Аягөз гарнизоны: жас сарбаздарға қандай жағдай жасалған?

Оның айтуынша, Абай өңірі бойынша мерзімді әскери шақыруға науқан көктемгі және күзгі деп екіге бөлінеді. Күзгі науқан Шығыс өңірінде 1 қыркүйектен басталып, 31 желтоқсанға дейін жалғасады екен.

–  Бас штаб басшылығымен Абай өңіріне 800-ге жуық жас сарбазды сапқа тұрғызу міндеттелді. Қазір Ұлттық қауіпсіздік комитетінің шекара қызметіне, Мемлекеттік күзет қызметіне, Қарулы Күштер қатарына, Шығыс өңірлік қолбасшысы қызметіне және әскери құрылымдарға сарбаздарды жолдаудамыз. Былтырмен салыстырғанда Абай облысы үшін аса қатты өзгеріс байқалмайды. Әскери қызметке өңір бойынша 1 600-ден астам сарбаз жолданады, – деді полковник Руслан Омаров.

Сонымен қатар Абай облысы Қорғаныс істері жөніндегі департаментінің бастығы мемлекет тарапынан мерзімді әскери қызметке шақырылған азаматтарға көптеген жеңілдік қарастырылғанын сөз етті.

– Президентіміз Қасым-Жомарт Тоқаев әскери патриоттық және әскери қызмет бойынша заңнамаға қол қойып, еліміздегі жастардың рухын, патриоттық сезімін көтеруді тапсырған. Сол мақсатта Мемлекет басшысы тарапынан біздің мерзімді әскери қызметке шақырылған азаматтарға көптеген жеңілдік қарастырылған. Мәселен, мерзімді әскери қызметті өткерген соң кез келген сарбаз Ұлттық бірыңғай тестілеудің нәтижесіне қарамастан, оқуға түсе алады. Оның өзі ақылы және ақысыз түрде деп бөлінеді. Екіншіден, әскерге кеткен сарбаздың жұмыс орны сақталады. Жоғары оқу орындарында ақысыз, яғни грантта оқыса, ақысын өтеуден босатылады. Үшіншіден, сарбаздың несиесі тоқтатылады. Сондықтан жастардың Отан алдындағы борышын өтеуіне Үкімет тарапынан да, Қарулы Күштер тарапынан да барлық мүмкіндік жасалуда, – дейді Руслан Омаров.

ҚР Қорғаныс министрлігінің Ақпарат және коммуникациялар департаменті бұқаралық ақпарат құралдарының өкілдері үшін арналған баспасөз-турында  Құрлық әскері  бас қолбасшысының орынбасары, тәрбие және идеологиялық жұмысына жауап беретін полковник Ырымғали Құрманғалиұлы Акишев   қатысты.

Ол жас сарбаздардың әскердегі өмірге үйренуіне барынша жағдай жасалғанын айтты.

– Идеология ретінде сарбаздарымыздың патриоттық әрі жігері мен намысын ояту мақсатында сабақтарымыз үзілген емес. Дегенмен біз сарбаздарды тек ақпараттық тұрғыда ғана қолдап-қолпаштап отырғанымыз жоқ. Оларды психологиялық реттеуі жөнінен түрлі бағдарламалар жүргізіліп жатыр. Қазір Астана қаласындағы біраз компаниялар сарбаздарға зерттеу тұрғысында психология жағынан көбірек көңіл бөліп отыр. Өйткені бізге келген сарбаздың әрбірі ең алдымен 18-19 жастағы бозбала. Оның кейбірі үйінен, әке-шешесінен алыстамаған жандар. Енді бірі үй ішінің еркетотайы, еркесі. Сондықтан мұндағы талап пен тәртіпті көтере алмай жатады. Әр сарбаз психологиялық тест өткізген соң оның жай-күйі анықталады. Алда-жалда қажеттілік туындаса, оған бағыт-бағдар беріп, ортаға сіңісуіне көмектесеміз.

