Астанадағы балалар алаңындағы өрттің видеосы әлеуметтік желілерде тарады

Әлеуметтік желілерде Астананың Триатлон паркі аумағында орналасқан балалар алаңындағы қатты өрттің видеосы тарап жатыр. Желі қолданушылары бұған қасақана от қою себеп болуы мүмкін деген болжам жасады. Tengrinews.kz қалалық ТЖД-дан мән-жайды білді.

Әлеуметтік желілерде Астананың Триатлон паркі аумағында орналасқан балалар алаңындағы қатты өрттің видеосы тарап жатыр. Желі қолданушылары бұған қасақана от қою себеп болуы мүмкін деген болжам жасады. Tengrinews.kz қалалық ТЖД-дан мән-жайды білді.

Танымал әлеуметтік желілердің бірінде елордадағы балалар алаңында болған өрттің видеосы жарияланды. Кадрлардан оттың нысанды түгелдей шарпығанын көруге болады.

Жазба авторы басқа да куәгерлермен бірге өртті өз бетінше сөндіруге тырысқанын, бірақ өртсөндіргіштің көмектеспегенін хабарлады.

"Қолымыздан келгеннің бәрін жасадық, өртсөндіргіштен пайда болмады. Мұны істегендер табылады деп үміттенемін", – деп жазды жазба авторы.

Пікір қалдырушылар төтенше жағдайдың ықтимал себептерін қызу талқылап, осы орынға байланысты естеліктерін бөлісе бастады. Кейбір қолданушылар бірден өртке қасақана от қою себеп болуы мүмкін деген болжам жасады.

"Ол жерде камера жоқ па екен, қызық?" – деп сұрады қолданушылардың бірі, оған видео авторы: "Бар, бірақ жұмыс істей ме – мәселе сонда", – деп жауап берді.

Қала тұрғындарының көбі ойын алаңының бүлінгеніне шын ниетпен қынжылды. Елордалықтар әкімдік алаңды қалпына келтірер деп үміттенеді.

Tengrinews.kz ресми пікір алу үшін Астана Төтенше жағдайлар департаментіне жүгінді. Құтқарушылар өртті сөндіру барысы туралы айтып берді.

"Бүгін таңертең ерте "112" нөміріне Астана қаласының Алматы ауданындағы Триатлон паркі аумағында орналасқан алаңда өрт шыққаны туралы хабарлама келіп түсті. Шақырту орнына небәрі 6 минутта жеткен өртсөндірушілер 25 шаршы метр аумақтағы өртті жедел түрде ауыздықтады", – деп хабарлады баспасөз қызметі.

Сондай-ақ ведомство өкілдері оқиға салдарынан зардап шеккендер жоқ екенін айтты. Қазіргі уақытта мамандар өрттің шығу себебін нақтылап жатыр.

Google News арқылы жаңалықтарымызды қадағалаңыз