Балқаш әуежайының “прайм дәуірі“ басталды: аспашам, жүк және қайтарылған активтер туралы

Tengrinews.KZ парақшасынан алынған деректерге сүйене отырып, Qazaq24.com жаңалық жариялайды..

Аптап, шексіз дала және жолдағы қажытып жіберетін уақыт - Балқашқа бару мен қайту десе, көз алдымызға келетін үйреншікті көрініс осы.

Ал уақыт үнемдегісі келіп, ұшақпен баруды таңдағандар қауіпсіздігі төмен, тар, көңілсіз, тозығы жеткен әуежай мен "кукурузниктердің" романтикасын еске алары анық.

Бірақ бәрі өзгерген болса ше? Ескі сервис дәуірі аяқталды ма?

Шынымен де солай. Балқаш әуежайының "екінші тынысы" ашылды. Қазір мұндағы әуебилеттер бір ай бұрын сатылып кетеді. Не өзгерді және әуежай қалай "құтқарылды" - Tengrinews.kz репортажында.

Бірақ бәрін ретімен айтайық. Алдымен бұған дейін не болғанына тоқтала кетейік. Жөндеуге дейінгі әуежайдың түрі осындай болатын - бір қарағанда ескірген аудандық театрға көбірек ұқсайтын жалғыз ғимарат:

Балқаш әуежайы реконструкцияға дейін. Суретті әуежай директоры ұсынды

Әуежай туралы оның бұрынғы күйін жақсы білетіндерден артық кім айта алады? Бізбен өз естеліктерін Юлия Ласеева бөлісті - ол блогер және өзін әлеуметтік желілердегі Балқаштың амбассадорымын деп атайды. Ол осы қалада туып-өскен, мектеп бітіргенше сонда тұрған. Кейін алдымен Қарағандыға, сосын Астанаға көшсе де, әр жазда туған жеріне міндетті түрде оралып тұрады.

Бұрын бұл ғимарат әуежайдан гөрі провинциялық автостанцияға көбірек ұқсайтын. Тек бағаналар мен қабырғадағы суреттер ғана назарды басқаға аударып, сәл де болса көрік беріп тұратын.

"Функционалдық жағы, әрине, нашар еді. Есімде, онда үйреншікті тексеру аймағы мүлдем болмаған. Ал біз ұшып келгенде, жүкті таспаға шығармайтын - оны кәдімгі көлікпен тікелей әуежай ғимаратының кіреберісіне әкелетін", - деп еске алады Юлия.

Бүгінде көп нәрсе өзгерді. Қыздың айтуынша, жөндеуден кейін ол ақыры нағыз әуежайға ұқсай бастаған.

Дегенмен, бәрібір өзгеше. Ғимарат ерекше. Мұнда өткеннің өзіндік атмосферасы, модерн рухы мен алып мегаполистердің хабтарында сирек кездесетін (мүмкін мүлдем жоқ шығар?) жайлылық бар. Тіпті жергілікті тұрғын болмасаң да, бірден "өз үйімдемін" деген сезім пайда болады.

Төмендегі суретте - Юлия жөндеуден кейінгі әуежайда:

Юлия Ласеева реконструкциядан кейінгі әуежайда. Суретті материал кейіпкері ұсынды

"Ең бастысы, тарихи бейнесі сақталған, - деп қосты ол. - Реконструкция туралы алғаш естігенде, қазір баспалдақтар мен бағаналардың бәрін бұзып, жаңадан салады-ау деп ойладым... Иә, ондай жағдайда заманауи ғимарат пайда болар еді, бірақ Балқаш әуежайының жаны жоғалып кетер еді. Қазір ол әрі эстетикалық жағынан әдемі, әрі әлдеқайда функционалды".

Біздің бұл әңгімеміз Балқашқа барар алдында Instagram желісінде өрбіді.

