Ата ана құдіреті: индерлік Хасановтар жетімдерге болашақ сыйлады

Мен Қалымен кездейсоқ кездесіп қалдым. Бұдан бірнеше жыл бұрын Индер ауданы Есбол ауылының тұрғындары Хасановтар отбасы жетім балаларды бауырына басып, пана болған еді. Көкейімдегі сұрақты жазбай таныған Қалы:

- Бәтимамыз бар қолымызда, келесі жылы мектеп бітіреді. Ендігі мақсатымыз оның да жоғары оқу орнына түсіп, өмір жолынан өз орнын тапса дейміз. Ал басқа балаларымыз үйлі-баранды. Құдандалы да болдық...

Бастапқы қадам

Үнемі жүзінен мейірім төгіліп тұратын осы әйел көкейімнен кетпей қойды, ақыры жүздесудің сәті түсті. Сол кездегі кішкене балалар бүгінде отыз жастан асып кеткен ед. Тағдырдың тәлкегіне түсіп, «Ақбота» балалар үйінде тәрбиеленіп жатқан үш бірдей бүлдіршінді 2004 жылы үйлеріне алып келіп, азан-қазан болған еді-ау бір кезде. Үлкені сегізінші сыныпта оқитындықтан балалар үйінде қалса да бұлармен хабарласып, келіп тұрды. Тұңғыштары Айнамкөзі де жатырқамай, бәрі бір үйдің балаларындай тату-тәтті болғаны Асылбек пен Қалының күпті көңілін орнына түсірді. 

- Менің туып өскен жерім Қызылқоға ауданы Қарабау ауылы. 1984 жылы Асылбекпен отау құрып, осы Есбол ауылына келін болып түскенмін. Айнамкөзім дүниеге келгеннен кейін беломыртқам ауырып, үш жыл төсекке таңылып жаттым. Дәрігерлер емдеді, бірақ бұдан кейін бала көтеруге қатаң тиым салды. Мен де, Асылбек те көп балалы отбасынан шыққанбыз. Бұл біз үшін ауыр соққы болды, қызыма бауыр керек, бізге бала керек екенін кейін ұғындық. Осылайша балалар үйінен ағайынды үш баланы бөліп-жармай, бірдей бауырымызға бастық-,дейді Қалы өткенді еске алып. 

Жылу сыйлаған шаңырақ

Кең жүректі жандардың отбасының қуанышының шамшырағы қайта жанды. Бастауыш сыныпта оқитын балаларға (Айжан 4-ші, Альфия 2-ші, Азат 1-ші сыныпта) ата-ана тәрбиесін беріп қоймай, отбасылық өмірге бейімдеу қоса жүрді. Тазалықты сақтау, тамақ пісіру, өзін-өзі күте білу, үлкенді құрметтеу, кішіге қамқор болу,т.б. қасиеттерді бойларына сіңіруге тырысты. 

Заты жуас, ақкөңіл, мінезі орнықты Асылбек пен Қалыдан балалар көп нәрсе үйренді. Әке-шешесі бола тұра жетімдіктің қамытын киген балаларды жаңа отбасы туыстарынан ажыратпай, тегін білуді ұғындыра білді. 

«Әр бала өзінің шыққан тегін ұмытпауы керек, ол өмірлік қағидам. Себебі, олар ер жетеді, үлкен азамат, азаматша болып қалыптасқанда соны білуі тиіс қой», - дейді Асылбек ХАСАНОВ.  

- Балалар бірінен соң бірі мектеп бітірді. Оларды оқуға түсіру, мамандық алып шығып қалыптасуына күш салдық. 1991 жылғы Азаматым үйленіп, Атырауда, бүгінде төрт баласы бар, үйлі болды, жұмыста. Айжан тұрмысқа шықты, үш баласы бар, енді төртіншісін күтіп жүр, Индерде тұрады. Іс тігеді, үйден тамақ пісіреді, қарап отырмайды, вахтада жұмыс жасайтын күйеу бала екеуі тату. Ал Альфиямның үш кішкентайы бар, қазір күйеу бала екеуі Алматы қаласында тұрып жатыр. Ал 1997 жылғы Азатым да Х. Досмұхамедов атындағы университеттен дене шынықтыру факултетін бітірген. Бір баласы бар, келін екеуі Атырауда тұрады. Бәрі бір-бір шаңырақ ұстап отыр, баспаналары бар. Балалардың жаман қасиеттерден аулақ, өмірге бейім болып қалыптасуы бізді қуантады,-дейді мақтанышпен Қалы. 

Өмірден өз орнын табуларына мұрындық болған Асылбек пен Қалының еңбегі зор. Оны балалар да жақсы біледі, қарым-қатынас үзілген жоқ, қыздарды қолынан ұзатып, ұлдарды осы шаңырақта үйлендірген. Құда, құдағай болып, бәрімен араласып тұрады. Жазда Альфия балаларымен Алматыдан келіп, жиырма күн аунап-қунап кетіпті.

«Балалар бізді папа, мама дейді» деді Хасановтар.

Екі баланың болашағы

Балалар өсіп, ержетіп, өмірден өз орындарын тапқаннан кейін Хасановтар Сабыр Қазыбаев атындағы интернатына барып, тағы екі кішкентай баланы қамқорлықтарына алады. Оларға да  ата-аналық жылуын беріп отыр. 

- Ерасылым 27 жасқа келді. Атырау қаласындағы колледжден білім алып, бүгінде мебель жасайтын цехта еңбек етеді. Атырау қаласынан үкімет үй берген. Енді осы баламды үйлендірсем деймін,-дейді Хасановтар. 

Ал Бәтиманың ата тегін іздегенімен таппапты, ол бүгінде Есболдағы мектептің бірінде 11 сынып оқушысы. Арманы логопед болсам дейді екен. Айнамкөз де тұрмысқа шыққан, бүгінде көп балалы ана. Бүгінде бірі 67, екіншісі 64 жасқа толған Хасановтар жан-жақта жүрген балаларының амандығын ойлайды. Мереке күндері улап-шулап келіп жатқан кезде бұлар да марқайып отырғаны.          

Ләззат ҚАРАЖАНОВА

Суреттерде: Хасановтар отбасы

Бүгін, 17:19