Атырауда мерейтой иелері мен жас отбасылар марапатталды

Атырау облысында Гауһар, Алтын, Күміс той иелері мен жас отбасыларға құрмет көрсетілді. Аймақ басшысының орынбасары Дарын Шамұратов оларға арнайы кездесуде облыс әкімінің атынан құттықтау хаттар мен естелік сыйлықтар табыс етті, – деп хабарлайды Өңірлік коммуникациялар қызметі.

– Отбасы – қоғамның берік іргетасы. Әр шаңырақтағы сыйластық пен сүйіспеншілік – өңірдің де, елдің де тұрақтылығының кепілі. Сіздердің өмірлік тәжірибелеріңіз бен үлгілі жолдарыңыз жас буын үшін үлкен өнеге, – деді Дарын Шамұратов.

Кездесуге аймақтың әр ауданынан он екі отбасы қатысты. Олардың арасында Жылыой ауданынан – Сауытовтар, Индерден – Гауһар той иелері Азановтар, Атырау қаласынан – Сағынаевтар, Мақаттан – Исмағұловтар, Қызылқоғадан – Алтын той иелері Манғұровтар, Исатай ауданынан – Әбішевтер, Махамбеттен – Мұқашевтар және Құрманғазы ауданынан – Күміс той иелері Ерекешовтер бар.

Қазіргі таңда облыста 29 мыңнан астам көпбалалы отбасы тіркелген. Оның ішінде «Алтын алқа» иегерлері – 3826, «Күміс алқа» иегерлері – 6363 әйел бар. Сондай-ақ 200 ана «Ана даңқы» орденімен, 322 ана «Ардақты ана» атағымен марапатталған.

Сонымен қатар 6 мыңға жуық ана бала тууына байланысты жәрдемақы алады, ал 4,5 мың отбасы мүгедек бала тәрбиелегені үшін мемлекеттік көмекке ие.

Бүгін, 17:36