Көп ұзамай БАҚ беттері әуежайдың ауқымды реконструкциясы туралы жаңалықтарға толды. Үкімет бұған қайтарылған активтерден 945 миллион теңге жұмсалғанын хабарлады.

Анықтама: Қайтарылған активтер - бұл мемлекет меншігіне алынған ақшалай қаражат, жылжымайтын мүлік, акциялар және басқа да мүліктер. Бұл мүлік пен ақша шетелге заңсыз шығарылған немесе сыбайлас жемқорлық пен көлеңкелі схемалар арқылы иемденілген.

Балқаштағы әуежайды реконструкциялау туралы деректер. Кестені үкімет дайындады

Біз де фотографпен бірге шетте қалмадық. Балқашта не өзгергенін өз көзімізбен көру үшін билет алып, жолға шықтық.

Балқаш әуежайы реконструкциядан кейін: ішінде не өзгерді?

Рас, бұл іссапарға ұшақпен барудың сәті түспеді: Балқашқа баратын барлық билет сатылып кетіпті. Маусым кезінде сұраныс өте жоғары. Сондықтан пойызбен баруға тура келді.

Сағат таңғы 11. Біздің такси бағаналары бар сары ғимаратқа жақындап тоқтады - бұл терминал екеніне сену сәл оғаштау көрінеді.

Балқаш әуежайы реконструкциядан кейін. Фото: ©️ Tengrinews.kz / Әлімжан Аманжол

Көліктен түскен бойда, әрбір туристке таныс көлдің иісі сезіледі. Кіреберісте тіршілік қызып жатыр: мұнда ұшақтан жаңа түскендер де, өз рейсін күтіп отырғандар да бар.

Фото: ©️ Tengrinews.kz / Әлімжан Аманжол

Кіреберісте күнге күйген туристердің бірін тоқтатып, әсерін бөлісуін сұрадық. Ер адам өзінің жергілікті емес екенін және терминал оны таңғалдырғанын айтты. Оның ойынша, әуежай "басқаларға ұқсамайды" - оның өзіндік "мінезі" мен өмір тынысы сезіледі.

Оның айтуынша, ғимараттың ішкі көрінісі де көңіл қуантарлық - бұл сөзді ол біздің ғимаратты әзірге тек сыртынан көргеніміз туралы айтқанымызға жауап ретінде айтты.

Балқаш әуежайынан ұшуды күтіп отырған астаналық турист. Фото: ©️ Tengrinews.kz / Әлімжан Аманжол

Біз ішке кірдік - әуежайларға тән үйреншікті хай-тек пен шынының орнына көз алдымызда шағын сарай ашылды. Тура есіктен жоғары қарай мәрмәрдан жасалған салтанатты баспалдақ басталады, ал оның төбесінде аспашам ілулі тұр.

Жөндеуден кейінгі Балқаш әуежайының ішкі көрінісі осындай. Фото: ©️ Tengrinews.kz / Әлімжан Аманжол

Ою-өрнекті биік бағаналар, әсем балкондар және жылы түс- интерьер шынымен де театрға көбірек ұқсайды. Бұл жердің әуежай екенін тек аркалы өткелдердің жанындағы ұқыпты көрсеткіштер ғана еске салады.

Балқаш әуежайы реконструкциядан кейін. Фото: ©️ Tengrinews.kz / Әлімжан Аманжол

Барлығы мінсіз сырланған және қалпына келтірілген.

Фото: ©️ Tengrinews.kz / Әлімжан Аманжол

Әсіресе мынадай "бұрынғы" күйін еске түсірсек:

Балқаш әуежайы 2025 жылы реконструкцияға дейін. Қарағанды облысы әкімдігі баспасөз қызметінің суреті

Тіпті ұсақ-түйек детальдарына дейін мән берілген. Мысалы, біз геометриялық оюлары бар төбеге тамсана қарадық.

