Ақтөбеде оқушы қыз сабақ үстінде босанып қала жаздады

Ақтөбеде сабақ кезінде босанып қала жаздаған 14 жастағы қызға қатысты жаңа деректер анықталды. Белгілі болғандай, ол баланы өзіне туыстық қатысы жоқ өгей атасынан туған, деп хабарлайды Arasha.kz.

Үш рет медициналық тексеруден өтсе де қыздың жүктілігін анықтай алмаған. Соңғы тексеріс биылғы 10 қыркүйекте, яғни босанардан бір айдай бұрын жүргізілген. Сол кезде де дәрігерлер жүктіліктің ешқандай белгілерін байқамаған, деп жазды Orda.kz.

Білім басқармасы басшысының орынбасары Нұргүл Бертілеуованың айтуынша, қыз қазір босанғаннан кейін ауруханада жатыр және оған психологиялық көмек көрсетілуде.

«Ол — толық емес отбасынан шыққан 9-сынып оқушысы. Ата-анасы ресми түрде ажырасқан. Қазір анасының қолында тұрады. Оқушы үш мәрте медициналық тексеруден өткен. Наурыз айында — жоспарлы скрининг, мамырда — жазғы сауықтыру лагеріне жолдама алу үшін, қыркүйекте — денсаулық жағдайына байланысты тексерілген. Үш тексерудің бірінде де жүктіліктің алғашқы белгілері анықталмаған», — деді Бертілеуова.

Бұған дейін хабарланғандай, оқиға бойынша қылмыстық іс қозғалды. Ақтөбе облыстық полиция департаменті бастығының орынбасары Болат Құшқалиев істің бақылауға алынғанын растады.

Полиция дерегінше, күдікті — 1961 жылы туған ер адам. Ол қыздың әжесінің күйеуі болғанымен, туған атасы емес.