Ақтөбе облысында үлескерлер 6 млрд теңге шығынға батқан

АЛМАТЫ, 31 қазан – Sputnik. Ақтөбе облысында құрылыс салушылардан 797 адам зардап шекті, деп хабарлайды облыстық прокуратура.

Өңірде барлығы 12 проблемалық үлестік құрылыс нысаны анықталған. Салдарынан 797 адам зардап шекті, залал 6,1 млрд теңге.

"АлашОрда-1" тұрғын үй кешені мен "Aviator Premium" ТК құрылыс салушылары алаяқтық жолмен 200-ден астам үлескердің қаражатын тартып, 1,8 млрд теңгеден астам сомада зиян келтірген", - деп жазылған хабарламада.

Биыл 7 бірдей құрылыс компаниясының басшылары 11 нысан бойынша қылмыстық жауапқа тартылды.

"Safina.kz" ТҚК және "СтройСервисРегион" ТК құрылыс салушылары 300-ден астам үлескердің ақшасын алаяқтық жолмен иемденген. Олар 10 жылға бас бостандығынан айырылды", - дейді прокуратура.

Прокуратура органдары азаматтық тәртіпте 413 үлескердің мүддесінде 8 талап-арыз беріп, тұрғын үй сату-сатып алу шарттарын жарамсыз деп танып, мүлікті қайтару туралы талап қойған.

6 талап-арыз бойынша 285 үлескердің мүддесі қорғалды, ал 3 нысан бойынша 128 үлескердің ісі сот қарауында.