Баянауыл ауданында ауыз су мәселесі толық шешілді

Павлодар облысы Баянауыл ауданында ауыз су мәселесі толық шешімін тапты. 

38 елді мекеннің 24-і орталықтандырылған су жүйесіне қосылды.  Ал халық саны 200-ден аспайтын шағын ауылдарға блок-модуль орнатылды.

40 жыл бұрын Баянауыл ұлттық паркі ашылғанда Шонай ауылына су құбырын тарту жобасы жасалған еді. Канал да қазылды. Алайда кейін құрылыс аяқсыз қалды. Ауыл тұрғыны Ерғалым Қайырденовтың айтуынша, тұрғындар жылдар бойы суды тасып ішті. Біраз адам ауласында құдық қазып алды. 

Ерғалым Қайырденов, ауыл тұрғыны:

- Ұлттық парктің бастаған жоспарлары тоқтап қалды. Мында кантор салынып жатқан, музей бар тоқтады да сол каналдардың бәрі, трубасы  бәрі келген сол тоқтап қалғаннан кейін халық бәрі сусыз қалды. Содан кейін бір водовоз болды, сол водовозбен су тасып тұрды халыққа. Биылғы жылы екі-үш айдың ішінде тартып берді, енді халықтың қуанышы шексіз осы Шонай басындағы. 

Шонай ауылында  су құбыры желісінің құрылысы қараша айында аяқталды. Мамандар судың сапасы жоғары дейді.

Владимир Пашко, оператор:

- Мұнда елді мекенге су беретін екі насос орналасқан. Бірі жұмыс істеп тұр, екіншісі резервте. Су резервуардан сүзілген күйде беріледі. Сапасы жақсы, ешкімнен шағым түскен жоқ. 

Орталық су жүйесіне қосылған ауылдың тұрғындары енді жуынатын бөлмесін реттеп, үйге су кіргізу жұмыстарына кірісіп кетті. Әлеуметтік жағдай жасалған ауылдан көп адамның көшкісі жоқ. 

Әділет Серік, Баянауыл аудандық экономиканың нақты секторы бөлімінің бас маманы:

- Баянауыл ауданы бойынша 38 елді мекен бар, сол 38 елді мекеннің 11 елді мекен жаңағы кешенді блок модуль кешенімен қамтылған. Яғни ол ауылдар адам саны 200 адамға жетпейтін яғни кіші ауылдар. Ал қалған 24 ауыл толықтай орталықтандырылған су құбырымен қамтылған болатын. Биылғы жылы сол ауылдарға үш ауыл қосылып жатыр. 

Бүгінде Баянауыл ауданының барлық ауылы 100 пайыз таза ауыз сумен қамтылды. Ал облыс бойынша келесі жылы осындай көрсеткішке жетеміз, дейді жауаптылар. 

Қарлығаш Қасиетова, Марат Игіліков