Атырауда ЖРВИ маусымы ерте басталып, ерекше қарқынмен өршуде

Дәрігерлер өткен күзбен салыстырғанда сырқаттанушылықтың үш есеге жуық артқанын тіркеп отыр. Ең көп ауыратындар – балалар. Маусым бір жарым айға ерте басталды, ал үдемелі кезең әлі алда. Қазірдің өзінде ауруханалар жоғары жүктемемен жұмыс істеп жатыр.

Бүгін, 21 қарашада Атырауда ағымдағы эпидемиологиялық жағдайға қатысты баспасөз конференциясы өтті. Атырау облысының санитарлық-эпидемиологиялық бақылау департаментінің басшысы Әлия Бекешева жыл сайын өңірде шамамен 190 мың ЖРВИ және жүзден астам тұмау жағдайы тіркелетінін хабарлады. Оның айтуынша, биылғы маусым әлдеқайда қарқынды дамып жатыр. Маусым басталғалы бері 51 804 ЖРВИ жағдайы анықталған, ал өткен жылы осы кезеңде 27 787 жағдай тіркелген. Оның ішінде 34 800-і – 14 жасқа дейінгі балалар.

Зертханаларда 17 тұмау жағдайы расталды, олардың бірнешеуінде гонконг тұмауы А(H3N2) анықталды. Әлия Бекешеваның айтуынша, бұл вирус әлемде бұрыннан бар және Қазақстанда алғаш рет 2001 жылы тіркелген. Биыл оның белсенділігі әдеттегі желтоқсаннан ерте басталды. Бекешева анықталған вирустар вакциналық штаммдарға сәйкес келетінін, бұл екпенің тиімділігін дәлелдейтінін атап өтті.

Аурудың алдын алу үшін 60 мың доза «Гриппол» вакцинасы сатып алынды. Тәуекел топтарынан 58 357 адамға екпе жасалды. Олардың ішінде 13 бала және 44 578 ересек бар, соның ішінде жүкті әйелдер мен медицина қызметкерлері қамтылған.

Мамандар басқа вирустарға да мониторинг жүргізуді жалғастыруда. Зерттелген 41 үлгінің ішінде риновирус, аденовирус, бокавирус және тұмауға ұқсас ауруларды тудыратын коронавирус анықталды. Ауруға шалдыққандардың ішінде балалардың үлесі – 34 пайыз, ересектердің үлесі – 60 пайыз.

Бүгін облыстың бас мемлекеттік санитар дәрігері профилактикалық шараларды күшейту туралы қаулыға қол қойды. Құжатта жеке гигиенаны сақтау, жабық орындарда маска тағу, науқастармен байланыстарды шектеу, қолды жиі жуу, бөлмелерді желдету және дұрыс тамақтану мен дене белсенділігі арқылы денсаулықты нығайту жөнінде ұсыныстар қамтылған.

Мамандардың айтуынша, қосымша шаралар сырқаттанушылық орташа деңгейден бес есе асқан жағдайда енгізіледі. Мониторинг 14 қарашада басталды. Биылғы маусым әдеттегіден ерте басталып, қосымша назарды талап етеді. Емханаларда алғашқы тексеру үшін фильтр-кабинеттер жұмыс істеп тұр. Медициналық қызметкерлер маска қолдануда. Барлық шаралар 1 қазаннан бастап күшінде.

Атырау облысы Денсаулық сақтау басқармасының басшысы Қайсар Абдалиев тәулігіне шамамен 2 500 инфекциялық ауру жағдайы тіркеліп жатқанын хабарлады. 144 пациент ауруханаға жатқызылған. Ең көп науқастар – 17 жасқа дейінгі балалар. Инфекциялық аурухананың жүктемесі 82 пайызға жеткен. Қосымша 100 төсек орны дайындалған, оның 40-ы модульдік ауруханада пайдаланылуда. Өңірде 54 жедел жәрдем бригадасы және қосымша 38 бригада жұмыс істеп тұр.

Абдалиевтің айтуынша, кейбір науқастар үйден шығып, адамдармен байланысын жалғастыруда, бұл инфекцияның таралуын жылдамдатады. Ол алғашқы белгілер байқалғанда бірден поликлиникаға жүгінуді немесе колл-орталыққа қоңырау шалуды ұсынды. Абдалиевтің сөзінше, вирусқа қарсы препараттар, антибиотиктер және қызуды түсіретін дәрілердің қоры тұрақты бақылауда және өңірдегі медициналық мекемелерде қолжетімді.

Білім беру ұйымдары

Атырау облысының Білім беру басқармасының басшысы Марат Әбуовтың айтуынша, мектептер қалыпты режимде жұмыс істеп жатыр. Оқу орындарында балалардың температурасын бақылау, сабаққа келмеу себептерін тіркеу және санитарлық нормалардың сақталуын қадағалау жүргізілуде.

Егер жеті күн ішінде сыныптағы оқушылардың 30 пайызы ауырып қалса, сабақтар онлайн форматқа ауыстырылады. Қазіргі кезде 15 пайыздан астам бала сабаққа қатыспай отыр. Мектептерде уақытша оқшаулау үшін арнайы бөлмелер қарастырылған. Оқу кабинеттері тұрақты түрде желдетіліп, гигиеналық құралдармен қамтамасыз етіледі.Мұғалімдер қажетті талаптар жөнінде толық ақпараттандырылған.

Мамандардың айтуынша, алдағы апталарда дәрігерлер жағдайдың динамикасын бақылауды жалғастырып, өзгерістер болған жағдайда жұмысты түзетіп отырады. Ведомстволар дер кезінде медициналық көмекке жүгінудің және балалардың денсаулығына мұқият қараудың маңыздылығын атап өтті. Маусымның дамуына қарай халыққа арналған қосымша шаралар мен ұсыныстар жаңартылып отырады.

Елена СҮНДЕТОВА

Бүгін, 19:16