Автокөлік жолдарын жөндеу жұмыстары рекордтық көрсеткішке жетті

Қазақстанда ұзын ырғасы 1700 шақырымнан астам жаңа теміржол салынып жатыр.

Бұл еліміздің транзиттік әлеуетін арттырып қана қоймай алыс-жақын шет елдерге жүк тасымалын ұлғайтуға мүмкіндік береді. Мәселен Қазақстан мен Қытай арасында жаңа жүк тасымалдау бағыттары іске қосылған.  Бұл ретте Алтынкөл – Қорғас және Достық – Алашанькоу кеден бекеттері негізгі дәліз саналады.  Ал жалпы елімізде биыл қанша шақырым жол қалпына келтірілді? Жолды күтіп-баптап ұстау бағытында қандай жұмыстар атқарылып жатыр? 

Жалпы еліміздің транзиттік әлеуетін арттыруға мүмкіндік мол.  Айталық, «Солтүстік – Оңтүстік» көлік дәлізі Парсы шығанағы мен Оңтүстік Азия елдерінің нарығына тікелей жол ашады. Халыққа Жолдауында Президент жаңа шойын жолдардың маңыздылығын  ерекшелеп айтқан еді. Бұл бағыттардың бәрі біртұтас жүйе сияқты жұмыс істеп, елімізге едәуір табыс әкеледі.

Жаңа желілердің іске қосылуы:

• транзит пен жүк экспортын арттыруға
• өңірлердің дамуына
• жаңа жұмыс орындарын ашуға
• Еуразияның көлік хабы ретінде Қазақстанның позициясын нығайтуға ықпал етеді.

Сонымен қатар биыл -ұзындығы 836 шақырымды құрайтын Достық – Мойынты теміржол желісінің құрылысы аяқталып пайдалануға берілді. Осы арқылы  Қазақстан – Қытай бағытының өткізу қабілеті 5 есеге артты. Бұл халықаралық көлік дәліздері арқылы транзиттік жүк тасымалдарының өсуіне мүмкіндік берді. Сондай-ақ ұзындығы 75 шақырымды құрайтын Алматы қаласының айналма теміржол желісі жобасы аяқталуға таяды. 323 шақырымдық Мойынты – Қызылжар жаңа теміржол желісінің құрылысы басталды. Ал ұзындығы 157 шақырым Дарбаза – Мақтаарал және 297 шақырымды құрайтын Аягөз – Бақты жобалары жүзеге асырылып жатыр.

Теміржол инфрақұрылымын дамыту жобалары

Достық – Мойынты теміржол желісі - 836 км аяқталды

Қазақстан – Қытай бағытының өткізу қабілеті 5 есеге артты.

Алматы айналма теміржол желісі - 75 км аяқталуға жақын.

Мойынты – Қызылжар жаңа теміржол желісі - 323 км. құрылысы басталды.

Дарбаза – Мақтаарал - 157 км.

Аягөз – Бақты - 297 км.

Мақсат Қалиақпаров, ҚР Көлік вице-министрі:

- Сонымен қатар жыл соңына дейін 6,1 мың автокөлік жолдарын барлық жұмыс түрлерін аяқтау. Оның ішінде Қалбатау – Майқапшағай, Қызылорда – Жезқазған жолдары бар. Алматы стансаның айналма теміржол желісінің құрылысын аяқтау. Нәтижесінде Алматы теміржолындағы жүстеме 40 пайызға төмендейді.

Осы орайда автокөлік жолына ойыссақ...Биыл елімізде Автомобиль жолдарын жөндеу жұмыстары рекордтық көрсеткішке жеткен.  Ұзын-ырғасы 13 мың шақырым жол ретке келтірілді.  Оның ішінде  8 мың 800 шақырым автожол жөнделді. Республикалық маңызы бар жолдардың 460 шақырымында күрделі жөндеу жүргізілді. Орташа жөндеу жұмыстарымен республикалық маңызы бар автожолдардың 6100 шақырымы қамтылды. Қалбатау-Майқапшағай, Қызылорда-Жезқазған, Подстепное-Федоровка, Күрті-Қонаев және Ұзынағаш-Отар жолдары қолданысқа берілді. Ал келер жылғы жоспарды сала маманының өзі айтсын.

2025 жыл 13 мың км. жол жөнделді.

Аяқталған ірі жобалар

Ұзынағаш – Отар 42 км.

Қалбатау – Майқапшағай 405 км.

Подстепное – Федоровка 72 км.

Күрті – Қонаев  67 км. 

Қызылорда – Жезқазған 192 км.

Сәкен Ділдахмет, «ҚазАвтоЖол» Ұлттық компаниясының ресми өкілі:

- Жыл сайын ұлттық компания республикалық жолдардың сапасын арттыру олардың жамылғысын жақсарту бойынша осындай үлкен жұмыстарды атқаруда. Келер жылға біз 10 перспективалы жобаның құрылысын бастауды жоспарлап отырмыз. Қазір халықаралық қаржы иинституттарымен қаржы тарту бойынша келіссөздер жүргізілуде. Атап өтетін болсақ бұл Жезқазған-Қарағанды, Астана-Ырғыз, Ақтөбе-Ұлғайсын, Сарыағаш-Қызылорда айналма жолы, Атырау Доссоз жолдары. Жол бойындағы сервистер саны 1500-ден асты биыл 100-ден астам мобильді-санитарлық гигиеналық торап орнатылды.

Келер жылы жалпы ұзындығы 3200 шақырым болатын құрылыс жобалары қолға алынады. Бүгінде Жезқазған-Қарағанды, Астана-Ырғыз, Ақтөбе-Ұлғайсын сынды он бағыт бойынша жөндеу жұмыстарын жүргізу үшін халықаралық қаржы институттарының несие қаражаттары тартылды. Бұдан бөлек, биыл 1700 шақырым болатын 9 жаңа учаске ақылы жолдарға қосылды. Ақылы учаскелердің жалпы саны 26-ға жетіп, ұзындығы 4900 шақырым болды. 11 айда ақылы жолдардан қазынаға 79 млрд теңге түскен. Бірқатар күре жолға арнайы бейнебақылау да орнатылыпты.

Сәкен Ділдахмет, «ҚазАвтоЖол» Ұлттық компаниясының ресми өкілі:

- Биыл республикалық автожолдардағы жол-көлік оқиғасының алдын алу үшін орташа жылдамдықты ескеретін арнайы камериалар орнаттық. Қазір 8 учаскеде бар. Оларға түскен құқықбұзушылықтар құқыққорғау органдарына жолданады. Ең бастысы жол-көлік оқиғасының саны 10 пайызға азайғанын көріп отырмыз.

Тағы айта кетерлігі мына жолдағы қауіпсіздікті күшейту мақсатында осы салаға да жасанды интеллект енгізіліп жатыр. Мәселен, қазір жолдағы құрылыс жұмыстарын зерттеп отыратын Q-RAM, KazRoadLab жүйелері іске қосылған. Сала мамандары осы арқылы жол сапасы жақсарады деп сендіріп отыр. Сонымен қатар азаматтарды ақпараттандырып отыратын 1403 байланыс орталығы іске қосылған. Оған жыл басынан бері миллионға жуық адам өтініш түсіріпті.

Жол бойындағы қызмет те едәуір жақсарған. Бүгінде республикалық автожолдар желісінде 1500-ге жуық нысан жұмыс істейді. Олардың 93% - ы ұлттық стандартқа сәйкестендірілген. Айталық, жанармай құю бекеттері, қонақ үйлер мен санитарлық-гигиеналық кешендерді қоса алғанда 33 жаңа нысан іске қосылды.