Бала қайда құлады? Атыраудағы балабақшадан шу шықты

АЛМАТЫ, 9 қараша – Sputnik. Атырау қаласында Береке ықшам ауданында орналасқан балабақшалардың бірінен шу шықты. Бес ай бойы басылмаған даудың мән-жайын Sputnik Қазақстан тілшісі білді.

Бұл мәселе туралы жергілікті блогер Рүстем Баязиев әлеуметтік желідегі парақшасында жазды. Оған "Береке" балабақшасына баласы баратын әйел шағым айтқан. Тұрғынның сөзіне қарағанда бала балабақшада құлап, басынан зақым алған. Ата-ана әу баста білмеген, басы ауыра берген соң баланы ауруханаға апарғанда басында қан ұйығаны белгілі болған.

"Ауруханада баланың басына күрделі ота жасайды. Балабақша камерасын тексерткенде камера жұмыс істемейтін болып шыққан. Анасы полицияға арызданып, қылмыстық іс ашылған. Бірақ екі ай бойы тып-тыныш, анасы бұл әрекетке алаңдаулы", - дейді Рүстем Баязиев.

Sputnik Қазақстан тілшісі басынан жарақат алды деген бес жастағы баланың тәрбиешісінен сұхбат алмақ болды, бірақ тәрбиеші емес, тәрбиешінің анасы жауап берді. Айтуынша, қызының қан қысымы көтеріліп, осы жағдайдан кейін денсаулығы күрт нашарлап кеткен.

"Қызым күйзеліске түсіп, қатты ауырып жатыр. Қызымның еңбегі ақ, Құдай көріп тұр ғой. Қандай тәрбиеші басына бәле іздеп, баланы ұрады. Ешқандай дәлелсіз адамға солай жала жабуға бола ма? Оң-солын ажыратпай блогер жалған ақпарат таратқан. Баланы үш жаста деген, бала бес жаста. Ол мықты блогер болса, неге дұрыстап анықтамайды, неге оқиға орнына, неге полицияға барып анықтамайды. Халықтың қамын ойлаған адам солай жасай ма?", - дейді тәрбиешінің анасы.

Оқиғаның мән-жайын атын айтудан бас тартқан басқа тәрбиеші баяндап берді. Айтуынша, бала мінез-құлқы тыныш, айтқанды орындайтын, тәртіпті бала. Балабақшада ойнап жүріп оқыс қимыл жасайтын бала емес.

"Бала балабақшаға келгенде бұрыңғыдай ойнап, балалармен араласа қоймаған. Басым ауырды дей берген. Сосын мейірбикеге қаратып, кейіннен ата-анасына хабарласып айтылған. Сол сәтте қарап жүрген тәрбиеші оқуды жаңа бітіріп келген жас маман, осы жағдайдан қорқып, қазір тіпті ауырып қалды", - дейді Айнұр есімді тәрбиеші.

Балабақшаның жеке чатында баланың аулада ойнап жүріп құлағаны белгілі болған. Ол туралы ата-аналардың бірі ортақ чатқа салып жіберген.

"Баланың басындағы қанды ісік биіктіктен құлап алған жарақат сияқты. Жерге жай ғана құласа, ондай жарақат алмайды. Баланың аулада құлағаны туралы жазбаны бізге бір ата-ана скрин жасап жіберді. Онда бір ата-ана құлаған баланың анасына "Исламның мамасы, балаңыз қалай жақсы ма? Ясмина балаңыздың құлағанын көріпті. Ислам жылап кетіп қалды деп айтты" деп жазған. Бала үйінде аулада құлаған болуы керек, бірақ баланы балабақшаға алып келген. Мүмкін ата-анасы да баласының аулада қатты құлағанын білмеген болуы керек", - дейді тәрбиеші.

Балабақшаға келген бала басының ауырғанына шағымданған. Тәрбиешілер анасын шақырады, кейіннен баланың басына қан ұйығаны белгілі болады.

Тәрбиешілердің айтуынша, ғимаратта бейнекамералар болған. Баланың қасынан өтіп бара жатып, жерден бір зат алсаң да камералар өте бір дөрекі қылық сияқты көрсетеді, дейді олар.

"Сол себепті біз үнемі абайлауға тырысамыз, ал балаға қолымыздың ұшын да тигізбейміз. Бұл туралы күнделікті басшылық айтып отырады", - дейді Айнұр.

Оқиға туралы Sputnik Қазақстан тілшісі Атырау облыстық білім басқармасынан сұрап көрді.

"Бұл дерек Атырау қаласы №2 қалалық полиция бөлімінде тіркелген. Қылмыстық Кодекстің 141-бабы 1-бөлігі "Балалардың өмірі мен денсаулығының қауіпсіздігін қамтамасыз ету жөніндегі міндеттерін тиісінше орындамау" бойынша іс қозғалып, тергеу жүргізілген. 11 қазанда қылмыстық іс қылмыстық-процестік кодекстің 35-бабы 1-бөлігінің 2-тармағына сәйкес, қылмыстық құқық бұзушылық құрамының болмауына байланысты тоқтатылды. Істі Атырау қаласы прокуроры бекітті", - дейді облыстық білім басқармасы.