 Олардың әскерге келгенде ортаға үйренісуі оңтайлы болуы үшін дептехнология ретінде қолданамыз. Мәселен, әр ротада, взводта, батальонда актив деген бар. Бұл дегеніміз – әрбір рота, взвод, батальонның үздік әрі алғыр сарбазы бізде ұйымдастырушы. Яғни, оған біз кәдімгідей офицерге бергендей тапсырма береміз. Басшылық тараппен бірге бас қосып, әңгімелесіп, талқыға сала отырып, қандай сарбаздарға көңіл бөлу керегін анықтап, оның мәселесін шешіп, тілін табуға тырысамыз, – дейді полковник Ырымғали Акишев.

Ал әскерге келген сарбаздарға қандай жабдықтар берілетіні жайында 10810 әскери бөлімі Бригада командирінің тылдық қамтамасыз ету жөніндегі орынбасары, подполковник Досжан Искаков көрсетіп берді.

Оның айтуынша, Отан алдындағы борышын өтеуге түскен әр сарбазға бейбіт уақытқа запастағы мүлікпен жабдықтау №4 норма бойынша жүргізіледі.

– 2025 жылдың 21 мамырдағы №595 бұйрығына сәйкес, сарбазға берілетін жабдықтың құрамына 8 зат қосылды. Атап айтсақ, тырнақ алғыш, тарақ, қалта айнасы, сабын салғыш, тіс щеткасына арналған қорап, тазалыққа қажетті заттарды салатын дорба. Бұрын нормаға сәйкес дәретхана қағазы бір айға 50 метрлік 1 бума берілсе, қазір сондай буманың екеуі сарбазға тиесілі. Сонда 100 метр дәретхана қағазы бір айға жетеді деп есептелген. Соған сай айына екі сақалқырғыш қамтылады. Әрбір заттың берілген уақыты белгіленеді,  – дейді  Досжан Нұржанұлы.

Бір жылға берілетін жабдықтардың ішінде ақ, қара, жасыл түсті үш түрлі жіп. Оның әрқайсысы 200 метр. Аяқкиім мен киім щеткасы бар. Сонымен қатар кір жуғыш машинаға 1 келі киім салынса, 50 грамм кір жуғыш ұнтағы есептелген. Күнделікті бет орамал, нәскиді сарбаздар өздері қолмен жуады.

– Әр сарбазға киім-кешегі де нормаға сай беріледі. Мысалы, қазір біз  2 танкті батальондамыз. Мұнда түскен әр жас сарбазға үш костюм беріледі: танкистің киімі, маусымына қарай қыстық және жаздық киім, салтанаттық шеруге киілетін киім. Жылына 10-15 шақты салтанатты шарада өтеді, сонда киюге міндетті, – дейді Бригада командирінің тылдық қамтамасыз ету жөніндегі орынбасары, подполковник Досжан Искаков.

Сарбаздардың киім-кешек үтіктейтін орындары, казармасы, демалыс орындары мен асханаға дейін көрсетілді. Тіпті, күнделікті ас мәзірі мен азық-түлік үлесінің негізгі түрлері таныстырылды.

– Әскери бөлімдегі сарбаздар күніне үш мезгіл ыстық тамақпен қамтамасыз етіледі. Әр жауынгердің ас үлесіне мемлекет тарапынан күніне 2 250 теңге бөлінеді. Бұл қаражатқа сарбаздарға құнарлы тағамдар дайындалады. Мәселен, 1-санаттағы сиыр еті, құс еті, балықтан басталып, өрік-мейіз, бал, жеміс-жидекке дейін беріледі. Мереке не болмаса атаулы күндерде сарбаздарға қосымша тәтті-дәмдер мен жемістер ұсынылады, – деді Досжан Нұржанұлы.

 Әскерден кетуіне үш күн қалған қатардағы жауынгер Рамазан Қабдыхалықов асхана мәзіріне көңілі толатынын жеткізді.

– Әрине, үйдің тамағының орны бөлек қой. Әскердегі ас одан жаман емес. Үш уақыт тамақ уақытылы беріледі. Мереке күндері ет асып, палау пісіреді, – дейді Ұлытау облысы Жезқазған қаласының тумасы Рамазан.