Арменияда билікке талас күшейді: Бұрынғы президент үлкен саясатқа қайта келді

Арменияда алдағы парламенттік сайлау қарсаңында оппозициялық күштер бірігіп, ортақ кандидат ұсынды. "Айастан" блогы премьер-министр қызметіне елдің бұрынғы президенті Роберт Кочарянды үміткер ретінде жариялады, деп хабарлайды Arasha.kz.

Кандидаттың есімі Еревандағы Карен Демирчян атындағы спорт-көрме кешенінде өткен жабық форматтағы жиында белгілі болды. Сонымен қатар блоктың сайлауалды ұраны да таныстырылды – "Бірге біз қолымыздан бәрін келтіреміз".

Жиын барысында "Айастан" фракциясының депутаты, АРФ "Дашнакцутюн" жоғарғы органының өкілі Ишхан Сагателян олардың қатарына жаңа саяси күштер қосылғанын мәлімдеді. Оның айтуынша, "Вперёд" партиясы да блокты қолдайтынын білдірген.

Сагателян оппозиция ішінде қарсылас жоқ екенін атап өтіп, басты мақсат қазіргі билікке қарсы тұру екенін жеткізді.

"Біздің бір ғана нысанамыз бар – қазіргі билік. Оппозициядағы әріптестерімізден де осындай ұстаным күтеміз", – деді ол.

Сонымен қатар, сарапшылар Кочарянның саяси бағытына назар аударып отыр. Ол Ресейге жақын саясаткер ретінде белгілі. Мәліметтерге сәйкес, соңғы бір жылда ол Мәскеуге бірнеше рет барып, алдағы саяси жоспарларын талқылаған.

Кей дереккөздерде Кочарянды біріккен оппозиция атынан ұсыну идеясы Ресей президенті әкімшілігінің Оңтүстік Кавказға жауапты өкілі Сергей Кириенконың бастамасымен жүзеге асқаны айтылады. Бұған дейін оппозиция Пашинянға импичмент жариялауға тырысқанымен, парламентте жеткілікті дауыс жинай алмаған.

Айта кетейік, Арменияда Ұлттық жиналысқа кезекті сайлау 2026 жылдың 7 маусымына жоспарланған. Сайлауға билік басындағы "Азаматтық келісім" партиясымен қатар, бірнеше саяси күш қатысатынын мәлімдеген.

Осылайша, алдағы сайлау Армениядағы саяси күштердің жаңа тартысына жол ашып, елдің болашақ бағытын айқындайтын маңызды кезең болмақ.