Ақтөбеде мұғалім сотталды

АЛМАТЫ, 10 қараша – Sputnik. Ақтөбеде алаяқ мұғалім сотталды, деп хабарлайды Ақтөбе қаласының №2 сотының баспасөз қызметі.

Алаяқ деп танылған мұғалім жекеменшік мектепте бастауыш сыныптан сабақ берген. Танысының баласын мектепке орналастырып, ай сайынғы оқу ақысын жеңілдікпен 60 000 теңге мөлшерінде төлеуді ұсынған.

"Кейін сотталушы жәбірленушінің баласы арқылы білім беру қызметі туралы шартқа жәбірленушіге қол қойдырған. Бірақ ол шартты мектеп әкімшілігіне тапсырмай, баланың сыныпта заңсыз оқып жүргені туралы деректі жасырған", - дейді ведомство.

Алаяқ мұғалім оқушының ата-анасынан 420 000 теңге иемденіп, оны жеке қажетіне жұмсаған. Сотталушы өзінің кінәсін толық мойындаған.

Сот үкімімен ол Қылмыстық кодекстің 190-бабының 1-бөлігі бойынша кінәлі деп танылды. Алайда жәбірленушімен татуласқандықтан қылмыстық жауаптан босатылды.

Сот үкімі заңды күшіне енді.