Bek Air жолаушыларына әуеде зақым келген бе сарапшы қорытындысы

Сот отырысында тәжірибелі сот-медициналық сарапшы Рахимжан Абдукаримов әуе кемесінің апаты кезінде адамдардың өліміне не себеп болғанын түсіндірді.

- Мұндағы жарақат неден болғаны анық. Жермен қозғалып келе жатқан ұшақтың тұрғын үйге соғылуы экипаж мүшелері мен кей жолаушылардың өліміне әкелген. Соққы нәтижесінде ұшақтың құрылымы ішінара қирап, экипаж бен жолаушылар жарақат алған, – деді Рахимжан Абдукаримов.

Сарапшының пікірінше, егер ұшақ жолында үй болмағанда әуе кемесі жай ғана алқап бойымен сырғып барып өздігінен тоқтайтын еді.

- Экипаж бен жолаушыларда авиациялық жарақатқа тән белгілер болған жоқ, бұл алдыңғы қорытындыны дәлелдейді. Яғни, ұшақ биіктіктен құлап, жерге қатты соғылған кезде болатын жарақаттар анықталған жоқ. Апат кезінде әуе кемесі елеулі биіктіктен құлаған жоқ, құрылымында да айтарлықтай қирау, жарылыс немесе өрт болмаған. Қарапайым тілмен айтқанда – үй болмағанда, адам шығыны да болмас еді, – деді сарапшы.

Бұған дейін сотта Bek Air ұшақ апаты бойынша апаттың себебін дәлірек анықтау үшін жасанды интеллект (ЖИ) сараптамасын пайдалану ұсынылды.

Еске салайық, 2019 жылдың 27 желтоқсанында Алматыдан Астана қаласына ұшып шыққан Bek Air компаниясының ұшағы радардан жоғалып кетті.

Кейін 95 жолаушысы және 5 экипаж мүшесі бар ұшақтың апатқа ұшырағаны мәлім болды.

Ұшақ жерге құлаған соң сырғанап барып әуежай аумағына жақын тұстағы ауыл шетінде екі қабатты үйге соғылған. Салдарынан 12 адам қаза тапты. Осыдан кейін Bek Air әуе компаниясына тиесілі тоғыз Fokker-100 ұшағының қызметі тоқтатылды.

2021 жылы Алматы облысының Талғар аудандық соты әуежай маңындағы жер учаскелерін заңсыз сатқан бұрынғы шенеуніктер мен риэлторға қатысты үкім шығарды.