Ақтөбеде оқу орны Миннесота университетімен бірлескен жобаны қолға алды

Жуырда Қ.Жұбанов атындағы Ақтөбе өңірлік университетінде АҚШ-тың Миннесота университетімен бірлескен «Халықаралық зерттеу құзыреттіліктерін дамыту орталығы» ашылады.

Ұлттық статистика бюросының деректеріне сәйкес, еліміздегі университеттерде әлеуметтік және гуманитарлық ғылымдар бағыттары бойынша докторлық диссертацияны сәтті қорғау көрсеткіші әлі де төмен деңгейде қалып отыр.

Университет ректоры Лаура Қарабасованың айтуынша, докторанттар арасында жүргізілген зерттеулер көрсеткендей, ғылыми журналдарда мақала жариялау қиындықтары, соның ішінде академиялық жазу мен зерттеу этикасы дағдыларының жеткілікті қалыптаспауынан туындайды. Сонымен қатар жас ғалымдарға жетекшілік ететін профессор-оқытушылардың халықаралық ғылыми ортаға кірудегі кедергілері, беделді журналдарда жариялану тәжірибесінің аздығы және шетелдік консультанттармен бірлесе жұмыс істеу шектеулері де жиі айтылып жатыр.

«Заманауи зерттеу әдіснамасын, статистикалық талдау бағдарламаларын және ғылыми құралдарды меңгеру тұрғысынан әлсіз тұстарымыз бар екені рас. Былтыр біз АҚШ-тағы Миннесота университетімен бірлесіп, әлеуметтік-гуманитарлық саладағы зерттеушілердің қиындықтарын зерделей бастадық. Бұл жұмыс нәтижелері зерттеушілердің әдіснамалық дайындығын күшейту мен жүйелі институционалдық қолдаудың маңызын нақты көрсетті», деп атап өтті ректор.

Миннесота университеті – әлемдік беделге ие жоғары оқу орны. Times Higher Education рейтингінде университет 88-орында, ал Миннесота университетінің Білім және адам дамуы колледжі (CEHD) 2025 жылғы пәндік рейтингте «Білім беру» саласы бойынша 70-орынды иеленді. QS World University Rankings by Subject 2025 мәліметі бойынша университет «Білім беру және даярлық» (Education & Training) бағыты бойынша әлемде 53-орында, U.S. News & World Report дерегі бойынша АҚШ-тағы үздік білім беру мектептері рейтингінде 255 оқу орнының ішінде 24-орында тұр.

«Миннесотамен байланысым алты жыл бұрын, зерттеуші ретінде жұмыс істеген кезімде басталды. Сол уақытта Білім және адами даму колледжінің бір топ профессорымен бірлескен жобада еңбек еттік. Кейін Ақтөбеге ректор болып келгенде, осы ынтымақтастықты кеңейту бастамасын көтердім. Нәтижесінде профессор Баскар Упудиай бірнеше рет келіп, Жұбанов университетінің оқытушыларына зерттеушіге қажет дағдылар бойынша семинарлар өткізді. Кейін «Болашақ» бағдарламасы бойынша ғалымдарымыз тағылымдамаға бара бастады. Осылайша, екі университет арасындағы ынтымақтастықтың берік іргетасы қаланды», дейді Л.Қарабасова.

Университет басшысы АҚШ-қа сапары барысында Миннесота университетінің ғылыми зерттеулер және инновациялар жөніндегі вице-президенті Шашанк Прия мырзамен және Білім және адам дамуы колледжінің деканы, Кампбелл білім беру және адам дамуы саласындағы көшбасшылық бөлімінің жетекшісі Майкл Родригеспен кездесіп, бір жылдық дайындық жұмыстарының нәтижесінде маңызды келісімге қол жеткізген.

Бұл орталық тек Жұбанов зерттеушілеріне ғана емес, отандық ғалымдар мен оқытушыларға арналған жаңа мүмкіндіктер алаңы болмақ. Ол ең алдымен магистранттар мен докторанттарға сабақ беретін профессорлық-оқытушылық құрамның біліктілігін арттыруға және халықаралық зерттеу дағдыларын дамытуға бағытталады.