Ақтөбеде тұтынушылар шағымынан соң 100 млн теңге кері қайтарылды

Ақтөбеде тұтынушылар өз құқығын қорғау үшін арнайы органдарға жиі жүгіне бастады. 2024 жылы 1400-ге жуық адам шағым түсірсе, 2025 жылы 2 мыңға жуықтап, өсім 38% құрады. Нәтижесінде тұтынушылар 100 млн теңгені кері қайтарып алды.

— Шағымның басым бөлігі бөлшек сауда саласына тиесілі. Көбіне тауарды қайтару, алмастырудан бас тартып жатады. Сонымен бірге сапасы сын көтермей, шағым түсіреді. Электронды сауда саласына қатысты 363 өтініш түсті. Мұнда тауар сипаттамаға сай келмейді, сатушы туралы ақпарат жоқ және ақшаны кері қайтармай, әбігерге салады. Өңірде жиһаз дайындау және оны жөндеу, құрылыс, сұлулық салондары мен тұрмыстық қызмет көрсету сапасына қатысты 400-ге жуық сұрақ түсті, — деп хабарлады облыстық сауда және тұтынушылардың құқықтарын қорғау департаменті.

Былтыр сапалы қызмет көрсете алмаған кәсіпкерлер де әкімшілік жауапқа тартылды. Оларға 2,2 млн теңге айыппұл салынды. Сонымен бірге сот арқылы 40 млн теңге өндірілді.

— Тұтынушылар онлайн сауда жасайды, Instagram желісі арқылы тапсырыс береді. Дәл осы тұста олардың құқығы жиі бұзылады. Көп жағдайда тұтынушылар тауарға тапсырыс бергенде сатушының мекенжайы мен байланыс телефонын білмейді. Салдарынан тауар сапасы сын көтермейді немесе оны қайтару қиынға соғады, — деп хабарлады облыстық сауда және тұтынушылардың құқықтарын қорғау департаменті.

Айта кетейік, 2025 жылы тұтынушылардан түскен өтініштер саны 134 пайызға артқан. Қабылданған шаралардың нәтижесінде тұтынушыларға 2,804 млрд теңге қайтарылды, бұл өткен жылмен салыстырғанда 135,6 пайыздық өсімді көрсетеді.