Балқаш әуежайы реконструкциядан кейін. Фото: ©️ Tengrinews.kz / Әлімжан Аманжол

Баспалдақта бізді Балқаш әуежайының директоры Мейрамбек Мырзахметов қарсы алды - біз онымен экскурсия туралы алдын ала келіскен болатынбыз.

Балқаш әуежайының директоры Мейрамбек Мырзахметов (сол жақта). Фото: ©️ Tengrinews.kz / Әлімжан Аманжол

Алдымен ол фотограф екеумізді екінші қабаттағы кабинетіне "сөйлесуге" және кеудешелерді алуға алып келді - оларсыз бізді кіреберістен ары қарай өткізбейді. Жол бойы әуежайды 20 жылдан аса уақыт бойы басқарып келе жатқанын айтып берді. Ол мұнда болған жағдайдың бәрін өз көзімен көрген.

Қазір оның айтуынша, әуежай үшін "дәуірлеу кезеңі" туды.

Тілші Елизавета Аксенова (сол жақта) және Балқаш әуежайының директоры Мейрамбек Мырзахметов (оң жақта). Фото: ©️ Tengrinews.kz / Әлімжан Аманжол

Кеудешелерді алып, ғимаратты аралауға шықтық. Тағы да баспалдақпен келе жатырмыз. Айтпақшы, мұнда естелікке суретке түскісі келетіндер өте көп. Төмен түспес бұрын, суретке түсіп жатқандардың кадрын бұзбау үшін оларды күттік.

Фото: ©️ Tengrinews.kz / Әлімжан Аманжол

Төменде баспалдақтың екі жағында дәліздер орналасқан. Бұл ғимараттың бұрын мүлдем болмаған, жаңадан салынған бөліктері.

Реконструкциядан кейін осы қосымша құрылыстардың есебінен ғимараттың ауданы 1 800-ден 2 700 шаршы метрге дейін ұлғайды.

"Бұрын бұл бөлмелердің ешқайсы болмаған, - деп Мейрамбек Мырзахметов жарық дәліздерді көрсетті. - Полиция бөлмесі де, мүмкіндігі шектеулі жандарға арналған арнайы дәретханалар да жоқ еді - бәрін жаңадан салдық. Көмек көрсетуге арналған кішкентай ғана кабинет және бүкіл әуежайға ерлер мен әйелдерге арналған небәрі екі дәретхана болатын".

Фото: ©️ Tengrinews.kz / Әлімжан Аманжол

Тіркеу және тексеру: торкөз журнал мен RAPISCAN сканерлері

Бұрын тіпті тіркеу орындары да тар дәліздің бойында тұратын.

"Мен мұнда 98-жылы келдім, ал 85-жылдан бастап курсант кезімде осы жерден ұшатынмын, - деп еске алады басшы. - Ол кезде не болғанын білсеңіз ғой! Адамдар сыймай кететін! Толыққанды тексеру жүргізілмейтін. Кейін шағын қосымша құрылыс салынды, бірақ бәрібір қыста адамдарға сөмкелерімен аязда жүруге тура келетін. Қазір мүлдем басқаша".

Шынымен де, қазір мұнда бәрі заманауи көрінеді - адамдар бірінен соң бірі тіркеуге өтіп, ұқыпты кезекте тұр.

Тіркеу орны. Фото: ©️ Tengrinews.kz / Әлімжан Аманжол

Тіркеу орнында құжаттар тексеріліп, отырғызу талондары беріледі. Бір жолаушы әйел әуежай қызметкеріне құжаттарын шыдамдылықпен көрсетіп жатқанда, екі кішкентай қыз кезекпен секіріп, бір сұрақты қайталай береді:

- Мама, біз жақында ұшамыз ба?

- Жақында, - деп қысқа қайырды әйел, тіркеумен де айналысып, екі қызына да бірдей көз салып үлгеріп жатып.

Олар Алматыға ұшпақшы. Қазір мұнда күніне екі бағыт бойынша - Алматы мен Астанаға екі рейс қызмет көрсетеді.

