Астанадан Омбыға ұшатындарға жоспарларын өзгертуге тура келеді

Қазақстандық Vietjet Qazaqstan әуекомпаниясы Астана мен Омбы арасындағы рейстерді тоқтату мерзімін ұзартты. Енді шектеулер 2026 жылдың 31 тамызына дейін (сол күнді қоса алғанда) күшінде болады. Бұған дейін тасымалдаушы рейстердің 20 шілдеге дейін тоқтатылғанын хабарлаған болатын, деп хабарлайды Tengri Travel.

Компания бұл шешімнің Омбы ауданындағы әуе кеңістігін пайдалануға енгізілген уақытша шектеулерге байланысты екенін түсіндірді.

"Омбы ауданындағы әуе кеңістігін пайдалануға қойылған уақытша шектеулерге және кестенің тұрақты орындалуын қамтамасыз ету мүмкін еместігіне байланысты Vietjet Qazaqstan Астана – Омбы – Астана бағыты бойынша рейстерді орындауды уақытша тоқтатады", - делінген хабарламада.

Тасымалдаушы жолаушылар мен экипаж қауіпсіздігі басты басымдық болып қала беретінін атап өтті.

"Жолаушылар мен экипаждың қауіпсіздігі әуекомпания үшін бұлжымас басымдық болып табылады. Бұл шешім ұшу қауіпсіздігін қамтамасыз ету, сондай-ақ ұзақ кідірістер мен кестенің еріксіз өзгеру қаупін азайту мақсатында қабылданды", - деп атап өтті әуекомпания өкілдері.

Әуекомпанияның жаңартылған ақпаратына сәйкес, Астана - Омбы - Астана бағыты бойынша рейстер 9 шілдеден бастап 2026 жылдың 31 тамызына дейін (сол күнді қоса алғанда) тоқтатылды.

Бұл ретте тасымалдаушы кейінгі рейстердің орындалуы туралы ақпарат жағдайдың дамуына қарай жаңартылып отыратынын, ал рейстері өзгеріске ұшыраған жолаушыларға брондау кезінде көрсетілген байланыс деректері бойынша жеке хабарланатынын айтты.

Қазіргі уақытта әуекомпания тоқтатылған рейстердің жолаушыларына ешқандай ұстап қалусыз әуе билеті құнын толық қайтаруды ұсынып отыр.

Қайтару бір брондау аясында ресімделген тасымалдаудың барлық пайдаланылмаған бөліктеріне, соның ішінде әуекомпанияның транзиттік рейстеріне де қолданылады.

Егер билет әуекомпанияның ресми сайтынан сатып алынған болса, ақшаны қайтаруды тасымалдаушының байланыс орталығы арқылы ресімдеуге болады. Билеттерді туристік немесе онлайн-агенттіктер арқылы сатып алған жолаушылар сатып алған жеріне хабарласуы қажет.

Естеріңізге сала кетейік, Vietjet Qazaqstan бұған дейін Астана мен Омбы арасындағы рейстерді алдымен 20 шілдеге дейін уақытша тоқтататынын хабарлаған еді. Жолаушыларға қаражатты толық қайтарудан бөлек, Петропавл арқылы Омбыға дейін автобус трансфері бар баламалы бағыт ұсынылған болатын. Сонымен қатар әуекомпания тоқтатылған рейс жолаушыларына 10 мың теңге көлемінде ваучерлер берілетінін мәлімдеген еді.

Google News арқылы жаңалықтарымызды қадағалаңыз