Атырауда алғашқы неонаталдық хирургия бөлімшесі ашылды

Атырау облыстық перинаталдық орталығында бірінші неонаталдық хирургия бөлімшесі жұмысын бастады. Бұл жобаны «Теңізшевройл» компаниясының қолдауымен AYALA қайырымдылық қоры жүзеге асырды, деп жазады Egemen.kz.

Перинаталдық орталық директорының уақытша міндетін атқарушы Меруерт Айдарханованың айтуынша, бөлімшеге бюджет қаржысы есебінен заманауи жөндеу жүргізілген. Сондай-ақ ауаны тазартып, желдететін жүйе, жаңадан хирургиялық жарықтандыру жабдығы, реанимациялық үстел, тыныс алу аппараты мен MAC R32D рентген қондырғысы орнатылған.

«Бөлімшенің жұмысы қыркүйек айында басталды. Содан бері 4 нәрестеге сәтті ота жасалды. Біздің орталықта жоғары кәсіби неонатолог-дәрігерлер жұмыс істейді. Олар арнайы медициналық жабдықтың көмегімен шұғыл хирургиялық көмексіз аман қалуға мүмкіндігі жоқ балалардың өмірін сақтауды көздейді», дейді Меруерт Айдарханова.

Оның дерегіне қарағанда, облыста жыл сайын 25-30 нәресте хирургиялық патологиямен өмірге келеді. Енді жаңа бөлімше бөбектің алғашқы өмірін сақтап қалуға, сәби өлімінің санын азайтуға ықпал етеді.