетімділікті қамтамасыз ету» бағдарламасы бойынша жүзеге асырылады. Жобаны іске асыру мерзімі 2026 жылдың соңына дейін жоспарланған.

Қазан айының басында өткен таныстырылым кезінде Х. Досмұхамедов атындағы Атырау университетінің аға оқытушысы, археолог Амангелді Зайнов өткен маусымдағы қазба жұмыстарының нәтижелерін ұсынды. Оның айтуынша, табылған жәдігерлердің басым бөлігі қыштан жасалған ыдыстар — азық-түлік сақтауға арналған ірі хумдар. Сондай-ақ, XIII ғасырдың екінші жартысына жататын Алтын Орда дәуірінің күміс теңгелердің де ғылыми маңызы зор.

Ақтөбе-Лаэти қалашығын ашық аспан астындағы музейге айналдыру жобасы — өңірдің мәдени мұрасын сақтау мен Каспий маңы тарихына туристердің қызығушылығын арттыру бағытындағы маңызды қадам болып саналады.

Айнұр САПАРОВА

Бүгін, 11:37