Арыс ауруханасында шу шықты: Дәрігер ұйықтап жатқанда, бала өліп қала жаздады

Арыстағы жергілікті аурухана төңірегінде дау туындады. Төрт жасар Әлирахман Сейітханның ата-анасы балаларының комаға түсуіне кезекші дәрігердің салғырттығы себеп болды деп отыр. Олардың айтуынша, дәрігер бала тырысып, өлім аузында жатқанда ұйықтап жатқан, деп хабарлайды Arasha.kz.

Арыс тұрғыны Ұлжалғас Жүзейдің айтуынша, бір апта бұрын баласы аздап қызу болып үйге келген. Түнгі үштер шамасында оның денесін қатты тырысулар қыса бастаған. Қорыққан ата-ана жедел жәрдем шақырып, баланы ауруханаға жеткізеді.

«Мейірбике кезекші дәрігерді оята алмай, біз алты сағат бойы күтіп отырдық. Баламның жағдайы нашарлай берді, бірақ ешкім көмек көрсетпеді. Егер дер кезінде қарағанында, мүмкін, комаға түспес еді», — дейді анасы.

Бала әкесi Муажхан Мауытов та жағдайды баяндады:
«Мейірбике бізді қабылдады, бірақ үйге қайтарып жібермек болды. Қайта тырысу басталғанда дәрігерді шақырдық, бірақ ол келмеді. Кейін медбике үш рет оятуға тырысқанын айтты. Бұл — нағыз немқұрайдылық. Балам қазір комада жатыр».

Баланы тек таңғы тоғызда, кезекші ауысқан соң ғана қарапты. Сол кезде ол есінен танып қалған. Содан бері комада.

Анасының айтуынша, дәрігерлер әлі күнге дейін нақты диагноз қоя алмаған.
«Бізге үнемі „жағдайы ауыр“ дейді. Ешқандай талдау жасалмаған, қажетті аппараттар жоқ. Тек дүйсенбіден бастап қана бірдеңе істей бастады».

Белгілі болғандай, Арыс ауруханасында МРТ да, компьютерлік томограф та жоқ. Сондықтан нақты диагноз қою мүмкін емес. Ал баланы облыс орталығына апаруға дәрігерлер қорқады — жолды көтере алмай қалуы мүмкін дейді.

Аурухананың бас дәрігері Марат Төлегенов болса, ата-ананың нұсқасымен келіспейді.
«Сол түні бізде 35 науқас болды. „Дәрігер алты сағат ұйықтады“ деген сөз шындыққа жанаспайды. Кезекші дәрігер басқа науқастарды қарап жүргенін айтты. Қазір қызметтік тексеріс жүріп жатыр», — деді ол.

Кішкентай Әлирахман бір аптадан бері өмір мен өлім арасында жатыр. Дәрігерлер түрлі болжам айтады: бірде «миға қан құйылған» дейді, бірде «инфекция» деп отыр. Ал ата-анасы Денсаулық сақтау министрлігінен араласуды және кінәлілерді жазалауды сұрап отыр.

Бұған дейін Жамбыл облысында алты жасар бала да ауруханада кенеттен көз жұмған еді. Ол 29 қыркүйектен бері өзін жайсыз сезінгенімен, дәрігерлер оған еш көмек көрсетпеген.