АШМ азық түлік бағасы республикалық деңгейден жоғары өңірлерді атады

Бұл туралы Ауыл шаруашылығы министрі Айдарбек Сапаровтың төрағалығымен кеңесте айтылды, деп хабарлайды министрліктің баспасөз қызметі.

Басты тақырып – азық-түлік қауіпсіздігін қамтамасыз ету және әлеуметтік маңызы бар азық-түлік тауарларының бағасын тұрақтандыру.

-Халықты азық-түлікпен қамтамасыз ету басым бағыттардың бірі. Инфляцияның өсуі, соның ішінде азық-түлік бағасының қымбаттауы елдің азық-түлік қауіпсіздігіне тікелей әсер етеді. Ауыл шаруашылығы саласы айтарлықтай нәтижеге қол жеткізгенімен, бірқатар жүйелі мәселелердің әлі де бар екені анық. Сондықтан ішкі нарықты тұрақты қамтамасыз ету және бағаны тұрақтандыру үшін қосымша тиімді шаралар қабылдау қажет», – деді министр.

Осы бағытта бірқатар реттеу тетіктері іске асырылып жатыр. Мәселен, тұрақтандыру қорларында әлеуметтік маңызы бар азық-түлік тауарларының қорлары қалыптастырылып, сауда желілерінде «айналым схемасы» енгізілген, әлеуметтік маңызы бар тауарлар тізімі 19-дан 31 атауға дейін кеңейтілді, сондай-ақ сауда үстемесі (15 пайыздан асырмау) бақылауға алынған. Соған қарамастан, бағаның өсу қаупі бар.

Вице-министр Азат Сұлтановтың айтуынша, азық-түлік өнімдері тұтыну себетінің 40 пайыздан астамын құрайды және инфляцияның негізгі қозғаушы факторларының бірі болып отыр.

- Орта республикалық деңгейден жоғары көрсеткіш 12 өңірде тіркелді, олардың қатарында Ұлытау (9,7%), Маңғыстау (8,7%), Ақтөбе (7,7%) және Жамбыл (7,2%) облыстары бар,-деді вице-министр.

Сондай-ақ мәжілісте көптеген өнімдер жеткілікті көлемде өндіріліп жатқанын, соқан қарамастан осындай жағдай қалыптасып отырғаны айтылды. Бұл «өндіріс – сақтау – өткізу» тізбегінде теңгерімсіздіктер бар екенін көрсетеді.

Айта кетейік жиынға облыс әкімдерінің орынбасарлары, ауыл шаруашылығы басқармаларының басшылары, қаржы институттарының өкілдері, сондай-ақ ҚР Ауыл шаруашылығы министрлігінің комитеттері мен департаменттерінің жетекшілері қатысты.

Осыған дейін биыл азық-түлік өндірісі 9,5%-ға артатыны туралы жаздық.

Сонымен қатар Ауыл шаруашылығы вице-министрі Азат Сұлтанов теңгенің нығаюы азық-түлік бағасын төмендетуге әсері туралы айтты.