Жолаушы отырғызу талонын алып, чемоданын өлшеткеннен кейін (барлық әуежайдағыдай), тексеру аймағына барады. Ол жер тіркеу орнынан шамамен 10 қадам жерде.

Мұнда куәлік сканері жоқ екені рас. Оның орнына аққұба келген жас қыз жолаушылардың аты-жөнін үлкен торкөз журналға қаламмен ұқыптап жазып отыр. Содан кейін ғана келесі залға өтуге рұқсат береді.

Фото: ©️ Tengrinews.kz / Әлімжан Аманжол

Келесі залда тексеру жабдықтары мен бейнебақылау бөлмесі бар бақылау-өткізу пункті орнатылған (бұрын мұнда БӨП мүлдем болмаған). Ал ескірген екі тексеру кешені заманауи RAPISCAN қондырғыларына ауыстырылған. Бейнебақылау камераларының саны бес есеге жуық - 16-дан 76-ға дейін көбейтілді.

Мұнда жолаушыларды тағы бір жас қызметкер қарсы алады. Ол құжаттарды тексеріп, багажды өткізетін "рентгенді" бақылайды. "Тыйым салынған затты" бірден байқайды. Менің жанымда фен бар еді. Ол мені тоқтатып, сөмкемдегі ұзынша заттың не екенін сұрады. Мен бұл жай ғана Dyson екенін айтып, оны көрсеттім. Ол: "Бұл байлардың заты ма?" - деп әзілдеді де, ақ жол тілеп өткізіп жіберді.

Фото: ©️ Tengrinews.kz / Әлімжан Аманжол

Осы жерден адамдар бұрын болмаған күту аймағына өтеді. Қазір мұнда кез келген басқа әуежайдағыдай орындықтар бар. Онда өз рейсін күтіп отырған күнге күйген, демалыстан қайтқан адамдар жайғасқан.

Осы жерден жеңіл-желпі тамақтанып, даршын қосылған кофе ішуге болады - реконструкциядан кейін мұнда шағын буфет-арал пайда болған.

Фото: ©️ Tengrinews.kz / Әлімжан Аманжол

Адамдар осы жерден ұшаққа отыруға шығады. Бірақ оған дейін әлі толық бір сағат бар, ал біз "жасыл жарық" беретін арнайы жилет киіп жүргендіктен, директордың бастауымен ұшу алаңына шығуымызға рұқсат берілді.

Осылайша әуежай ғимаратының сыртқы келбетін тамашалай аламыз. Жолаушылар ұшаққа дейін осы жолмен жаяу барады - әуе кемесі әдетте шығаберістен небәрі 100 метр жерде күтіп тұрады.

Фото: ©️ Tengrinews.kz / Әлімжан Аманжол

Бірақ мұнда ұзақ бөгелмедік. Мейрамбек Мырзахметов: "Жүріңіздер, тағы бір мақтанышымызды көрсетейін", - деді де, бізді маңайдағы шағын ғимаратқа бастап апарды.

"Міне-е-кей, бәрі жап-жаңа! Мұны да бізге сатып әперді. Енді осындай тамаша техника жұмыс істеп тұр!" - ол іште тұрған арнайы машиналарды көрсеткенде, көңіл-күйі көтеріліп, ерекше тебіреніспен сөйледі.

Фото: ©️ Tengrinews.kz / Әлімжан Аманжол

Көліктердің сыртқы түрі өте әсерлі - бейне бір автосалоннан жаңа ғана шыққандай. Әсіресе, сыртта тұрған ескі өрт сөндіру машинасымен салыстырғанда солай көрінеді. Ол әлі де жұмысқа жарамды болғанымен, әбден тозғаны байқалады.

