Бақыт құшағында Парижде Үздік дебют атанды

29 қазан мен 2 қараша аралығында  Франциядағы жетінші рет өтіп отырған  Festival du Film Kazakh қазақ киносы фестивалінде «Үздік дебют» аталымын жеңіп алды, – деп хабарлайды Aikyn.kz сайты.

Фильмнің Франциядағы таныстырылымы аталған фестивальдің жабылу салтанатында өтті. Фестиваль киногерлер, киносыншылар, эксперттер мен халықаралық киносүйер қоғамның басын қосты. Көрермен қатарында Париж қаласындағы қонақтар мен жерлестеріміз де көп болғанын айта кету керек. Көрермендер тарапынан джубокс мюзиклге ерекше баға берілді. Осылайша, рухани құндылықтар мен маңызды тақырыптарды көтерген картина халықаралық жүлдеге ие болды.

Айта кететін тағы бір ақпарат, қазақ киносы тарихындағы тұңғыш джубокс мюзикл фильм «Бақыт құшағында» Нью Йоркте тұрып жатқан отандастарымыздың назарына ұсынылды. Әлем елдерінде Unknowntalks шарасын ұйымдастыратын Диас Камерединов пен Әйгерім Ализакова мерекеге орай осы кинотуындыны көрерменге ұсынған. Фильмді тамашалаған көрерменнің мюзиклдегі Шәмші Қалдаяқовтың әндерін қосыла шырқап, сюжеттегі оқиғаларға бір жылап, бір күліп әсерленгенін байқауға болады. 

«Бақыт құшағында» фильмі  2025 жылдың 23 қазанында қазақтың ұлы композиторы Шәмші Қалдаяқовтың 95 жылдығы аясында үлкен экрандарға жол тартқан еді. Қазір прокатта.  Кинотуындыны тамашалаған көрерменнің әлеуметтік желідегі кері байланысынан  фильмдегі композитор әндерін қосыла шырқау, көз жасқа ерік беру, күлу мен көңілді билеу сәттерін байқауға болады. Картина сюжетінде көтерілетін өзекті тақырыптар да көрерменге өз әсерін бергенін байқау қиын емес.  Фильмде  қоғам үшін маңызды тақырыптар көтеріліп, отбасы институты үшін мәні зор мәселе ашылады, анаға құрмет, ер азаматтың міндеттері мен адал жауапкершілік  тақырыптары да терең тарқатылады.

«Бақыт құшағында» джубокс мюзикл фильмі толықтай Шәмші Қалдаяқовтың әндері негізінде түсірілген. Композитор туындыларының ұрпақтар сабақтастығындағы рөлі ерекше.

Фильм үшін арнайы Ш.Қалдаяқовтың 12 әні симфониялық оркестр сүйемелімен жазылып, саундтрек ретінде ұсынылады. Фильмнің шығармашылық тобына композитордың ұлы Мұхтар Қалдаяқов пен келіні Ботагөз Қалдаяқова да қолдау көрсетуде. Фильм түсірілімдері үшін арнайы Голливудтың әйгілі кинотуындыларын түсірген инновациялық кинокамера алдырылды.

Режиссер С.Шапашовтың мәліметінше, фильм бір айдың ішінде толығымен қазақ тілінде елорданың көркем жерлерінде түсірілген. «Бақыт құшағында» jukebox мюзиклі үшін бір түсірілім алаңына 230  актер билейтін ең үлкен массалық эпизодтар бар. Сонымен қатар фильмде 80 адам бірден қатысқан массалық көріністер де түсірілген болатын. Арнайы хореограф фильмдегі билерді бір ай көлемінде арнайы қойып, дайындықтан өткізді.