Банк алаяқтардың кесірінен ақшаңызды бұғаттаса: оны қалай қайтаруға болады?

Ұлттық банк казақстандықтар транзакция кезінде алаяқтық күдігіне байланысты бұғатталған ақшаны қалай қайтара алатынын түсіндірді, - деп хабарлайды Tengrinews.kz тілшісі.

Ұлттық банк казақстандықтар транзакция кезінде алаяқтық күдігіне байланысты бұғатталған ақшаны қалай қайтара алатынын түсіндірді, - деп хабарлайды Tengrinews.kz тілшісі.

Былтыр Қазақстанда ұлттық антифрод-орталығының қызметін кеңейтіп, алаяқтық әрекеттерден зардап шеккендерге ақшаны қайтаруды жеңілдететін заңнамалық түзетулер әзірленді.

Ұлттық банктің Tengrinews.kz редакциясының ресми сауалына берген жауабында бұғатталған ақшаны қайтару рәсімін жеңілдететін түзетулер қаржы нарығын дамыту, қаржылық қызметтер тұтынушыларының құқықтарын қорғау, байланыс және артық заңнамалық реттеуді алып тастау мәселелері бойынша заң аясында қабылданғаны айтылған. Олар 2025 жылғы 31 тамызда күшіне енді.

Егер транзакция кезінде үшінші тұлғалардың күмәнді әрекеттеріне байланысты сіздің ақшаңыз бұғатталса, құқық қорғау органдарына жүгіну қажет. Олар банкке транзакцияны алаяқтық деп тану және бұғатталған соманы клиентке қайтару қажеттілігі туралы хабарлама жіберуі тиіс. Тиісті хабарламаны жіберуге прокуратура санкция береді.

"Осылайша, ақшаны қайтаруға прокурор санкциялаған қылмыстық қудалау органының хабарламасы негіз болады. Сондықтан алаяқтықтан зардап шеккендер құқық қорғау органдарына жүгінуі керек", - деп нақтылады Ұлттық банк.

Ұлттық банктің антифрод-орталығында платформа іске қосылған 2024 жылғы 22 шілдеден кейін жасалған алаяқтық белгілері бар транзакциялар тіркеледі. Яғни, осы кезеңде зардап шеккендердің барлығы ақшасын қайтарып алуға тырысып көрсе болады.

Анықтама: Ұлттық банктің антифрод-орталығы - қаржылық алаяқтықпен нақты уақыт режимінде күресу үшін іске қосылған бірыңғай технологиялық платформа. Оның басты мақсаты - қаржы нарығының барлық қатысушысы арасында жедел дерек алмасуды қамтамасыз етіп, ұрланған ақшаны қылмыскерлер қолма-қол ақшаға айналдырып үлгермей тұрып тоқтату.

Ұлттық банк мәліметінше, бенефициар банкі транзакцияны алаяқтық деп тану туралы қылмыстық қудалау органының хабарламасын алғаннан кейін келесі операциялық күннен кешіктірмей ақшаны қайтарады. Өтініш берушіге тек бұғатталған сома шегіндегі ақша қайтарылады. Қайтару төлем ордері және төлем тапсырмасы арқылы рәсімделеді.

"Егер бұғаттау кезінде алушылардың шотында ақша болмаса, келтірілген шығын сот тәртібімен қайтарылады", - деп қосты Ұлттық банк.

Егер қаржы ұйымдары алаяқтық белгілері бар транзакциялар аясында бұғатталған ақшаны қайтару бойынша заң талаптарын орындамаса, Қаржы нарығын реттеу және дамыту агенттігі оларға қадағалау шараларын қолдануға құқылы.

Сілтемесіз жаңалық оқисыз ба? Онда Telegram желісінде парақшамызға тіркеліңіз!