Жаңа маусымға жаңа қарқынмен

Бұл жолы сарапшылар –инфляцияны тежеу үшін Үкімет қабылдап жатқан шаралардың тиімділігін бағалап, талдамалық болжамдар жасады. Атап айтқанда, дағдарысқа қарсы шаралар, бюджеттік-салық реформасының тәуекелдері, әлеуметтік теңсіздікке байланысты қалыптасқан жағдай және Қазақстанның экономикалық дамуының басқа да қырлары талқыланды.

Талқылауға Парламент Сенатының Төрағасы Мәулен Әшімбаев бастамашы болды. Шақырыл­ған меймандардың қатарында Ұлттық банк төрағасы Тимур Сүлейменов, Премьер-министр­дің орынбасары – Ұлттық экономика министрі Серік Жұманғарин және экономист Айдархан Құсайынов бар.

Палата Спикері атап өткендей, жаңа эко­номикалық модель ішкі сұранысқа, әлеуметтік тұрақтылыққа және ұзақмерзімді өсуге бағдар­лануы­мен ерекшеленеді. Ол қабылданған шара­лардың ішінен бензин мен дизель бағасын өсіруге мораторий жариялау, коммуналдық тарифтерді көтеруге тыйым салу, арнайы салық режимі бо­йынша шектеулерді алып тастау, ипотекалық бағ­дар­ламаларды қаржыландыру, ШОБ-ты қолдау сияқты нақты бастамаларды ерекше атап өтті. Мәулен Әшімбаевтың айтуынша, бұл ба­ғыт­та әрі қарай сапалы трансформация жүргізу үшін барлық мүдделі тарап үйлесімді жұмыс жүргізуі қажет.

«Президентіміз Қасым-Жомарт Кемелұлы Тоқаевтың тапсырмасымен Үкімет азаматтардың мүдделерін қорғау үшін экономикалық рефор­малар бағдарламасы бойынша түзету шараларын ұсынды. Мемлекет инфляциялық қысымды төмендету және реформалардың салдарын азайту үшін нақты қадамдар жасауда. Бұл ретте іске асы­рылып жатқан бағдарламалар қазіргі жағ­дайды қолдап қана қоймай, экономиканың нақты секторларын, банк жүйесін және шағын биз­несті дамытуды ынталандыруға тиіс», – деді Мәулен Әшімбаев.

Сонымен қатар қатысушылар елдің тұрақты және сапалы экономикалық өсуінің негізгі шарттарына тоқталды. Олар реформаларды әлеуметтік өлшеумен қатар, бюджет-салық трансформациясына, әртараптандыруға және жаңа экономикалық саясаттың ресурстарына қатысты мәселелерге ерекше назар аударды.

«Бүгінде күрделі сыртқы конъюнктура мен құрылымдық сын-қатерлерге қарамастан, ел экономикасы сенімді өсіп келе жатқанын көріп отырмыз. Дегенмен жалпы ішкі өнім көрсет­кіштері, инвестиция қарқыны немесе экспорт көлемі картинаның бір жағы ғана. Президентіміз атап өткендей, бұл өсуді әрбір азамат сезінуге тиіс. Сондықтан жаңа мүмкіндіктер тек мега­полистерде ғана емес, өңірлерде де құрылып, экономика адам үшін жұмыс істеуі керек, керісінше емес. Сондықтан реформаларға назар біртіндеп цифрлардан құралған көрсеткіштерден – өмір сапасына, адам капиталын дамытуға және тұрақты институттарды қалыптастыруға ауысуда. Президент саясатының басымдығы осы», – деді Мәулен Әшімбаев.

Айта кетейік, Taldau Talks – ашық диалогқа арналған подкаст-платформа. Онда ел дамуының өзекті мәселелері және Мемлекет басшысы жүктеген міндеттерді іске асыруға арналған практикалық қадамдар талқыланады.

М. ТӨЛЕУ