Фото: ©️ Tengrinews.kz / Әлімжан Аманжол

Алматыдан келетін рейстің қонуына бір сағаттан аз уақыт қалды. Бір сәтте "өрт сөндіру көлігі" апаттық белгілерін жағып, ангардан шұғыл шықты да, ұшу-қону жолағының маңынан өз орнына тұрды. Тәртіп солай.

Кабина ішіндегі ер адамдар күлімсіреп, бізге қарап жылы шырай танытты. Мұнда бәрінің көңіл-күйі көтеріңкі.

Фото: ©️ Tengrinews.kz / Әлімжан Аманжол

Штат 30-дан 100 адамға дейін өсті: қызметкерлер үшін не салынды?

Біз ангарды аралап, арнайы техниканың жаңасына таңданып үлгергенше, бізді басқа жерге шақырды. Бір минуттан соң бір қабатты ғимараттың жанында тұрдық - бұл реконструкция кезінде салынған қосалқы нысандардың бірі.

Мұнда қызметкерлерге арналған блок жасалған. Әуежай жаңартылғаннан кейін олардың саны 30-дан 100-ге дейін көбейді.

Фото: ©️ Tengrinews.kz / Әлімжан Аманжол

Әуежайды қайта жаңарту жұмыстары бір жарым жылға жуық уақытқа созылды. Осы кезеңде тұрақты рейстер тоқтатылғанымен, негізгі мамандар құрамын сақтап қалу мүмкін болды.

Азаматтық авиация саласындағы мамандарды оқыту мен сертификаттау ұзақ уақытты қажет ететіндіктен, директордың түсіндіруі бойынша, әуежай инфрақұрылымы мен ұжымы жетекші ведомство есебінен сақталған.

Ал бұрынғы қызметкерлер мұндай жеке жайлар туралы тіпті армандамаған да. Енді оларда ас ішетін бөлме, душ, өз әжетханалары және таңертеңгілік "жиналыстар" мен оқу-жаттығуларға арналған кабинет бар.

Фото: ©️ Tengrinews.kz / Әлімжан Аманжол

"Мұнда департамент басшылары әр таң сайын бас қосады. Бес минуттық жиналыс өткізеді, - деп жалғастырды директор экскурсиясын. - Бізде бұрын мұндай жиын өткізетін орын атымен болмаған. Ал қазір, міне - бәрі жайлы. Бөгде адам кіре алмайды - бәрі электрон кілт арқылы. Міне, осындай!"

Осы ғимаратта біз де "бес минуттық" аялдама жасадық. Кабинеттерді жылдам шолып шығып, қайтадан сыртқа беттедік. Алматыдан келе жатқан ұшақ қонуға жақын - бұл сәтті жіберіп алуға болмайды.

Күтіп тұрмыз.

Фото: ©️ Tengrinews.kz / Әлімжан Аманжол

Сосын тағы біраз күттік. Міне, ол да көрінді.

Фото: ©️ Tengrinews.kz / Әлімжан Аманжол

Ұшақ қонғаннан кейін екі минут өтпей-ақ, одан жүктерді түсіре бастады. Ал адамдар ұшып келу аймағына қарай бет алды. Сөмкелер де олардың соңынан "жол тартты".

Фото: ©️ Tengrinews.kz / Әлімжан Аманжол

Балқаш әуежайында жүк қалай беріледі?

Неге біз жүкке ерекше мән беріп отырмыз? Себебі қарапайым: бұрын оны көлікпен тасып әкеліп, сыртқа жай ғана үйіп тастайтын. Енді мұнда жүк таспасы мен камералары бар арнайы бөлме бар.

Оның көрінісі мынадай:

Фото: ©️ Tengrinews.kz / Әлімжан Аманжол

Айтпақшы, чемодандар 10 минутқа жетпей-ақ әкелінеді.

