Атырау облысында ТЖД тікұшағы 17 өртті өшірді

Атырау облыстық Төтенше жағдайлар департаментінің паркінде әмбебап ұшақ пен жаңа тікұшақ жұмыс бар.

Арнайы әуе техникасы дала өрті мен түрлі төтенше жағдай кезінде адамдарды жедел құтқаруға, сондай-ақ апат аймақтарына қажетті заттарды жеткізуге мүмкіндік береді. Жаңа тікұшақ биыл жазда 17 дала өртіне қарсы күрес шараларына шықты. Кейінгі екі жылда Атырау төтенше жағдайлар департаментінің материалдық-техникалық базасы едәуір жаңарды. Құтқару қызметі L-410 маркалы әмбебап ұшағымен, 91 жаңа автокөлікпен және бір жүрдек кемемен толықты.

Ми-8 тікұшағы бүгін де дала өртін өшіруге шықты. Құтқарушылар от орнында қалған адамдарды қауіпсіз аймаққа алып шығысымен ұшқыштар негізгі өрт ошағын өшіруге кірісті. Тікұшаққа тіркелген «ВСУ» деп аталатын мына су шашатын қондырғының сыймдылығы 5 тоннадай. Жедел жеткен әуе кемесі маңайдағы су көзіне 1 сағатта 4 рет қатынап үлгерді. Өрт өшірілді. Бірақ жаттығу үнемі қайталанады.

Ерболат Амангелдиев, «ҚазАвиаҚұтқару» АҚ батыс аймақтық бөлімшесінің бастығы:

- Бұл тікұшақты қамыс өртіне 17 рет пайдаландық. Сонымен қатар өрт сөндіру кезінде өзінің тиімділігін көрсетті. Қамысты, батпақты жерлерге барып, тез арада өртті оқшаулауға көп септігін тигізді.

«Атыраулық жедел құтқару қызметінің құрамында 70-ке тарта адам бар. Олар тек өрт емес, кез келген оқыс оқиғаға дайын болуға тырысады. Материалдық база жаңартылғалы жұмысымыз жеңілдеді»,- дейді жасақшылар.

Бекзат Ғалымжанұлы, Жедел-құтқару жасағының мүшесі:

- Біз тек өрт емес, су асты іздестіру жұмыстарын да жүргіземіз. Жол көлік оқиғаларына да шығамыз. Қазір техникалар бұрынғыға қарағанда жақсы шүкір. Жаңа қайықтар келіп жатыр, жаңа құрал-жабдықтар келіп жатыр.  

Мына L410 - ұшағы 19 жолаушыны немесе 2 тоннадай жүкті еркін көтереді. Ауа райына төзімді, -50-ден +50°C-қа дейінгі температурада еркін ұшады. Ол санитарлық авиацияға да бейімделген. Бортқа ауыр науқастарды тасымалдауға арналған заманауи зембілдер мен жүйелер орнатылған. Былтыр Батыс Қазақстан облысындағы тасқын кезінде аралда қалған тұрғындарды тасымалдауда осы ұшақ зор қызмет атқарды. Бұл әзірге батыс өңірдегі 4 облысқа ортақ жалғыз әуе кемесі.

Рәтбек Демеуберген, облыстық ТЖД бастығының орынбасары:

- Бұл көп бейінді ұшақ болып есептеледі. Арнайы жолақтардан бөлек, кез-келген жолға қону мүмкіндігі бар. Бұл ұшақтан басқа біздің авиа паркімізде Ми-8 және «еврокоптер» тікұшақтары бар. Олар да өздерінің тиімділігін көптеген төтенше жағдайларда көрсетуде.

Аумағынан 6 өзен ағып өтіп, іргесін Каспий теңізі шайып жатқан өңір үшін судан құтқарушылардың да маңызы ерекше. Өткен 8 айда олар теңізге түсіп кеткен 12 адамды аман алып қалды. Сол үшін де оларға жүріске жайлы, толқынға төзімді шағын кемелер аса қажет. VOYAGER деп атлатын мына су көлігі Атырауға биыл берілді. 

Бұл шағын кеменің басты артықшылығы 85 шақырым жылдамдыққа дейін қозғала алады. Сондай-ақ, мына экранда көрініп тұрған локациялық жүйе арқылы олар діттеген жерге жетуге және баратын аумақтағы судың тереңдігін дәл анықтауға мүмкіндік береді. Айтқандай, осы шағын кеме бортына 8 құтқарушыға дейін ала алады.

Статистикалық мәліметтерге сүйенсек, жыл басынан бері облыс аумағында 269 төтенше жағдай тіркеліп, 133 адам құтқарылған. Бұл – күн-түн демей, адам өміріне араша түсіп жүрген құтқарушылардың қажырлы еңбегінің нәтижесі. Мамандардың айтуынша, заманауи техника төтенше жағдай туындаған кезде жылдам әрі тиімді әрекет етуге толық мүмкіндік береді.

Авторлары: Арыстанбек Кенже, Амантай Мәтенов, Жандос Рахметуллин