Байлар да инвестицияға тәуелді: 7 миллиардердің капиталы азайды

Жыл басында жаһандық нарықтарда оң динамика байқалғанымен, Ирандағы наразылықтар, АҚШ-тың Венесуэлаға әскери араласуы, Қытай мен Жапония арасындағы дипломатиялық дағдарыс және АҚШ-тың Гренландияны аннексиялау мүмкіндігі туралы әңгімелер сияқты геосаяси шиеленістер инвесторларды алаңдатып отырды.

Шиеленіс ең соңында 28 ақпанда АҚШ пен Израильдің Иранға жасаған соққыларынан кейін өрши түсті. Бұл оқиға Батыс Азиядағы ірі қақтығысқа әкеліп, Тегеран тарапынан жауап шаралары байқалды. Сол сәттен бері нарықтарға қысым үздіксіз әсерін тигізіп келеді.

Нәтижесінде, 2026 жылдың басынан бері әлемдегі ең бай 10 адамның жетеуінің байлығы 214 миллиард долларға қысқарса, қалған 3 миллиардердің байлығы 43,6 миллиард долларға артты.

Бернар Арноның байлығы 55,4 миллиард долларға азайды

Жыл басынан бері ең үлкен шығын француз сән брендтерінің иесі Бернар Арноға тиісті болды – оның байлығы 55,4 миллиард долларға азайып, 153 миллиард долларға жетті.

Америкалық технологиялық компания Oracle-дің негізін қалаушы Ларри Эллисон да байлығын 52,4 миллиард долларға қысқартты – 195 миллиард долларға дейін. Meta компаниясының иесі Марк Цукерберг байлығы 30,5 миллиард долларға төмендеп, 203 миллиард доларынан айырылды.

Amazon компаниясының негізін қалаушы Джефф Безостың байлығы 23,3 миллиард долларға қысқарса, Google-дің бірлескен негізін қалаушылары Ларри Пейдж – 21,9 миллиард долларға, Сергей Брин – 20,4 миллиард долларын жоғалтты. Әлемдегі ең қымбат компания – Nvidia-ның бас директоры Дженсен Хуангтың байлығы 10,1 миллиард долларға төмендеді.

Илон Маск байлығын арттырды

Ең қызығы әлемдегі ең бай адам Илон Маск керісінше басқа миллиардерлерден ерекшеленіп, байлығын 24,2 миллиард долларға арттырып, табысы 644 миллиард долларға жеткен.

Walmart сауда желісінің негізін қалаушы Сэмюэл Уолтонның ұрпақтары Джим Карр Уолтон пен Сэмюэл Робсон Уолтон та байлыққа кенелді. Джим Карр Уолтонның капитал өсімі 9,8 миллиард долларды, ал Сэмюэл Робсон Уолтонның – 9,7 миллиард долларды құрады.

Бұған дейін Қытай қайтадан әлемдегі миллиардерлер саны бойынша көшбасшы атанғанын жазған едік.