Флот офицері үздік атанды

Қазақстан әскери-теңіз флоты сапындағы үздік кеме капитаны Маңғыстау облысында қызмет етеді. «Маңғыстау» зымыран-артиллериялық кемесінің командирі, 3-дәрежелі капитан Ермекбай Оспанов Қазақстан Қарулы Күштерінің үздік әскери қызметшілері сынға түсетін республикалық «Әскер тарланы» байқауының жеңімпазы атанды. 

Ол жай ғана командир емес, кәсіби сардар-көк теңіздің қожасы. 3-дәрежелі капитан Ермекбай Оспанов «Әскер тарланы» байқауында үздік әскери теңізші атанды. Әскери өмірін сержанттық құрамнан бастаған ол «Маңғыстау» зымыран-артиллериялық кемесінің экипажын басқарып келеді. 

Ермекбай Оспанов – Түркістан облысының тумасы. Бала кезінен теңіз тірлігін армандаған жеткіншек мақсатына жетті. Шымкенттегі Республикалық әскери мектепті үздік бітіріп, кейін Ақтаудағы Әскери-теңіз институтын тәмамдады. Қытайда білімін жетілдірген айтулы маман қазір елдің теңіздегі шекарасын қорғап жүр. Кәнігі теңіз көкжалына айналған командир тірлігін теңізсіз елестете алмайтынын айтады.

Ермекбай Оспанов, «Маңғыстау» Зымыран-артиллериялық кемесінің командирі:

- 2017 жылы оқу бітіріп келген шағымда тарихта алғаш рет біздің әскери-теңіз күштерінің кемелері Иран Республикасына іс-сапарға бардық. Сол кезде біз теңіз толқыны шамамен 4 баллдай штормға түстік. Қорқыныш та болады, қызық та болады. Сол кезден бастап маған теңіз ұнайды, кемеде қызмет ету ұнайды. 

Оспанов басқаратын экипаждың басты мақсаты – елдің Каспийдегі шекарасын қорғау. Ол үшін олар үнемі айдын кешіп, кезекшілік атқарады. Оралдағы «Зенит» зауытында салынған «Маңғыстау» кемесі теңізде 10 тәулікке дейін ұдайы жүре алады. Олар үшін жеті балдық теңіз толқыны да қауіпті емес. Әскери кеме су астынан төнетін қауіп-қатер мен астыртын әрекеттерді алдын ала анықтай алады. Сонымен қатар заманауи артиллериялық құрылғымен, ең озық радиотехникалық қарумен жабдықталған. Салмағы 240 тонна, ұзындығы 42 метрге жуықтайтын қуатты кеме сенімді капитанның қолында.

Ермек Жәмішев, «Маңғыстау» Зымыран-артиллериялық кемесі электромеханикалық жауынгерлік бөлімінің командирі:

- Бізге кеме командирімен қызмет ету жәй ғана міндет емес, нағыз қуаныш. Себебі Ермекбай Нұрланұлының басшылығы кезінде жауынгерлік рух ең жоғарғы дейгейде. Біз кеме командирін әрбір жорық кезінде қызметте де, өмірде де қолдауға дайынбыз. 

Капитан Оспановқа республикалық «Әскер тарланы» байқауының марапатын Қорғаныс министрі табыстады. Бұл тек командирдің емес, бүкіл кеме экипажының еңбегіне берілген баға. Салтанатты рәсімнен кейін ол қайтадан қалыпты қызметіне кірісті.

Саналы ғұмырын әскери теңіз флотына арнаған командир көк теңіз кезіп бара жатыр. Кәрі Каспийдің мінезін тамыршыдай тап басатын кәнігі капитанның жүзінде салқын сабыр, бойында өзіне Отан тапсырған міндетке деген адалдық бар. 

Авторлары: Арыстанбек Кенже, Тамара Степанова, Ренат Досалиев