Ақтөбе облысының 500 ден астам тұрғыны кәсіп ашу үшін грант алды

Биыл Ақтөбе облысының 500-ден астам тұрғыны кәсіп ашу үшін грант алды. Мемлекеттік қолдаудың бұл түрін әлеуметтік осал санаттағы азаматтар ие болды. Олар берілген қаражатқа кондитерлік цех, автокөлік жөндеу бекеттері және тігін шеберханаларына қажетті жабдықтар сатып алып жатыр.

Саламат Сламов 10 жыл бойы сымтемірден тор өреді. Алайда тиісті құрал-сайманның жоқтығынан тек шарбаққа арналған тор тоқып келді. Ал биыл 1,5 млн-нан астам теңге қайтарымсыз грантқа бірнеше дәнекерлеу станогын сатып алды. 

Саламат Сламов, кәсіпкер:

- Әр станок әр түрлі шығарады. Мысалы двухконтактный станок күніне 300 тор  шығарады. Үлкен тордан да 300 тор шығаруға болады. Жалпы сұраныс бар, тапсырыс бар. Бұл қалау жұмыстарына арналған тор кез келген құрылыс нысанында пайдаланылады. Балабақша, мектеп, аурухана, тұрғын үй құрылыстарында көптен пайдаланылады. 

Апатқа ұшыраған көліктерді қайта жөндеп, мұнтаздай етіп бояйтын шебер Серік Қонысбеков те кәсіпкер атанды. Мемлекеттік бағдарлама аясында бөлінген  қайтарымсыз грантты қажетті құрал-жабдықтарға жұмсады. 

Серік Қонысбеков, кәсіпкер:

- Жұмысым өте жеңілдеді. Бұрын бір машина біраз уақыт жасалатын еді. Қазір 2-3 күн уақыт кетсе, бұрын бір жеті уақыт алатын. 10 күндей уақыт кететін болған. Қазіргі таңда біраз жұмыс жеңілдеді. Жұмыстың көлемі ұлғайды.

Мемлекеттік гранттан үмітті жандардың бәрі кәсіпкерліктің негізін тегін курстарда үйренеді. Олар бизнес-жоба құру, құжат рәсімдеу, қаржы мен салық саласынан хабардар болуы тиіс. Себебі үкіметтен бөлінетін қаражат қайтарымсыз болғанымен жауапкершілігі де жоқ емес. 

Венера Орымбаева, Еңбек мобильділігі орталығының директоры:

- Үкімет тарапынан беріліп жатқан ақша міндетті түрде тексеріледі. Ақша берілгеннен кейін үш айдан кейін міндетті түрде мониторинг бір жыл бойы жүргізіледі. Қаржыны мақсатсыз жұмсаған жағдайда акт жасалып сот шешімі арқылы үкіметке қайтарылады.

Биыл мемлекеттік гранттардың басым бөлігі әлеуметтік осал топтағы жандарға бұйырды. Бұл мақсатта бюджеттен 891 млн теңге бөлінді. 

Авторлары: Мансұр Есқожин, Айнадин Молдабеков, Айбек Даутов