Барлығына тең болсын қызылордалық көпбалалы әкенің ісі желі қолданушыларын сүйсіндірді

Қызылордалық әкенің желідегі видеосы көшілікті сүйсіндірді, - деп хабарлайды Tengri Life.

40 жастағы Ғалымжан Мықтыбайдың айтуынша, жұбайы екеуі бес бала тәрбиелеп отыр. Үлкені Табиғат жеті жаста, кенжесі Мирас бір жарым жаста.

"Мен 30 жасымда ғана үйлендім. Оған дейін түрлі қалаларда - Алматы, Астана және Таразда жұмыс істеп үлгердім. Қазір такси жүргізушісі болып жүргеніме 15 жыл болды, ал бос уақытымда кейде дәнекерлеу жұмыстарымен айналысамын. Жұбайым екеуміздің бес баламыз бар: үлкені Табиғат 7 жаста, ал кенжеміз Мирас небәрі бір жарым жаста", - дейді Ғалымжан.

Instagram-дағы бұл жазбаны көру

A post shared by Дробилка 3в1.Ғалымжан (@dravilka86)

Отбасындағы бұл шағын дәстүр тұңғыш баласы дүниеге келгеннен кейін басталған. Сол кезден бастап әкесі Табиғатқа күн сайын кішкентай ойыншықтар әкеліп жүрген.

"Бәрі Табиғаттан басталды: мен оған күнде кішкентай ойыншықтар әкелетінмін. Кейін қызым дүниеге келді, ойыншықтар өзгере бастады, ал балалар саны көбейгенде оларды күнделікті сатып алу қиынға соқты. Содан соң тәттілерге көштім: әр кеш сайын тәттіні бесеуіне бөліп беремін, ал әйеліме міндетті түрде бөлек бірдеңе аламын. Жергілікті дүкендерде мені бәрі таниды және керек сыйлықтарды алдын ала дайындап қояды", - деді Қызылорда тұрғыны.

Ғалымжанның отбасылық дәстүрі туралы видео 1,8 миллионға жуық қаралым жинады. Желі қолданушыларын әсіресе ер адамның жұбайын да ұмытпай, оған да сыйлық алатыны ерекше тебірентті. Ал әлеуметтік желідегі танымалдылық Қызылорда тұрғыны үшін күтпеген жағдай болды.

"Видеоның бұлай тарап кететінін мүлдем күтпедім. Әдетте ролик салсам, кейін оны өшіріп тастайтынмын. Бұл жолы күнделікті ісімді көрсетуді жөн көрдім. Видео таралып кеткеннен кейін, желідегі жұрт балаларды және оларға тәтті беріп жатқан сәтті жиірек көрсетуімді сұрай бастады", - деп бөлісті Ғалымжан.

Әкенің үйге оралуын бүкіл отбасы асыға күтеді. Олар әкесінің жұмыстан құралақан келмейтінін біледі.

Ғалымжан үшін бұл жұмыс ауысымынан кейін тәтті сатып ала салу ғана емес. Осылайша бір баладан басталған дәстүр біртіндеп бүкіл отбасының ажырамас бөлігіне айналды.

Тағы оқыңыз: “Жылап, қосылып шырқады“: Астанадағы такси жолаушысының эмоцияға толы видеосы желіде тарады

Google News арқылы жаңалықтарымызды қадағалаңыз