Баспана кезегіне тұру ережелері

Миллионға жуық қазақстандық баспана кезегіне тұр. Олардың тізімін қазір Отбасы банк жүргізіп жатыр.

Алғашқы пәтерлерді Ақмола облысындағы Қосшы қаласының тұрғындары алып үлгерді. Қоныс тойын тойлаған отбасылар саны 371. Жыл соңына дейін ел бойынша тағы 7 мың пәтер беру жоспарланған. Ол баспананы кімдер алады? Тізімге ілінудің талаптары қандай?

Баспана кезегіне 18-ден асқан кез-келген қазақстандық тұра алады. Басты талап – соңғы 5 жылда атында тіркелген пәтері болмауы керек. Ал Астана, Алматы, Шымкент тұрғындары үшін қалада үш жыл тұрақты тіркеуі болуы міндетті. Себебі кезек сол тіркелген елді мекен бойынша қалыптасады. Сонымен қатар тізімді әкімдіктер емес, Отбасы банк жүргізеді.

Кезекке тұру шарттары:

18 жастан асқан Қазақстан азаматы

Соңғы 5 жыл ішінде ҚР аумағында тұрғын үйдің болмауы

3 жыл тұрақты тіркеу (Астана, Алматы, Шымкент)

Әсел Серікбаева, «Отбасы банк» АҚ Тұрғын үймен қамтамасыз ету орталығы директорының орынбасары:

- Қазір кезекте тұрған азаматтар саны - 967 мың. Оның 647 мыңы бұрын жергілікті атқарушы органдар арқылы тіркелгендер. 24 мамырдан бері біз 320 адамды тіркедік.

Мамандар жаңа жүйе адами факторды азайтып, ашықтыққа алып келеді дейді. Бұрын тізім реттік нөмірлер арқылы жасақталса, қазір өтініш берген күнге қарай қалыптасады. Яғни кім бұрын кезекке тұрса, сол ертерек алады. Бірақ басымдыққа ие азаматтар санаты бар. олар көп балалы отбасылар, мүгедектігі бар азаматтар, жетім балалар, ардагерлер мен жесірлер.

Тұрғын-үйдің 70% алатындар:

Соғыс ардагерлері

Көпбалалы отбасылар

I-ІІ топтағы мүгедектігі бар азаматтар

Мүгедектігі бар бала бағып отырған отбасылар

Жетім балалар

Жесірлер

Әсел Серікбаева, «Отбасы банк» АҚ Тұрғын үймен қамтамасыз ету орталығы директорының орынбасары:

- Әкімдік мың пәтер салды делік. Оның 70 пайызы, яғни 700 пәтер осы сегіз санатқа беріледі. Ескеретін жайт, 20 пайызы, яғни, 200 пәтер жетім балаларға арналған. Қалған 500-і басқа санаттарға бөлінеді. Соңғы 30 пайыз мемлекеттік қызметкерлер, толық емес отбасылар мен бюджеттік мекеме қызметкерлері.

Жыл соңына дейін 7 мыңға жуық пәтер беру жоспарланған. orken.otbasybank.kz платформасы арқылы баспана кезегіне тұруға немесе өз кезегіңді көруге болады.

Авторлары: Серік Селеубайұлы, Гүлдана Кален