Атыраудың танымал журналисті әрі фототілшісі Аман Мутигуллин дүниеден озды

Қазақстан Журналистер одағының Атырау облыстық филиалы өте талантты журналист, фототілші және абзал азамат Аман Мутигуллиннің мезгілсіз дүниеден өткенін хабарлайды. 

Оның өмір жолы өңіріміздің тарихы мен дамуымен тығыз байланысты болған, ал кәсіби еңбегі өз ісіне деген адалдықтың үлгісі еді. 

Аман Мутигуллин 1957 жылы 15 қазанда Исатай ауданы, Забурын елді мекенінде дүниеге келген. В.П. Чкалов атындағы Егорьевск азаматтық авиациясының авиатехникалық колледжінде білім алғаннан кейін (1975–1978 жж.), ол ұзақ жыл бойы авиация саласында еңбек етті. 1978 – 2000 жылдары Атырау әуе кәсіпорнында авиатехник, Ан-24 ұшағының бортмеханигі қызметтерін абыроймен атқарды.

Одан кейінгі еңбек жолы журналистикамен байланысты болды. 2000 жылдан бастап ол өмірін фотокамера мен сөз өнеріне арнады. «Ақ Жайық» (2000–2003 жж.) және «Прикаспийская коммуна» (2003–2012 жж.) газеттерінде фототілші болып жұмыс істеген Аман Қазақстан мен Атырау облысының маңызды оқиғаларынан бірегей фотошежіре жасады. Оның туындылары ерекше көзқарасымен, жоғары кәсібилігімен және суреттерінің кейіпкерлеріне деген зор құрметімен ерекшеленді.

2012 жылдан бастап өмірінің соңына дейін Аман Мутигуллин Атырау энерго кешенінің баспасөз қызметінде еңбек етіп, «Атырау өңірі энергетигі-Энергетик Прикаспия» газетінің бас редакторы болды. Ол энергетика саласының тыныс-тіршілігін қалың оқырманға жеткізуге зор үлес қосты.

Өзінің жемісті қызметі үшін ол мемлекеттік және кәсіби марапаттарға ие болды, соның ішінде «ҚР Тәуелсіздігінің 20 жылдығы» мерекелік медалі (2011 ж.) және халықаралық шығармашылық конкурстардың I және III дәрежелі дипломдары, оның ішінде «Каспий – достық теңізі» (Астрахань, 2018 ж.) және Егорьевск авиатехколледжінің 100 жылдығына арналған конкурстар(2018 ж.).

Биыл кәсіби мереке - бұқаралық ақпарат құралдары күнінде оның еңбегі айрықша бағаланып, Қазақстан Республикасы Президентінің Жарлығымен «Ерен еңбегі үшін» медалімен марапатталды.

Біз Аманды ерекше мейірімді, адал және өмірге құштар жан ретінде білген едік. Ол сенімді дос, парасатты әріптес және отбасына адал азамат болды.

Аман Мутигуллиннің отбасы мен жақындарына қайғысына ортақтасып, көңіл айтамыз. Оның кәсіби мұрасы мен жарқын адамгершілік қасиеттері біздің жүрегімізде мәңгі сақталады.

Бүгін, 16:39