"Жаңартылған әуежай 1 маусымда іске қосылды. Қазіргі өткізу қабілетіміз - сағатына 60-тан 80 жолаушыға дейін. Жазғы маусымның екі жарым айында 11 мыңға жуық адамды қабылдаймыз, ал жалпы бір жылда - 150 мың жолаушыға дейін. Енді бәрі нақты жұмыс істейді: жолаушы ұшып келу залына жеткенше, оның жүгі таспада дайын тұрады - бүкіл процедура 10–15 минутты алады", - деп сендірді әуежай басшысы.

Фото: ©️ Tengrinews.kz / Әлімжан Аманжол

Ал мына сурет директордың осының бәріне қаншалықты мақтанышпен қарайтынын жақсы көрсетеді:

Фото: ©️ Tengrinews.kz / Әлімжан Аманжол

Бұл қанаттағының бәрін қарап шықтық. Негізгі ғимаратқа оралып, екінші дәлізге - енді баспалдақтың оң жағына қарай бұрылдық. Реконструкцияға дейін бұл қанат та болмаған еді. Жол бойындағы алғашқы бөлме - медпункт.

Фото: ©️ Tengrinews.kz / Әлімжан Аманжол

Бізді медпункт меңгерушісі Баян Бақзина қарсы алды. Ол Балқаш әуежайында 15 жылдан аса уақыттан бері жұмыс істейді. Осы жылдар бойы оның қызметі екінші қабаттағы бір шағын кабинетте болған.

"Ал қазір үш бөлмелі кабинет жасап берді. Бізде мұнда қабылдау бөлмесі, сосын емшара бөлмесі, содан кейін изолятор бар. Қазір барлық жағдай жасалған", - дейді ол.

Тілші Елизавета Аксенова (сол жақта) және Балқаш әуежайы медпунктінің меңгерушісі Баян Бақзина (оң жақта). Фото: ©️ Tengrinews.kz / Әлімжан Аманжол

Меңгерушінің айтуынша, медпунктің негізгі міндеті - қажет болған жағдайда жолаушыларға алғашқы көмек көрсету және күн сайын қызметкерлерді ауысым алдында және ауысымнан кейін тексеруден өткізу.

Реконструкциядан кейінгі Балқаш әуежайы. Фото: ©️ Tengrinews.kz / Әлімжан Аманжол

Ұшу алдында және қонудан кейін бұл жерде әуежай қызметкерлерінен бөлек, экипаж мүшелері, соның ішінде чартерлік рейс мамандары да медициналық тексерістен өтуге міндетті.

Медициналық кабинеттің іргесінде полиция пункті орналасқан. Бірақ оның ішін түсіруге тыйым салынған. Оған жақын маңда арнайы жедел әрекет ету жасағының қызметкерлері жүр.

Фото: ©️ Tengrinews.kz / Әлімжан Аманжол

Кейін білгеніміздей, Балқаш әуежайында тіпті CIP-аймағы да бар екен - бұл ұшу алдындағы немесе ұшудан кейінгі рәсімдерді тезірек әрі тыныш өткізгісі келетін жолаушыларға арналған "жайлылығы жоғары" бөлме.

Балқаш әуежайы реконструкциядан кейін. Фото: ©️ Tengrinews.kz / Әлімжан Аманжол

Ал мынау - CIP-залдың өзі. Былғары дивандар, теледидар, сусындар сөресі қойылған. Бірақ ол әлі іске қосылмаған, сондықтан мұнда жарық жоқ.

Фото: ©️ Tengrinews.kz / Әлімжан Аманжол

Негізгі күту аймақтарынан бөлек, әуежайда ана мен бала бөлмесі де жабдықталған, бірақ ол көбіне пансионат нөміріне ұқсайды. Онда кереуеттер мен ойын аймағы бар.

Фото: ©️ Tengrinews.kz / Әлімжан Аманжол

Сондай-ақ тамақ жылытуға болатын шағын асүй қарастырылған. Тіпті кір жуғыш машина мен үтіктеу тақтасы да бар. Бөлек санитарлық торап пен баланы жөргектеу үстелдері де қойылған.

