Астанада алаяқтар сауда орталығын жарты миллиард теңгеге тақырға отырғызған

Елорда прокуратурасы бір жыл бойы жүйелі түрде алаяқтықпен айналысқан қылмыстық топты әшкереленді. Сауда үйінің өз қызметкері бастаған топ мекемеге 473,6 млн теңге көлемінде орасан зор материалдық залал келтірген, деп хабарлайды Arasha.kz.

Тергеу мәліметтеріне сәйкес, қылмыстық схеманың басында сауда үйінің қызметкері тұрған. Ол өзінің 10 танысымен алдын ала сөз байласып, тұрмыстық техника мен электрониканы су тегінге алудың амалын тапқан. Қатысушылар арнайы бағдарламалық жүйе арқылы жалған промокодтар рәсімдеп, тауар құнын жасанды түрде төмендетіп отырған.

Бұл әдіспен олар бір жыл ішінде мынадай қымбат тауарларды иемденген:

iPhone соңғы үлгілері; Заманауи ноутбуктер мен теледидарлар; Тоңазытқыштар мен басқа да ірі тұрмыстық техникалар.

Қылмыстық топ мүшелері «арзанға» түскен тауарларды үшінші тұлғаларға сатып, түскен пайданы өзара бөліп алып отырған.

Астана қаласы прокуратурасының үйлестіруімен жүргізілген тексеріс нәтижесінде қылмыстың ізі кесілді. Сот процесі барысында 10 қатысушының да кінәсі толық дәлелденді.

«Сот үкімімен қылмысқа қатысушылар 4 жылдан 8 жылға дейінгі мерзімге бас бостандығынан айырылды. Сонымен қатар, сауда үйіне келтірілген 473,6 млн теңге шығынды өндіру туралы азаматтық талап арыз толық қанағаттандырылды», — делінген ресми хабарламада.

Қазіргі таңда сот үкімі заңды күшіне енген жоқ. Сотталғандардың жоғары тұрған сатыға шағымдануға құқығы бар.