Барселона көз тіккен Кәрім Меңдіқанов Қазақстан жастар құрамасына шақырту алды

Сәуірдің 25-і мен 30-ы аралығында Шымкент қаласында Қазақстан, Әзербайжан, Пәкістан және Ресей жастар құрамасының (16 жасқа дейінгі ойыншылар) қатысуымен Даму кубогы өтеді. 

Қазақстан жастар құрамасының құрамында негізінен федерация академиясында шетелдік және жергілікті бапкерлердің жетекшілігімен дайындалған ойыншылар бар. Сонымен қатар құрамға Еуропа академияларында жаттығатын талантты жас ойыншылар да қосылған. Олардың арасынан Абдулла Бапишев (Магдебург, Германия) пен Кәрім Меңдіқановты (Сант Куат, Испания) ерекше атап өткен жөн.

Айта кету керек, Меңдіқанов қазіргі уақытта ресми түрде «Сант Куат» футбол клубының ойыншысы саналады. Алайда, 2026 жылдың күзінен бастап ол «Барселона» академиясының ойыншысы ретінде тіркеледі. 

Меңдіқанов пен «Барселона» арасындағы келісімшарт 2026 жылдың 1 сәуірінде ресми түрде жарияланды. Kazinform тілшісіне берген эксклюзивті сұхбатында футболшының әкесі бұл оқиғаның Қазақстан футболы үшін тарихи маңызға ие екенін атап өтті. Себебі «Барселона» академиясында бұған дейін қазақстандық ойыншы болмаған.