Фото: ©️ Tengrinews.kz / Әлімжан Аманжол

Біз мұның бәрі жолаушылардың қажетіне жарап жатыр ма деп сұрадық. Директор бұл орынның үнемі қолданыста екеніне сендірді:

"Тіркеуден өткен бетте бірден осында келеді. Неге келмеске? Бала кішкентай болғанда өте ыңғайлы - бәрі қолжетімді жерде. Мұндай еш жерде жоқ. Мұнда адамдар кір жуып, шомылып, тамақ дайындай алады. Айталық, бала астына жіберіп қойса, жуа салу керек қой - мұнда бәрін жылдам жуып алады. Кішкентай балалар көп болса, бәрі осында келеді. Ойнайды. Жөргектеуге болады. Мұнда бәрі балалар үшін жасалған".

Біз аралап көрген тағы бір аймақ - мейрамхана. Орын жұмысқа толықтай дайын, бірақ әзірге бос тұр: кәсіпкерлер нысанға келуге асығар емес. Негізгі себеп - әуежайдағы жолаушылар ағынының аздығы (еске салайық, күніне небәрі екі рейс қана). Бірақ мұнда да зәулім сарайдағыдай әдемі аспашам орнатылған.

Фото: ©️ Tengrinews.kz / Әлімжан Аманжол

Жаңа әуежайды "аралауымыз" осымен аяқталды.

Балқаш әуежайын реконструкциялау қанша тұрды және қаражат қайдан алынды?

Мұның бәріне 2,8 миллиард теңге жұмсалды. Реконструкция 2024 жылы басталды - бастапқы кезеңге Ұлттық қордан 913 миллион теңге жұмсалды. 2025 жылы үш дереккөзден тағы 1,96 миллиард теңге бөлінді.

Былтырғы бюджеттің шамамен үштен бірі - 945 миллион теңге - елге қайтарылған активтер есебінен толықтырылатын Арнайы мемлекеттік қордан берілді.

Қайтарылған активтер: Бас прокуратураның бұған қандай қатысы бар?

Қайтарылған активтерге жүзеге асырылған барлық жоба сияқты, бұл реконструкцияны да Бас прокуратура қадағалады. Бұл орган елге қайтарылған ақшаны игерудің өзіндік операторы болып табылады.

Қайтарылған активтерге салынған басқа нысандар

Еске салайық, жақында Tengrinews.kz қайтарылған активтер туралы материалдар топтамасын бастаған болатын.

Алғашқы жарияланым "Сізге күміс хабарлама келді" деп аталды. Онда бұл механизмнің қалай жұмыс істейтіні, елден шығарылған қаражатты кім және қалай іздейтіні, сондай-ақ кімдердің активтері тәркіленетіні туралы егжей-тегжейлі баяндалды.

Екінші материалда редакция осы қаражаттың арқасында қандай емханалар, жедел жәрдем станциялары мен ауылдық дәрігерлік амбулаториялар бой көтергенін көрсетті.

Үшінші материалды дайындау барысында Tengrinews.kz тілшілері Ақмола облысы, Көкшетау қаласына барды. Онда осыдан жарты жыл бұрын заманауи спорт кешені - Kokshe Arena ашылған болатын. Бұл нысан да елге қайтарылған ақшаға салынған.

Төртінші материалда Петропавлдағы ерекше балабақша туралы айтқан болатынбыз, ол басқа балабақшалардан айтарлықтай ерекшеленеді.

Бесінші репортаж Ақмола облысындағы Зеренді ауылынан дайындалды, онда қайтарылған активтерге ірі қалалардың спортшылары қызыға қарайтындай жабдықталған мамандандырылған балалар мен жасөспірімдер спорт мектебі (БЖСМ) салынды.

Авторлары: Елизавета Аксенова, Әлімжан Аманжол

Аударған: Дина Шәріпхан