Атырауда әуежайға барар жол бойындағы ағаштар жаңа мекенге көшірілуде

Қала тұрғындары соңғы күндері Әбілқайыр хан даңғылы бойында ағаштардың бірінен соң бірі жоғалып жатқанын байқаған. Алайда қалалық әкімдік бұл жағдайға түсініктеме беріп, ағаштар жойылып жатқан жоқ, керісінше, олардың жайқалып өсуі үшін басқа орындарға көшіріліп жатқанын мәлімдеді.

Әңгіме жол жиегіндегі жасыл желек туралы. Бұрын бұл жерде теректер бір-бірінен небәрі бір метр аралықпен отырғызылған. Уақыт өте келе ағаштар өсіп, бұтақтары қабысып, бір-біріне кедергі келтіре бастаған.

- Қазіргі уақытта ағаштарды үш-төрт метр аралықпен қайта отырғызу үшін көшіру жұмыстары жүргізілуде. Барлық ағаштар топырақты тамырымен бірге қазылып, қаланың басқа ашық аумақтарына отырғызылады, — деп хабарлады қалалық әкімдіктің баспасөз қызметі.

Сонымен қатар, әкімдік мәліметінше, Әбілқайыр хан даңғылы бойында төрт жаңа автобус аялдамасы орнатылады. Аялдама алаңдарын жасау үшін құрылысқа кедергі келтірген бірнеше ағашты да көшіруге тура келген.

Әкімдік өкілдері бұл жұмыстарды көгалдандыру және жасыл желекпен жұмыс істеу тәжірибесі бар мамандар атқарып жатқанын атап өтті.

Айгүл МАНСУРОВА

Бүгін, 19:00