Астанада құрылыс алаңында 17 жастағы бозбала көз жұмды

АСТАНА, 15 қазан – Sputnik. Астана полициясы құрылыс алаңында 17 жастағы баланың көз жұмуына қатысты түсініктеме берді.

"Астанадағы құрылыс алаңында кәмелетке толмаған баланың өліміне қатысты қылмыстық іс қозғалды", - делінген полиция департаментінің мәлімдемесінде.

Қыркүйек айының аяғында болған қайғылы оқиға туралы баланың отбасы әлеуметтік желі арқылы хабарлады. Айтуларынша, бозбаламен еңбек шарты жасалмаған, ол қара жұмысшы болып қабылданып, алғашқы жұмыс күні көз жұмған.

Полицейлердің мәліметінше, трагедия орнына дереу жедел-тергеу тобы келіп, оқиға орнын тексеріп, қажетті айғақтарды тәркілеген.

"Алдын ала мәлімет бойынша 17 жастағы бозбала құрылыста жұмысшы болып істеген. 24 қыркүйекте жүк түсіру кезінде оның үстіне бетон тақта құлаған", - деп атап өтті полиция.

Полицейлер тергеу жалғасып жатқанын айтты: куәгерлерден жауап алынып жатыр.